Read Chothe Naga EPHESIYA 6 Bible Online

EPHESIYA 6 - Chothe Naga bible

EPHESIYA 6

¹Unga ngei oh nanu napa ngei ril tronglam ha jui ou oh, Khristen akha changa hihi nangei tunluh sa ae, nahi maksa ae adiek ae phung shuk tlunluh ha.

²“Napa nanuta ayak atri oh,” tihi saro ei ah pek ahalpa rouphun ae;

³“Chuti lea chu nangeina aleiram ah hoi ah dai ah tunsotta ring pha ang ae.”

⁴Mapa manu ngei oh; nangei sanao ngeita simdai ah lungsat rang ae no oh, chuta ae ang saruk chu manita Khristen ahra lamtinga thing rang chupi takpi oh.

⁵Kor ngei oh, nangei mitputa ayak ati akha chu ahirr hitta aril jui ou oh: Khrista amota ae ing ae ta halla lung thienga ae ou oh.

⁶Mani kolla adom tuk rangchak ae nolutta Khrista kor chang ing ae ta halla Chungthieng maikunga diekka hra ah ae ou oh.

⁷Nangna meeta hlou dom nong ae, Khrista ta hlou dom ing ae ta halla ariem ariem ma ae oh.

⁸Makno oh Arengpuna kor halko kornohalko ma ae, ma ae na tullu anu jui ah ae mant ha pea ang ae.

⁹Mitpu ngei oh, nangeiko nangei kor ngei maikunga ahra lam ah thing ou oh akha chu manita anti alao ae ha chan oh. Maram chu nang akha chu nangei kor ko wanram mitpu hana ta chaksa ae, amona mee limpata akha rukta routreem ange ae.

¹⁰Atreem na changa, nangei na Arengpu itta amha ah marat ma anea yarra hana nangeiko arat shuk oh.

¹¹Hrano saitan hana alet ahong ae maitinga nangna chetta ngir nea rang Chungthieng na pek ral pun ral dir limha seng oh.

¹²Maram chu ani ae ang ralhi malmasi aring pum chunga ano ae, chuti weta hrano mitpu, aenea arat athei, athim simlei chunga am akha chu wanchung tinga hrano aenea muihla ngei chunga anina ral ae anga sa ae.

¹³Chuna sarukka atunhi Chungthieng ral pun ral dir ha seng jou oh, hrano ralha atimphao nea ranga ae ou oh.

¹⁴Chetta ngir jou oh, adiek hana konghit changa nakonga sui oh, darmochel hana natanga somjou oh,

¹⁵nakae nahuirang nakom adai pharang ahra rou ha sui thingrang ae jou oh.

¹⁶Apha chang honna ngoiring hana phoh changa choi oh nahina hrano ngeina yunna hla kanga am thalru ha mit ang ae.

¹⁷Akha chu aringketo hana lubur hekta bur oh, hana muihla na pek Chungthieng rou tong hana chamsei hekta choi oh.

¹⁸Chungthiengna sanpi ranga makolla nie weta hilim hi ae oh. Muihla na rui leilim eheilim nie oh, hina sharukka atreem am no lutta Chungthieng meelim tarangko nie pi oh.

¹⁹Keina ahra rou athuplim ha ati amno lutta rilshuk trongshuk nea rang Chungthiengna keita tongpek ha ril nea rang katarangko nie pi oh.

²⁰Keina raen inn sunga amhalko ahra rou tarang keita hla ae, hana keina lung hirra ngir ah karil phung shuk ahra rou hi suine rang katarang nie pi oh.

²¹Kalungsit kanao Taichikas, Arengpu tullu ah ngoiringa ngai makolla hei thou ah karou hi theipha ang chou ae. Amona kei alota am ah meh tihi amona rilpi ang ae.

²²Akha chu kani lim alota amsa tihi dangrang ah akha chu nangeina thathou thanum shukrang keina nangei kolla amota tirra hla ing ae.

²³Mapa Chungthieng akha chu Arengpu Jisu Khrista na Khristen ulenao limta pek adai, lungsi akha ngoiring litta munha ah amjou shu oh.

²⁴Khrista ta atreem am no lutta lungsit ngei chunga Chungthieng na yaihra pek changsu oh.