Read Chothe Naga PHILIPIYA 2 Bible Online

PHILIPIYA 2 - Chothe Naga bible

PHILIPIYA 2

¹Khrista kolla am nangei ringchangha arat changsu oh, malungshit hana nangeita ariem pisu oh. Nangei na muilha hitta amha ah akha lea akha lungsi ringrei ngai lhakke.

²Nangei na lungrang kha chakka lungsi ngai lhakka akha chu mui lha akha chakka ngaiya am ou-oh ta nie ja am minge.

³Nang nathei chak tarang halweta nathei chak lokchokta ringrang ae no oh, chuti weta nalung sunga ayak atisonga akhana akha tarang halweta adangei tana loktek ke ta hal hlak ou oh.

⁴Nadit na-aenum chak anowa adangmi ngei aenum adit hako amo.

⁵Khrista lung songhekta nangeiko nangei lunga songo:

⁶Khrista ha Chungthieng ahalko, Chungthieng singeta amona chetta kolla amanga ae tihi amona halno ae.

⁷Chuna hutta malmasi melrung laweta suuk changa ani karra risukpi ae.

⁸Amona ayak ati ah aril atrong jui lamtinga athitphao tarang thing Khross chunga amona thi ae.

⁹Hina sarukka Chungthieng amota chungtekti amunt limchunga chungtek ta domma, mee ngei lim chunga loktekti ming peso ae.

¹⁰Hana sarukka, wanramako akha chu simleiram akha chu simlei thuiya amlimna huk hruna Jisu ming mokkange.

¹¹Hana limpana phonga Jisu hi Khrista Renge ta mapa Chungthieng malok masei ha phu ange.

¹²Hina sarukka, kalungsit tonpi ngeiyo, nangei hitta amha leiya karil nangei yuita lella atun nangei kolla aram la ah amlei ating karil nangeina yuitek kou oh, nangeina ati ahir hitta munha ah nangei aring keto ha chetta choirang hutna oh.

¹³Maram chu, Chungthieng na apha chang honna mahal akha chu maning ha nangeina ariema jui ah ae nea rang nangei sunga tullu lu ah am ae.

¹⁴Eheilima yetlhak worlhak amno lutta ae oh.

¹⁵Hati lechu nangei hata amut akha chu pakna si simlei chunga ringa am kara athieng akha chu rakitpha Chungthieng sanao ngei ae ta dang pha ange. Nangeina mani karra awan arsi hekta war oh.

¹⁶Manita aring tongsan napekleiya, nangeina hata ae lea chu, keina karat choi sukka ka ae tullu lim amang amno ae tihi Khrista rukni hana nangei jara kalok na nei ange.

¹⁷Eyonga kathee hina akat ranga saiphung chunga bun lea chu nangei ngoiringha Chungthieng kolla akat chang so weh, chuta ae lea chu, kei arieminge akha chu nangei lim hitta ariemha inge.

¹⁸Chuhekta nangei ko ariem mange akha chu nangei ariemha kakolla ko pha ange.

¹⁹Eyongpa nahi reng angaipi ah lea chu keina Timothita nangei kolla anatta hla-tikketa hallinge, hatiyuiya nangeirou theiyuiya keina thanum shukange.

²⁰Amo hi chakke kalung kahal dang akha chu nangei tarang routakka ngai ah amko am ae.

²¹Meelim ngeichu mani hratrang chak halle, Jisu Khrista tarang halno ae.

²²Amole keina mapa asanao kaiya munha ah arha rou taranga tullu ae ha ah nangei na ko dangpha angchou ae.

²³Kaning kolla shuka am hina sarukka keina amota ngai lea chu ranga nangei amna ah hla tikketa hal aminge.

²⁴Kei katakmakko nangei amna munna wane-ange ta Rengta ngoiring inge.

²⁵Kei hitta tullu ronha am, ralmee changha am, akha chu nangei kolla rou ronna am, keita tullu dom ha am Epaphroditas tako nangei kolla hla tikketa kalung ranga aminge.

²⁶Amonako nangei limta ehekta ri lhaknume, akha chu nangeina amohi atak hoino ae ta theiphurha amoko alung ol lea.

²⁷Routakka amohi thi angsamta naphure, chuti weta Chungthieng na amota lungsi ngaipi ae, amota chako ano ae keita aol chunga aol lolnorang ngaipi ae.

²⁸Reng kolla uleanao hekta ngaiya amota ariemma lapi oh, amo hekti meelim ngeitako ajak atiha muh au oh.

²⁹Arengpu minga ariem ma amo ta riemtukpi oh.

³⁰Maram chu amona nangei ae nea no Khrista tullu taranga maring chang athi ang phao ati amnoa keita san nea.