Read Chothe Naga PHILIPIYA 3 Bible Online

PHILIPIYA 3 - Chothe Naga bible

PHILIPIYA 3

¹Atreem na changa, ka-u kanoo ngeiyo, Reng kolla ariem ou oh ka jiek sa lea lea ah ka-jiekhi kakolla akai eko amno ae, hita ka ae hina nangei kolla lel lating arhatrang sa ae.

²Hralou tullu ae ngei ha cheksillo, hana ui ngeiha, ta kom cheksilla, asartan ngei ta kom chekshillo.

³Adiekka asartan ngei chu ani sa ae, mani ano ae, maram chu muilha jara anina Chungthiengta mokke akha chu Khrista hitta amha ah ringchang ariem tukke awao ah chak asartan hana ngoiring rang amno ae.

⁴Awao ah ae hachak ngoiringei tihalko, kei nea inge, atuyong na awao chak ngoiringei tihalko keina lel tekinge.

⁵Keita donsu rukni naritta asartanne, Isarel jati ah doninge, Benjamin sakai inge, athing hibru athi inge, Jihudi rouphun yui mee halle chu kei Pharisi inge.

⁶Darmo tinga lunglut hallechu kei keina akoksha ngeita phit rei inge rouphun ri yuiweta darmo chelle ta lale chu kei karal eko am nonge.

⁷Hilim hita ae weta kana ae ta kahalha, atunchu Khrista jara aek hekta hal singe.

⁸Keina Khrista amota kapharanga eheilim chunga Karengpu Khristana lel tek ae ta hiyongpa awao ah shuk tullu lim hi keina arimpasa ae ta ripta yunna housinge.

⁹Khrista kolla ripta peya amno ah chu keina rouphun ril yuiweta darmochel ringchang phane nonge, ngoiring tihita beiweta Khrista amota ngoiringa Chungthieng kolhei thouwa darmochel ha keina phasinge.

¹⁰Eheilim chunga kaditchu Khrista amota dangeveta akha chu athi hei thouwa ringne arat, ma aol manat ha dongingeta mathit hekta thi keina di inge.

¹¹Hiti lea chu kei katak makko athi hei thou aring pha ang inge.

¹²Keina thangsuk maipak phasinge akha chu eheilima rakit phasinge ta rilla ah nonge. Khrista na keita mataranga halpi anu jui ah keina ae mant pharang hutna inge.

¹³Ulenao ngeiyo keina ripta nesinge ti ano ae, keina ka ae amchu athing saha kanutinga yunna houingeta amaiting am hata karat shukka yulla aminge.

¹⁴Chuna keina achung tinga ringchang ha Khrista jara, Chungthieng akok anu jui ah ae mant pharang akha chu lam tungrang amunt ha pharang kei na lam tieng tan inge.

¹⁵Muilha na sisa anilimna lungrang akha chaka songha eiyo. Chutiweta atuyong pana adang lungrang songle chu Chungthieng na nangeita thinga ripisu oh.

¹⁶Anina athou hei thouwa thing am lam anu jui ah maitinga sonna thingeiyo.

¹⁷Ulenao ngeiyo ka ae anu yuiyo, nangei ko ae oh, kani na nangeita api hekta ae mee ngei ta kom hra bak ta an pi oh.

¹⁸Keina nangeita amatinga lea lea karilsa sa ae, atunko lesira kamit tui tulla rillinge; atuyong mee ngeichu mani ringchangha na Khrista na Khross chunga thitpiha anda ae.

¹⁹Maniha sarmei hura mani ringchang atreem na chang ange, maram chu mani hlawang chu mani pumna dit ha ae. Manina ajak tuk pharang hana chaothuk ka ameh, akha chu manina aleiram hina am potlim tarang chak halle.

²⁰Ani chu wanram mee ngei sa ae anina anita sanpipa Arengpu Jisu Khrista na wanram heithou wa yung angha tuiral wontam hekta hakka am ae.

²¹Amona asul akha chu thi ang ani pumhi atreem amlou arat ae nea na si matak hekta wulpi ange, hiyongpa marat thuiya eheilima si ange.