Read Chothe Naga EPHESIYA 1 Bible Online

EPHESIYA 1 - Chothe Naga bible

EPHESIYA 1

¹Chungthieng ahal anu jui ah Khrista Jisu hei thou ah ahal sa rui Pol na Ngoiring ah mani ringchang Khrista hitta amha Ephesiya ah am Chungthieng meelimta ani pa Chungthieng akha chu Arengpu Jisu Khrista na yaihra akha chu adai pek chang su oh.

³Khrista hitta amha yarra wanram tinga jaihralim pepi ani Arengpu Jisu Khrista, mapa Chungthiengta dom ei oh.

⁴Anina mamai kunga thienga akha chu diek am rang akha chu Khrista hitta amha yarra simlei semthou matinga Chungthieng na anita masa tekta halpi so ae.

⁵Malungsit akha chu madit anu jui ah Khrista hei thou ah anita masanaopa ngei changranga Chungthieng na masateka anita halranga ngirphur so ae.

⁶Malungsit asanaota aman salla pepi saruka anina mayaihra limta dom ei oh.

⁷Khrista na aman salla thitpi yarra anita ahup ah si hla ah pak hei thou ah sanpiso ae. Chungthieng maringrei ngaipi hiya ah lok ah meh.

⁸Tella teljou no mahei anita yaihra pepi so ae.

⁹Chungthieng na marat mathei thupa silim Khrista yarra anita singsengta ripi ang ae ta amating thou ah ngirphur so ae.

¹⁰Mahal ha ae ang apha ha pha jui ah simlei wanrama amlim Khristana aluching changweta rachun pi ang ae.

¹¹Eheilimpa hi Chungthieng ahal adit nujui ah shuk sa ae; Khrista itta amha weta anina mamee changranga Chungthieng na athou hei thou ah mahal anu jui ah alung ngir ae.

¹²Chuna anina Khrista amota masha ah ngoiring ngeina Chungthieng mahung majai ha dom-su-oh.

¹³Nangeina adiek rou tichu aringketo phapi ahra rou ha thei-ah, nangeina ngoiringa saro-ei athieng muihla hana nangei mitpu chang so-ae.

¹⁴Chungthieng na mamee ngeita phapirang saro-ei phur ha ani taranga muihla hana ngirpi ae. Hina sarukka Chungthieng na mamee chang mee ngeita ahup hei thou ah hlapi ae. Anina mahung majai limhita dom ei oh.

¹⁵Hina sarukka Arengpu Jisuta nangei ngoiring akha chu Chungthieng mee ngei limta nangei lungsit ha kathei thou ah,

¹⁶Nangei tarang Chungthieng ta adom chan nong ae, keina kaniek changhon ah nangei tarang angai thei ing ae.

¹⁷Nangei sunga muihla na lutpi weta athei asing shukpi weta amota lella dangrang ani arengpu. Khrista, mapa Chungthieng kolla nie ah am ing ae.

¹⁸Hiya hra ah mamee ngei tarang saro ma ei phurha, akha chu nangeita kokpi maram ha nangeina thinwar lungwar honga dangpha rang keina nie ing ae.

¹⁹Ngoiring mee ani sunga haya ah lok marat hana tullu ae pi ae, hiyongpa marat hana ani sunga ehekta ratta tullu ae ah am ae.

²⁰Nalim hi amona Khrista ta athi hei thou-ah ringthou pi phura wanrama machangting ah-ongpiso ae.

²¹Khristana awan chunga am ae nea arat renglim akha chu simlei chunga akha chu phao ang simlei chunga ko loktek ae.

²²Chungthieng na eheilim Khrista kea kunga sipi ah, akoksha ngei tarang pepi ah eheilim chunga Reng chang so ae.

²³Akoksha ngei hi Khrista pumha changa Chungthieng ringchang na machunga ripta shihak ti ae.