Read Chothe Naga 1 TIMOTHI 1 Bible Online

1 TIMOTHI 1 - Chothe Naga bible

1 TIMOTHI 1

¹Anita sanpipa Chungthieng akha chu ani lungden khrista Jisu tronglam anu juija Khrista Jisu ahalsa rui Pol kolhai thou wa.

²Ngoiring lam tienga adiek kasanao Timothi Pa Chungthieng akha chu ani arengpa Khrista Jisu lungshi ringrei akha chu adai nangta pe shu oh.

³Mesedoniya ah kathing lei ah karil chu hekta keina nanghi Ephesiya ah am pi numg minge rouram chu malmashi ahre na dieklou lamma chupi takpi ah am so ae chuna nangna mani hata chupi no rang ham thiengo.

⁴Atreem nei no nuhang pahang na arat athei akha chu hlawang ngei hana tamin tajou ha rilno shu oh, nahana akha lea akha jethlak shuhlak na sha ae nahana Chungthieng matullu ma akha chu ngoiring nalam ma ahra shukpi no ae.

⁵Natrongsan hina ril na chu athieng lungsunga thou lungshi hana athieng ahra, hrano hal nea akha chu adiek ngoiring tarang sa ae.

⁶Malmashi ahre chu nahina hai thou wa nulea ah mani thingna lam mangpi ah thinghal lungshalla am so ae.

⁷Mani na Chungthieng roukung hina ocha changnum meh, chuti weta mani atrong hlak hakom ejongpa ril na mo ae ti kom no ae hana chaknowa mani na meelung ngirra am na phao dang no ae.

⁸Ani na dange ha chu rouphun hi ehekta hra ae ani na hrabakta choi thei lea chu.

⁹Hana ani na dang ang chu rouphun lim hi ahra mee ngei taranga no ae; Chutiweta rouphun juino ngei, meethat meemant ngei hana pak chel ngei akha chu thienglou dramochel no ngei; Hana mapa ano lea manu ta that akhu chu mee that ngei taranga sem sa ae.

¹⁰Mee namei mee pashal dangno vokno karra tullu lu ah am akha chu ahra tullu hai thou wa mana no lim pa sa ae.

¹¹Na chupi limpa hi ahra tronglam shunga tukkae, hana ahra tronglam mahung majai akha chu Chungthieng jaihra hi ril shuk ranga keita pe sho ae.

¹²Ani rengpa Khrista Jisu ta keina riemma dom minge. Amo na keita jaitha happi ah matullu ae ranga mangoiring mee changpi ae.

¹³Keina amatienga amota hrano trongril akha chu ah aol ana ejakom tukpi phur inge. Chutiweta Chungthieng chu kei ta malungshit jaihra pe pi ae maram chu nalim ha ekom kadangma akha chu kangoiring no lei sha rukka sha ae.

¹⁴Ani arengpu atreem am no lungshit ha kachunga bunpi so ae akha chu Khrista Jisu hitta am ha ngoiring lea lungshi ha ani ta sha ae.

¹⁵Khrista Jisu na simlei chunga jung hi pakchel ngei ta sanpiranga ae hajong ngei kar sunga keina hella pak chellinge. Na hi ngoiring nga ngei adiek rouril sha ae.

¹⁶Chuna jarra pakchel ngei karra hella jaishi tekti kei ta malungshit pepi ae hina Jisu Khrista na adong jo no madong hi anutienga amota ngoiring ngei na samla ringchang pha ranga ngei ta muhpi nga sha ae.

¹⁷Atun chu Chungthieng amo chak kae, atreem nei no Arengpa, athi am lou, mitta rillou chuna mahung majai ta ajak atri shu oh atreem nei no wa, Amen.

¹⁸Kasanao Timothi natronglam hi nakolla shilna shinge amatienga rouril phur roungei ha, nang na hra ah ral ae rang tronglam hi ralcham shai hekta choi oh.

¹⁹Hana nangoiring lingno lutta am mo hana nalung thienga hal thei oh. Malmashi ahre na chu thienga mani lung hal thei no hana mani ngoiring ha manga thing nge.

²⁰Mani kar sunga Hymeneas lea Alexander hi aol pha ranga saitan kut chunga kei na pe singe, nahina mani na hrano tullu chan rang dangpha ange.