Read Chothe Naga 1 TIMOTHI 4 Bible Online

1 TIMOTHI 4 - Chothe Naga bible

1 TIMOTHI 4

¹Muihla na thienga ril pi na ha chu apha sotno lutta malmashi ahre na mani ngoiring hi mang shi jo weh; Chuna mani na hungthei muihla dijabol na chupi takpi ha jui ange.

²Hajong hi ahrasha lak hungthei ngei chupi takpi hana thou suksha ae, hajong ngei lunghal athi sha ae ha, thier asha takka kang ha hekti sha ae.

³Hajong mee na taichang phao diekno ae ta chupi ae akha chu abak een pot ahra bak ngei no ae ta chupi ae Chungthieng na chu na abak pot lim pa hi bak ranga semphurre ngoiring akha chu adiek donga domma nie lea chu bakshu oh.

⁴Chungthieng na shakka shi sha eheilim hi ahra chaksha ae; hana ephao ahou ang am no ae. Chutiweta eheilimpa hi riemma nie weta la ang nga ae.

⁵Rouram chu Chungthieng tronglo akha chu aniek hi na thiengpi ae.

⁶Ejong nangna uleanao ngeita hilim hi chupi takpi ta lea chu, nang hi Khrista Jisu hina ahra suuk chang ang che, nangna natak makta ngoiring na rou muihla lam tienga na pha chu hekta akha chu adiek anu jui che ae.

⁷Chungthieng tolno ulien ngei tamin tajou hai thou shukka thingo, chuna Chungthieng mee ringchanga ring nea rang ratta hotna oh.

⁸Pum hrat rang atan achom hi ahre te chu kana ae, chuti weta muihla rat rang tullu lu chu eheilim ma kana ae rouram chu atun alei ringchang lea anutienga phao ang ringchang tarang saro ei sha so ae.

⁹Na hi adiek rouril ae; Chuna eheilimpa ha alakkang chak kae akha chu ngoiring range;

¹⁰Kani na tullu ratta lu unge, rouram chu aring Chungthieng kolla kani lungrang hi shi unge. Amo ha chu meelim ta sanpipa ae akha chu amota ngoiring ngei na leltekkae.

¹¹Na ril lim hi, mani ta chupi takpi oh.

¹²Nang hi unga ae ta atu akha na kom thousha no shu oh. Chutiweta narouril jui, nasemshakka, nalungshit ngoiring akha chu atheing hana ngoiring mee ae ta mel dangpi oh.

¹³Kaphao malim ma nalung lutta rouril la chupi takpi oh.

¹⁴Rouril ngei na rilphur akha chu ulien ngeina nachunga kut shi nie rungnie ah pek nakolla am muihla tun lam ha thashi thadol am no oh,

¹⁵Nalung lutta natak na nalim hi hotna oh, natullu son limha ha meelim na ri shu oh.

¹⁶Nachupi natakpi akha chu natak makhai min na hallo, apha chang honna hitta ae oh, rouram chu ejonga nang na nahi mak ae lea chu natak mak kom hana narouril thei ngei kom sanpi pha ange.