Read Chothe Naga 1 THESOLONIKIYA 1 Bible Online

1 THESOLONIKIYA 1 - Chothe Naga bible

1 THESOLONIKIYA 1

¹Pol, Sailas, akha chu Timothi hai thou wa Thesolonikiya ah am abom nangei ta Pa Chungthieng akha chu arengpu Jisu Khrista hina lungshit akha chu adai nangei kolla am shu oh.

²Nangei sarukka apha chang honna Chungthieng ta riemma dom munge, hana kani niekjuija kom nangei ta angei thei unge.

³Pa Chungthieng maikunga kanina nangei ta angei thei chu, nangei na ngoiring hi alo ta tullu changa lu sha, nangei lungshit na alota tullu ratta lu nea sha, akha chu Arengpu Jisu Khrista kolla ah ta nangei lungrang hi eja chetta am sha.

⁴Uleanao ngei oh, Chungthieng na nangei ta lungshit akha chu mataranga nangei hi ahalsa so ae tihi kani na dang unge.

⁵Chuna nangei taranga kani na ahra tronglam hi echam chamma rou ha chak ronna phao nonge muihla athieng hana jaitha akha chu adiek hata danga phao unge kani hi nangei hitta am ha sou chu alota ringa am sa nangei na dang ange nalim hi nangei ahrat rang chak sha ae.

⁶Nangei na kani akha chu arengpu awong la oh; aol ana pha hal kom ariem nea chau ae, na ha chu muihla athieng kol hai thou phao sa ae.

⁷Chuna nangei hi Mesedoniya akha chu Akaiah ngoiringei mai ah chu rang awong chango.

⁸Chungthieng kolla nangei ngoiring hi Mesedoniya akha chu Akaiah ram chak no wa amunt chang honna thang so ae. Chuna hana taranga kani rillang am no ae.

⁹Hana malmashi lim na nangei kolla kani tung ja nangei na ariem ma lapi maramma ril hlakkae, akha chu alo ta nangei na kutta sem hlawang hai thou Chungthieng kolla lea ah adiek akha chu aring Chungthieng ta domma meh.

¹⁰Akha chu Chungthieng malungshat tang hai thou anita sanpi athi hai thou wa maringpi masanao Jisu wanram ma thou majung ang hakka nangei am ha.