Read Chothe Naga EPHESIYA 2 Bible Online

EPHESIYA 2 - Chothe Naga bible

EPHESIYA 2

¹Amating chu nangeina aril jui no ah pak ae saruka muihla tinga thi ah am chou ae.

²Apha hana lei ah nangeina simlei rama hrano lam tienga akha chu atunri ah Chungthieng ril jui lou ngeita choi muihla na nangeita rui ah rolle.

³Apha hana lei ah chu aniko mani hekta pumna dit ae num ae phura mani hekta Chungthieng lungsat rang mee changphur ae.

⁴Chutiweta Chungthieng na anita ringrei ngaipi ah akha chu lungsit pi hi aril ang salla mahei lok ae.

⁵Apha hana anina aril yuino ah, muihla tinga thi ah amlei ah anita Khrista hitta aring lamtinga ruipi so ae; Chungthieng ringrei ngeipi yarra nangta sanpi so ae:

⁶Khrista hitta amha ah anita ringthou pi ah wanrama amo hitta pal ha ang ae.

⁷Hita ma ae hina anuting phao ang apha changhonna Khrista kolla malungsit akha chu malok masei limhi ani meelim mai ah phurang sa ae.

⁸Maram chu nangta sanpi phur hi nangna nalok ranga na tullu lu narat hana ahno ae, hichu ngoiring yarra pha ang Chungthieng kutthul sa ae.

¹⁰Maram chu ani limna ahra ma tullu lu ranga amating hei thou ah Khrista mayarra semphur so ae.

¹¹Asartan ung ae ta Jihudi ngeina asar tanlou kok yentel ngei oh, amatinga nangei alota amphur chou mo halla an ou oh!

¹²Apha hana leichu nangei hi Khrista kolla hei thou ah aram la ah, saro ei ah Chungthieng rou ngir hlak hana tol no chou ae, Isarel ngei hu hlangmee changa akha chu aring pharang lungrang amno lutta simlei chunga amphur chou ae.

¹³Chutiweta atun chu Khristana amant salla thitpi yarra Khrista makolla nai ah ampi so ae.

¹⁴Maram chu Khrista matak makna ani kolla adai choiphao pi ah Jihudi akha chu gental jat ani hi angkha ruk so ae, matak mak na andami changpi ah am ahar ha hri ah houpi so ae.

¹⁵Yat ani shukka amhi athar mee akhachak changranga amona Jihudi ngei rouphun akha chu ae ang lu ang lam limha hri ah hou so ae.

¹⁶Khrista na khross chunga thit yarra anda khlak am niyo ae, mathit yarra adai choiphao pi ah yat ani ha pum akha chak changpi ah Chungthieng kolla woiha lea ah rui phao pi so ae.

¹⁷Khristana yung phura ahra rou adaihi, Chungthieng kolhei thou ah aram la ah am gental akha chu nai ah am Jihudi ngeilim chung ah chupi so ae.

¹⁸Khrista ma yarra Jihudi ngeiko, gental ngeiko muihla akha chak ah mapa maikunga wanea so ae.

¹⁹Chuna sarukka gental nangei hi huhlang mee akha chu ram adang mee ani yo ae; Chungthieng hu hah tuihah changso ae, akha chu Chungthieng inn sungmee ngei chang so ae.

²⁰Khrista matak makna inn pi cho changweta ahalsa rui ngei rourilpa ngei thul inn mun chunga nangei tako sapi so ae.

²¹Arengpu athieng amokna in changranga amona limpata ra chunpi ah choi ah am ae.

²²Amo hitta am ha ah nangeiko Chungthieng muihla yarra ma am rang amunt akha changranga adang mee ngei hitta rachuna sapi so ae.