Read Chothe Naga 1 THESOLONIKIYA 5 Bible Online

1 THESOLONIKIYA 5 - Chothe Naga bible

1 THESOLONIKIYA 5

¹Ulea nao ngei oh hajong rungnie akha chu apha hi kani na nangei ta jiekka hla rang darkar am no ae.

²Rouram chu nangei na hrabak ta dange ha chu arengpu majung ang rungnie chu aru thei pa na jantienga phao hek ti ae.

³Meengei ngei na hita rillea, “Eheilim pa hi dai so akha chu hra so weh” hana edang, dang no wa mani chunga pha so ae! Naoron namei na nao don nang aol hata hlik nea no hekti ae.

⁴Chuti weta uleanao ngei oh, nangei chu athiem ma am no chou ae, niesoun na awar ra aru pa na nangei ta angak shuk pi no shu oh.

⁵Nangei lim hi awar sanao ae hana niesoun sanao chak sha ae. Ani hi jantieng athiem sanao no ae.

⁶Chuna ani na jalla am mani hekti no ei oh ani na maranga am ei oh.

⁷Rouram chu jalla am amo na janna jalla sha ae, hana await ngei na jantienga rui ah sha ae.

⁸Chuti weta ani chu niesoun sanao sou chu ani na lungsinga am mei oh lungshi lea ngoiring na pho shakka akha chu aring kaeto na lung denna lubur shakka shi ei oh.

⁹Rouram chu Chungthieng na lungshat ranga anita halla no ae. Chutiweta Jisu Khrista hei thou wa aring kaeto pha rang nga sa ae.

¹⁰Amo na ani taranga thi pi so ae chuna ani na thi hal ringhal ani hi amo hitta ring ha anga ae.

¹¹Chuna nangei akha lea akha thanum thathou hlakko akha chu, akha lea akha san hlakko, atun na nangei ae am hi hekta.

¹²Uleanao ngei oh, nangei kolla kani na rilla am unge, nangei karra tullu lu am mee ta ajak ati oh, amo na lamkai ah Khrista ringchang tarang chupi takpi ah am sha ae.

¹³Mani tullu hana jarra mani ta lungshi ah chungtekta dom mo akha lea akha dai ah ring ha oh.

¹⁴Hana uleanao ngei oh kani na rilla am munge ha chu atal adol ngeita kom tri pi oh, ajak rat ngei ta kom thathou pi oh, ashul ana ngei takom sanpi oh, meelim hitta adong thei ha oh.

¹⁵Nahi makno oh, atu akha na kom aral taranga aral tullu lu no shu oh, hana akha na akhata apha chang honna ringrei ngeihlak shu oh. Chutiweta apha chang honna akha lea akha akha chu mee limpa nou ahra tullu lu rang denno.

¹⁶Apha chang honna ariem mo.

¹⁷Atreem am no lutta nie oh.

¹⁸Ehei lim chang honna domna shi oh. Nahi Khrista Jisu kolla nangei taranga Chungthieng mahal ae.

¹⁹Muihla athieng ta thinga shi no oh.

²⁰Muihla athieng rou ta ngeinum no ae no oh.

²¹Eheilimpa ta chang anno, hana ahra hata chetta kollo.

²²Hrano eheilim ta junna hou wo.

²³Anita adai pe Chungthieng amo na napum namuihla lim pa ta athieng changpi shu oh hrano lim hai thou wa arengpu Jisu Khrista majungnie rungni phao sunga.

²⁴Nangei ta kok amo na ae ange rouram chu amo hi ngoiringa ngei sha ae.

²⁵Kani taranga kom nie pi oh ulea nao ngei oh.

²⁶Ngoiring lim ta riemtuk pea ah uleanao hekta chup hlakko.

²⁷Keina Arengpu angei nujuija nangei limta mokka aminge ngoiring mee lim ngei maikunga na trongleng hi pa pi oh.

²⁸Ani Arengpu Khrista Jisu hina lungshit na nangei hitta am ha shu oh.