Read Chothe Naga KOLOSIYA 1 Bible Online

KOLOSIYA 1 - Chothe Naga bible

KOLOSIYA 1

¹Chungthieng hina ahal Khrista Jisu na ahalsa rui Pol akha chu uleanao Timothi kolhai thou wa.

²Khrista minga ngoiring uleanao Kolosiya ah am Chungthieng mee ngei: Pa Chungthieng na lungshi adai pe shu oh nangei chunga.

³Nangei taranga kani niek changhonna arengpu Jisu Khrista mapa Chungthieng ta dom munge.

⁴Khrista Jisu ta nangei ngoiring kani thei juija akha chu Chungthieng mee ngeita nangei lungshit ha.

⁵Nangei kolla masha ah ahra tronglam adiek rou tunga lungrang hi nangei taranga ae ta theipha saruk jarhana nangei lungshit akha chu ngoiring hi wanram ma shi lungrang hana ringa am meh.

⁶Chuna ahra tronglam na jaihra pe ah akha chu simlei su wa jaihra ronphao na ahul tunga thange, Chungthieng na adiek takka lungshit hi nangei kolla akha chu nangeina masha theipha rungnie ah dang hek ti ae.

⁷Tullu ah ngoiring chet akha chu kani hutta Khrista tullu lu ah am lungshit shuh tonpi Epaphras kolla nahi nangei na chu oh.

⁸Muihla hana jarra nangei lungshit ha amo na kani ta dangpi so ae.

⁹Hina sarukka kani na nangei rou thei nie rungnie hai thou wa apha changhon kani niek na makno wa amunge kani na Chungthieng kolla niek chu, muihla na pek lungsing lungwar akha chu lunghal thei na nangei lungshi na shi shu oh.

¹⁰Chuna jarra nangei na arengpu ditta ringa am nea ange akha chu apha chang honna na ringchang na ahra tullu lim shukkange hana Chungthieng lungwar hita munt ha ah lokka hang nea ang.

¹¹Mahung majaitha haithou wa phao arat hana nangei ta rat pi shu oh, chuna nangei na aol ana lim ha dong nea ang chau ae.

¹²Akha chu Pathieng ta ariemma dom maou oh. amona nangei taranga awat am no lutta tum halla shi ae awan rengram hana Chungthieng mamee ngei taranga.

¹³Amo na athieng jaitha hai thou wa anita san na, rui ah alungshit asanaopa reng ramma tungpi ae.

¹⁴Makhol hai thou wa anita hlapi ae tichu ani pak lim pa kom silpi so ae.

¹⁵Khrista mita ri nea lou Chungthieng amel ae. Ashem phur lim chunga chungtekti masha don asanao pa ae.

¹⁶Chuna sarukka makol hai thou wa Chungthieng na thangwan akha chu aleiram eheilim semso ae mita rilou akha chu mitta ri hana ane angam rourilne ngei lea mitpu, ashuk limpa Chungthieng na simlei chunga am lim hi majarra akha chu mataranga semphur so ae.

¹⁷Amo chu eheilim matienga am phur so ae chuna eheilimpa ha amo hita am ha ae.

¹⁸Amo chu ahalsha ngei hina alu ae, amo hi ahalsa meengei ringchang athou na ae hana amo hi masha don sanaopa ae amona athi hai thou wa ringthouna chu eheilim amunt na masha ah mapha rang sa ae.

¹⁹Nahi Chungthieng mathei chakka malungir sa ae ha chu asanao pa chunga Chungthieng amo mak hina awong na shihakti ae.

²⁰Chungthieng nalungir so ae asanao pa jarra simlei chung limpa hi makolla rui lea ange. Asanao pa na khross chunga thit jarra Chungthieng adai sem so ae chuna amona aleiram akha chu wanram eheilim ha makolla rui lea nea so ae.

²¹Apha akha nangei aram lah ah am phur ae Chungthieng kol hai thou wa akha chu nangei lunghal lea nangei tullu na amota anda mee changphur ae.

²²Chuti weta atun chu asanao pa na pum ma thit na jarra Chungthieng namai kunga nangei ta thienga akha chu amut am lou, arillang sum, la nangei ta atonpi wulpi so ae.

²³Chuna sarukka nangei hi ngoiring atreem am no wa akha chu kae to na amunt shakka am rang hana nangei na ahra tronglam theipha lei ah nangei lung don hata ling no am rang natakna dango. Na ahra tronglam hina tarang sarukka ae. Pol kei na suuk changa ka am hi, chuna na ahra tronglam hi simlei chung malmashi lim ta rousam ma am meh.

²⁴Nangei taranga ka-ol ha atun chu kei leima ariem minge Khrista na mapum tichu ahalsa taranga aol dong awat ha katakka aol ana hana keina nangei ta ripta san na chang sange.

²⁵Hana Chungthieng na keita ahalsa ngei suuk taranga sem so ae keita arit tullu pek ka shi hi nangei na ahra tullu lu rang sa ae. Na arit tullu hi chu marou lim hi rilla rollang nga ae.

²⁶Malmashi lim kol hai thou wa akum ahla eja aru wa thuppa shi ha atun chu mamee ngei ta ripi so ae.

²⁷Chungthieng na mahal chu nahi ae; mamee ngei ta aru wa mathuppa mashi hi dangpinum chu, thuppa shi ahung ajai hi malmashi lim tarange akha chu thuppa shi ha nahi ae ha chu Khrista ha nangei sunga am meh hina ril na chu nangei na Chungthieng hina ahung ajai tum pha tollange.

²⁸Chuna kani na malmashi lim ta Khrista rou hi sui unge hana meelim chang honna chupi takpi ah mani ae no rang kom ril unge mee akha, akha na Khrista kolla rakit pha ah akha chu Chungthieng am na pha nea rang lungsin lungwar hitta chupi unge.

²⁹Nahi pha ranga keina aol ana donga ratta hot na inge Khrista na pek jaitha pek hana tullu lu inge.