Read Chothe Naga PHILIPIYA 1 Bible Online

PHILIPIYA 1 - Chothe Naga bible

PHILIPIYA 1

¹Khrista rui Pol akha chu Timothi na Philipi ah am Khrista ta amha ngei akha chu, akoksha sunga alu chingei akha chu akoksha ngeita tullu sanna am limta,

²Ani Pa Chungthieng akha chu Reng Jisu Khrista na adai yairha pek changsu-oh.

³Nangeita kangei thei sing jui ah keina apha changhona kapa Chungthiengta dominge.

⁴Nangeilim taranga keina apha changhona ariem hitta nie ah am minge.

⁵Rouram chu arha rou tarang katullu kalu hi nangeina athou hei thou wa atunpha sanpi am chou weh.

⁶Na chunga hi arha tullu thoupi phur Chungthieng na Khrista Jisu rungni phamalim phao wa nangei ta ruipi ange ta keina Chungthieng ta ngoiring inge.

⁷Nangei ta apha changhona kalungsunga si-inge! nangei tarang ka ae limhi adieke ti hi kalunga hallinge rouram chu ka ae pha arha tullu limhi nangei na atunpha sunga keina ahong akha chu alha lim akha chu arha rou chetta amranga nangeina sampi chou-ae.

⁸Nangei ta thuka ngai-inge ta karilim hi Khrista malung sit hei thou wa shukke ti hi Chungthieng na meelung ngir sa ae.

⁹Nangei na lungshi akha chu adiek lousing louma lella sukrang keina niya aminge.

¹⁰Chuti lea chu nangeina lella ahra ha halnea Khrista rukni hana thinglou ti dieklou tiha chang ang niyowe.

¹¹Jisu Khrista hina adiek ara na nangei chung shihak ti shu oh, akha chu Chungthieng mahung majaita dom na changshu oh.

¹²U-lenao ngeiyo, Nangeita kadang pinumchu, kakolla shukka hanglim hana arha tongsan suirang ngamtinga mashon na change.

¹³Hina saruka kulnunga thonghaklim, akha chu hina amlim pana keihi Khrista rui akha chang yarra raen inn sunga am ae ti hi dangpha ae.

¹⁴Keina raen inn sunga ka amyara ulenao ngeina Khrista ta ngoiring lella manina apha changhonna ati amno lutta arha tongsan sui nea ae.

¹⁵Atuyong arhena anarra, arhena asul ahal shukrang chuti weta arhena arha lungsonga Khrista tongsan sui-ae.

¹⁶Adang ahre ngeina ahra tongsan tarang keina ngirra am meh tisarukka ahra rou hi suiye.

¹⁷Adang arhena lung thinga suino ae, keina raen inn sunga ka amleiya lella aol shukpi ranga mani tarang chakka halweta suiye.

¹⁸Adiekka suihal, diekno wa suihalko eko ollang amno ae. Nealeilim chu Khrista ahra rou sui ange, hina sarukka arieming akha chu arimang inge.

¹⁹Nangeina niekpi jara akha chu Khrista muilha na sanpi jara keita ahung hei thou wa hlapi angeta danginge.

²⁰Chuna keita athina hal, aringnahal atunako katullu ka ae hita ajak tukpi nea angno weh, keina karing changlim Khrista domange tihi kalunga kadit kahalsa ae.

²¹Maram chu ringchanghi eya meh? Kakolla chu keina karinghi Khrista sa ae. Chutiweta athi na hratekke.

²²Chutiweta ringa amlea chu lella ahra tullu lu rang sa ae, hoitingpa hallangmo kahallang dangnonge.

²³Keita lam anihina kaiya ameh keina aleiram hlaweta Khrista itta amha pana lella hratekke.

²⁴Chutiweta nangei tarang ngaileng chu keina ringa ampana ehekta hrateke.

²⁵Kei ringa ampana rhatekke tihi keina la inge, Keina ring lea chu nangei ngoiring akha chu ariem lella nangei tullu shu ange ti hi keina danginge.

²⁶Nangei kolla woiha leya kaphao jui ah Khrista kolla nangei ariem ha lellange.

²⁷Ehekta maru uichu, nangei ring changhi Khrista ahra tongsan hana adit anu jui ah ringo, keina eyonga rilhak nehalko nea nohalko nangei na lungrang akha chakka Khrista arha rou tarang ratta ral aeya chetta ngirra ameh tihi keina theipha ange.

²⁸Nangei ta anda ngeita ati no-oh, apha changhonna thanum tha thou oh hiti lea chu manina maisi pha a nangei na nea ange ti hi hallange, rouram chu nangei anea peha Chungthieng pekke.

²⁹Rouram chu Khrista amota domrang nangieta pepi-ae amota ngoiring hachak anowa matarangko aol dongrangko pesa-ae.

³⁰Atun chu kei hitta ralmunna lutha eiyo, amating thouwa atunphao sunga ral ka-ae nangei ri, ah theiya am ral ha ae-ha seiyo.