Read Chothe Naga PHILIPIYA 4 Bible Online

PHILIPIYA 4 - Chothe Naga bible

PHILIPIYA 4

¹Chuna sarukka kalungsit ka-u-kanao ngei oh nangeita lungsi inge, akha chu nangeita rinum inge, nangeina keita ariempi ae hina sarukka keina nangei maramma lok chok ti inge, hina sarukka Khrista kolla nangei na chetta ngiro, kalungsit kau kanao ngeiyo.

²Eyodia lea Sintuki Khrista minga lungrang akha chakka amranga nanui limta rillinge,

³Kei itta tullu ronha nangei nako hi namei ngei hita sanpi oh, maram chu manina Klemen akha chu kei itta ratta tullu ae ha Chungthieng abai sunga ming jiekka si manilim tolla arha tongsan suirang tullu lu ha am ae.

⁴Nangeina Khrista kolla am ah ariem ou oh woihako lesira rillinge ariem ou oh.

⁵Meelim kolla lungnem ma ngailhak ou oh, Rengha ranga yung ang so ae.

⁶Eheilim taranga nalung ol no oh apha changhonna lungsunga ariem adomna si ah nangei awat lim Chungthieng kolla nie oh.

⁷Hana malmasi na dang phane no Chungthieng adai hana nalung akha chu lung ranglim Khrista kolla suino ngamno lutta ampiange.

⁸Ulenao ngei oh atreem na changa, nangei lunghi mee na adom rangna si ah ampi oh, tichu, adiek, alunglok, arha, athieng, lungsi akha chu ajak ati ya ngai hina si ah am oh.

⁹Kaning kolla hei thou wa nangei chu akha chu katongsan, katullu ka ae limhi nangei ae ou oh. Hana anita adai pe Chungthieng na apha changhon nangei chunga amsu oh.

¹⁰Karing chang hina Khrista kolla amha ae ehekta arieminge maram chu nangeina keita ansirang apha ha waso ae, nangeina keita chu makso chou ae ta rilla nonge, apha ha nangeina phano ah sa ae.

¹¹Keina awat amsinge ta rilla nonge, keina ka am kadonte hina ahopnai tihi amrang chuphur singe.

¹²Atomte ah amrangko keina dang inge, atam ma am rangko dang inge, hiyong athuk alu hi keina chuphur singe, chuna eyong jui apha ah wontam hal won hophal, atomte amhal atampanu amhal keina apel ahop nai inge.

¹³Khrista na keita arat pek jara hiyongpa shuk jui ah keina maitukne inge.

¹⁴Chutiweta ka ol jui ah nangei sanhi nangei ninga arha ae.

¹⁵Nangei Philipi ngei oh amating apha hana arha tongsan suiranga Mesedoniya lhaphura kathinglei ah nangei ano ah atuting akok ngeinako keita sanpi am no ae tihi nangei nako rhabakta dangha sa ae.

¹⁶Thesolonikiya ah darkar ka am leiko nangei na awat limha thunna lha phur chou ae.

¹⁷Keina nangei pekchak langnum ah no ae, nangei sum hou ah lella tam tek rang sha ae.

¹⁸Nangeina kawatlim samrangta lella keina nangei kolla thouwa phasinge. Epaphroditas kolla ka darkarta lella nangei pek lha ha phasinge hilimhi Chungthieng na angei, ahop akha chu ariem hoi akat pot hekti sa ae.

¹⁹Kapa Chungthieng kolla awat amlou manei madon hana nangei awat limha pepi ange.

²⁰Ani Apa Chungthieng ha atreem naino lutta loktek seitek changsu oh. Amen.

²¹Kei itta amha ulenao ngeina Khrista Jisu kolla am Chungthieng mee ngeita ariem tongsan lanne.

²²Hina am Chungthieng mee limna akha chu kolnunga am ngeinako ariem tonsang lanna hla ae.

²³Arengpu Jisu Khrista lungshit ha nangeilim chunga amsu oh.