Read Chothe Naga 2 THESOLONIKIYA 3 Bible Online

2 THESOLONIKIYA 3 - Chothe Naga bible

2 THESOLONIKIYA 3

¹Atreem na ulea nao ngei oh kani taranga nie pi oh, hana jara arengpu marou hi kani na atreem am no lutta sam rol nea ange akha chu marou theipha malmashi lim na nangei hekta ajak atri shu oh.

²Hana hrano malmashi ngei kut chung hai thou wa Chungthieng na san pi ranga; rou ram chu malmashi lim na rouril hi ngoiring nea no ae.

³Chuti weta arengpu chu ngoiring ngei mee sha ae hana amo na nangei ta hrano kut chunga tul no rang san pi ange hana arat jaitha pe pi ange.

⁴Nangei ta ngoiring rang jaitha arengpu na kanita pe pi ae, akha chu kani na nangei kolla ril lim ha atreem am no lutta ae ah am mange ta ngoiring unge.

⁵Nangei chunga Chungthieng na lungshit akha chu Khrista na pek adong thei ha lella dang nea rang lam kai pi shu oh.

⁶Arengpu Jisu Khrista minga nangei kolla tronglam hi rilla am munge ulea nao atal ringchanga ringa am ngei kol hai thou wa thingo, mani ha chu chupi takpi kom jui no ngei ae.

⁷Rouram chu nangei natakmak na kani matienga alo ta jui ang meh ti ha dang sha so ae nangei hitta kani am ha lei ah kani hi adolla ring nonge.

⁸Kani na atu jong akha kolla sum pe no lutta bak inn nonge hana hutta kani na jantieng niesoun nei no wa tullu ratta ae unge chu lea chu kani na nangei atu akha kolla pot rit pe ni yo weh.

⁹Na tullu kani ae hi, kanita nangei san rang ekom am no ae ta rilla ah no ae kani nutienga jui akha changa nangei na, achu rang tullu hi kani na ae unge.

¹⁰Kani na nangei hitta am ha leija nangei kolla kani ril chak ti hi, “Atu jung akha na tullu lu num no lea chu amota bakkom bak no shu oh.”

¹¹Kani na nahi ril na rouram chu kani theipha ah nangei kar sunga dol la ring mee am meh, hana mani na tullu shal hloushulla chak am meh.

¹²Arengpu Jisu Khrista minga kani na hajong malmashi ngei ta tronglam hi rilla am munge mani ha hrabak ta ringthei ah ring shu oh, akha chu mani ring ranga tullu lu shu oh,

¹³chuna uleanao ngei oh, ahra tullu nangei ae juija ol no oh.

¹⁴Na trongleng kani na nangei kolla hla rouram hi atujung akha na chu juino kom ja ae hajong ha shuklea chu, amota mak no oh, hana makolla ephao ae no oh, chuna amo na hata ajakka am song ange.

¹⁵Chuti weta amo ta anda mee akha ae ta chu halpi no oh, chuna amota uleanao akha hekta halpi oh.

¹⁶Arengpu matak mak akha chu ani adai shuk na amo na nangei kolla adai apha chang honna akha chu alam chang honna adai pe shu oh, hana arengpu na nangei kolla am ha shu oh.

¹⁷Pol katak mak na na riemtuk trongleng hi kakut mak ka jiekka hla inge.

¹⁸Arengpu Jisu Khrista na lungshit ha nangei kolla am pi shu oh.