Read Chothe Naga EPHESIYA 3 Bible Online

EPHESIYA 3 - Chothe Naga bible

EPHESIYA 3

¹Hina sarukka gental nangei taranga Khrista Jisu hunga si changa Pol keina Chungthieng kolla nie ing ae.

²Nangei tarang ahra tullu ae ranga keita Chungthieng ma ringrei ngai thui ah halle tihi nangei na thei so chou ae.

³Chungthieng athup lamha ripi ah keita dang piso ae, (Hina maramko keina jiek phur sing ae).

⁴Jiekka kahou phurha nangeina anlea chu Khrista kolla athup lam kadanghi nangeiko dangpha nea ang ae.

⁵Amating chu hiyong athup lam rilphur no ae; Chutiweta atun chu Chungthieng mahalsa athieng rui ngei akha chu rouril ngei muihla yarra ripi so ae.

⁶Athup lam hachu ahra rou hina yarra gental ngeiko Jihudi ngei hitta Chungthieng yaihra ha akha chakka pha ha so ae; Mani limpa pum akha chakka changa Chungthieng na Khrista hei thou ah saroei ah tumha phaha so ae.

⁷Chungthieng na ma ae nea marat anu jui ah keita alok kutthul pepi ah keita rou ron suuk chang pi so ae.

⁸Athieng mee ngai kar ah keina toltek changhalko Chungthieng mayarra keina tel jou no Khrista kolla thupa am lim ha gental ngei kolla rou hi rilpi ing ae.

⁹Eheilimpa sempi Chungthieng na amatinga meerul eya hei thou ah thupa si atipi ma ae ang tullu ha meelimna ripha ranga,

¹⁰Akok sha mee ngei yarra wanram amunt amunt eya lim ma thienglou muihla achoi ahai ngeita Chungthieng ma ae nea adang adang eya limpa ripiso ae.

¹¹Chungthieng hi limpa hi Khrista mayarra ae phur ae.

¹²Anina Khrista hitta am ha ah akha chu ani ngoiring yarra Chungthieng maikunga atri am no ah wanea ae.

¹³Keina aol ana kadonghi nangei lung leano ranga rilla am ing ae; hi lim hi nangei hratrang sa ae.

¹⁴Hina sarukka keina mapa kolla huk hrun ah nie ing ae.

¹⁵Wanram heithou ha inn sunglim akha chu simlei chunga am inn sunglimna adiek mingha pha su oh.

¹⁶Nangei sunga arat amrang akha chu muihla yarra malok ma ae nea ha pekranga keina Chungthieng ta nie ing ae.

¹⁷Nangei na ngoiring yarra nangei lungsunga Khrista amrang keina nie ing ae. Akha chu nangeina lungsi tihana inn mun changa ato sanrang keina nie ing ae.

¹⁸Nangeina Chungthieng mee ngei hitta tulla Khrista malungsit hi eya sei, eya lok, eya shai akha chu eya thuk tihi dang rang aratha,

¹⁹Phaweta atun ripta dangpha nohal Khrista yarra Chungthieng maring chang hana am ranga keina nie ing ae.

²⁰Ma ae nea marat hana ani sung tullu ae pi yarra kaina sai ah dangno akha chu halla shuk no eya lim ae nea ae.

²¹Akok sha akha chu Khrista kolla Chungthieng malok masei apha chang honna atreem naino ha am su oh. Amen.