Read Chothe Naga 2 THESOLONIKIYA 2 Bible Online

2 THESOLONIKIYA 2 - Chothe Naga bible

2 THESOLONIKIYA 2

¹Arengpu Khrista jung ang hina rouram ma akha chu ani na makolla rachun nang hi kani na ulea nao nangei ta hlem ma am munge.

²Arengpu Jisu rungnie hi tung so ae ta nangei lung sunga olla akha chu lungrang shukthei no wa am no oh, ejong kani jiekka hla rouram ma hal kom hana chupi takpi hina kom.

³Atu jong akha na nangei ta ejongpa akha tieng hal kom hungpher no shu oh rouram chu anda mee na akha chu hrano mee sarmei kum ma luttangei na shuk malim ma arengpu rungnie ha tung ang no ae.

⁴Amo ha chu mathei chakka dom ma meelim na mok hlawang lim chunga chungtek ti ange, hana amona Chungthieng athieng inn sunga phao lutta onga mathei chakka kei hi Chungthieng inge ta rillange.

⁵Nangei na angei thei no wa chao meh, keina nangei hitta ka-am ha lei ah na lim pa hi karil sha so ae?

⁶Atun phao sunga chu shukkang hi ejong akha na thinga am hi, dang pha ange nangei na kom, mapha ha pha yuija chu hrano na mamel ri pi ange.

⁷Hrano athup matullu ha lu ah am meh; chuti weta shukkang am ha choija ampa hana hla malim ma shukkang no ae.

⁸Hana hrano paha shukkange, chuti weta areng Jisu na jungjuija am na mahuk thal hana thattange akha chu made mawar hana amota amang atah shukpi ange.

⁹Saitan hina yaitha jarra hrano pana diek lou angakpi anealah adang, adang ri pi ange.

¹⁰Amang angei ta hrano hanna jat jat hrano eja hita hungpher ange. Chuna mani na amang tah ae rouram chu mani na adiek akha chu lungshi ta ngei num no ae.

¹¹Hina sharukka Chungthieng na ehekta jaitha am hrano hla pi ange, mani karra tullu lu ranga. Chutilea chu mani na dieklou hrano tullu lu ti hi ngoiring ranga.

¹²Hina amant chu adiek hata ngoiring no wa pak ariem ahoi hata di lim pa chunga aol pha ange.

¹³Arengpu lungshit uleanao ngei oh nangei sharukka kani hi apha chang honna Chungthieng ta dom manga ae. Rouram chu Chungthieng muihla athieng na nangei ta masha ah shilpi hana akha chu adiek hata ngoiring lim pa na aring kea to pha rang hal pi so weh.

¹⁴Kani na nangei kolla ahra tronglam pek hana jarra amo na nangei ta kok so ae ha chu ani arengpu Jisu Khrista hina mahung majai ha pha ranga.

¹⁵Chuna sarukka uleanao ngei oh kani na tronglam na hal murra hal anolea trongleng na hal kani chupi takpi hi nangei na chetta kolla shi oh. p

¹⁶Ani Rengpu Jisu Khrista matak mak akha chu ani ta ahra lungrang pe ah thanum thathou pi ah am ani pa Chungthieng na lungshit ringrei na.

¹⁷Thanum thathou pi shu oh nangei lung sunga akha chu nangei tullu lu na changhon na arat lol pi shu oh.