Read Chothe Naga EPHESIYA 4 Bible Online

EPHESIYA 4 - Chothe Naga bible

EPHESIYA 4

¹Arengpu matarang ahung si keina nangeita rilla am ing ae: Nangeita akok anu jui ah Chungthieng ma ngai ringchang hana ring ou oh.

²Apha changhon nangei lu bu ah, anem akha chu adong ratto, khale kha adongthei ah nangei lungsit hlak ha mee ngei kolla ripi oh.

³Muihla na nangeita akha chakka amha rang adai tihana hup ah si ha chatno rang narat shukka ae oh.

⁴Pumko akha chak ae, akha chu muihla ko akha chak ae, Chungthiengna nangta lunghal akha chak ah amranga kokpur so ae.

⁵Arengpu ko akha chak ae, ngoirengko akha chak ae, baptias kom akha chak sa ae.

⁶Meelimpa Chungthieng akha chu mapa ko chang Arengpu amona eheilimpa chunga runga an ah am ae.

⁷Ani mee akha, akha chunga Khrista na pekphung shuk kutthul ha pepi so ae.

⁸Athieng abai sunga rilhekta, “Amona achungting ah kalyui ah mant ah si mee ngei tako amona ruithen ae, amona meengeita kutthulko pephur-ae.”

⁹Atun, “Amona achungting kalyui ah” tihi atu rilna meh? Amona masa ah nimtekti simlei ram ah yungphur ae tina sa ae.

¹⁰Jungphur amona limpa chunga sihakta amranga wanram lim chunga kalphur amo ha sa ae.

¹¹Amo ha ae, “Mee ngeita kutthul pephur ha”; amona ahreta ahal rui changrang, ahretana rou maphu, ahretana rouril ngei changrang ahrengei tana kelmo sum akha chu chupi ang mee halphur ae.

¹²Chungthieng meelimna Khristen tullu ae weta Khrista pum sakranga hilim hi pe phur ae.

¹³Chuna anina lungrang akha chu ngoiring akha chak hana wa weta alin asai shuk mee changa Khrista melrung, maring chang ha pha ang ae.

¹⁴Mee ngeina alou diek lou rilweta tuiyul hekta thirangna alea ahong choirol unga ngei hektiha anichu ha ani yo ae.

¹⁵Chu ang saruk chu anina lungsi hlakweta adiek rou tonglhak ei oh, ani alu chang am Khrista lamtinga lok hangrang ae ei oh.

¹⁶Khrista na ani ka jatlim ma am ang phung shuk anu yui ah yumpi ae, chuna ka jatlimna ae phung shuk ma ae ma ae ang tulluha lu jui ah pumna lungsi athui ah lokka hang ae.

¹⁷Chuna sarukka Khrista minga nangeita keina hin inge; nangeina Khrista dangno mee ngei hekta arimsal lung songa ringno oh.

¹⁸Maniha Chungthieng yaihra pek tolno ah ahlem lungha halla eko dangno ah alung hira am ae.

¹⁹Manilimha ajak donno ah diek lou tullu lu rang mani pumha pe ae.

²⁰Khristana hita ae rang nangeita chupi phur no ae.

²¹Nangeita ma maram ah chupiphur ha theisa so ae, manuting jui mee changa Jisu kolla am adiek ha dang so chou ae.

²²Chuna, amating nangeina ringa houphur aluisa pumhei thou ah hla ah thing jou oh.

²³Nalung akha chu nalung ranglim athar ah hlong yo oh.

²⁴Akhachu Chungthieng melrung kai ah adiek akha chu athieng athar ringchang ha seng yo oh.

²⁵Lea ah murthei murthim ae no sa oh meelimna matonpi mathanrul kolla adiek rou tonghlak ka anilim hi Khrista pum akha chang so ae.

²⁶Nalung sa che halko paklam tinga thinga pak ae no oh akha chu nitak pha phao lungsa no oh.

²⁷Hrano Saitan ta amunt peno oh.

²⁸Aru thei mee na aruha channa, tullu ratta aeweta anei don shuka ah, am no ngeita samnerang ae su oh.

²⁹Meelung natrang rou rilno oh, mee na theiweta thathnum thathou shukweta ahra tullu lu numrang rou rillo.

³⁰Chungthieng muihlata olpea no oh. Maram chu muihla hina yar ah ani hi wanchung ting sanao ae ta dang ang sa ae, akha chu rangni hana anita ahup hei thou ah hla mee changpi ang ae.

³¹Ansi anda, lungsa thana, sulhlak reihlak akha chu aohlak rilhak, anar hlaklim nangei kolla am no su oh.

³²Chuna hutta nangei khale kha ringrei lungsi dang hlakka lung athar sunga, Chungthieng na Khrista yarra sanpi hekta nangeiko akhana akhata santing oh.