Read Chothe Naga KOLOSIYA 4 Bible Online

KOLOSIYA 4 - Chothe Naga bible

KOLOSIYA 4

¹Mitpu, ngei oh, nakor ngeita nathing nahong ha ei chang eiwoi nei no oh, rouram chu angei thei oh nangkom namitpu akha am meh wanram ma.

²Nalung lutta nie ah naniek jui ja. Chungthieng ta ariem ma dommo.

³Hi, hitta mun ha ah kani taranga kom nie pi oh, chuna jarra Chungthieng na kani ta apha ahra pepi ah Khrista ahra athup marou ril shuk rang apha, pha tukkae hana sarukka ae atun keina raen inn ka am hi ae.

⁴Aniek hana jarra kei na ejongpa rilphung shuk mak hata thienga ril nea ranga.

⁵Ngoiring no ngei maikunga nangei athing ahong ha lungsing ngo. Chuna nangei na tancha ahra pha ta lou chu nahana ahra shukpi oh.

⁶Narou ril chang honna ahoi than num thathou rang rillo, hana meelim na rousai ha alo ta adiek rou sang anga meh ti ha kom dango.

⁷Ani lungshit ulea nao Tykikas ngoiringa ngei tullu lu akha chu arengpu matullu ah ani tonpi shuk amo na nangei kolla karou thar hi takpi ange.

⁸Chuna taranga ae kei na nangei kolla amota kahla hi, kani hi alo ta am sha hana nangei na dang lea chu nangei lung kom amona thanum thathou pi ange.

⁹Amo hita mun ha ah Onesimus lungshit ngoiringa ngei uleanao nangei jaty, mani na hina shukka am eheilim pa ha rilpi ange.

¹⁰Kei hitta raen inn sunga am ha Aristarkas na kom nangei ta riemtuk pe ah hla ae, hana Barnabas mapate sanao Mak, nangei kolla chupi takpi sa so ae ejonga (Mak na nangei kolla tung lea amota hrabakta akha chu ariem ma lah pi oh.)

¹¹Justus ta kom kok hlak Joshua nakom riemtuk pe ae Chungthieng rengram taranga kei hitta tullu lu ha am Jihudi sanao ngoiring inthum mani chakkae hana mani na kom kei ta lok ka san na am meh.

¹²Khrista Jisu shuk nangei jaty Epaphras tonpi na kom riemtuk pe ah am ae. Amona apha chonghonna nangei na lungir ra am ranga Chungthieng kolla nie ah am meh, hana chakno wa Chungthieng ahalla hrabakka thing nea rang akha chu lungkim ah rakhit pha am rang kom.

¹³Hierapolis akha chu Laodiceah ah am malmashi ngei hana nangei taranga alung lutta matullu ha lu hi kei katak na amota hrabak ta dang singe.

¹⁴Ani Lungshit Doctor Luk hana Demas mani na kom riemtuk pe ah am meh.

¹⁵Nympha inn na ani tukhlak akok sha ngei lea Laodicea ulea nao ngei ta kani ariem na riemtuk hi pe pi oh.

¹⁶Na trongleng hi napat su len mak no oh de Laodicea ah akoksha ngei ta kom dangpi oh, hana uieanao Laodicea ngei tah kom nangna pat rang ae oh.

¹⁷Hana Arkippas kolla kom ril pi oh, “Arengpu matullu ah amota pek ha asu ranga ae shu oh.”

¹⁸Pol kakol hai thou wa riemtuk hi kei kakut makka na trongleng hi jiekka am minge kei hi mee na huppa shi ae makno oh! Chungthieng lungshit na nangei chunga am shu oh deh.