Read Chothe Naga 1 TIMOTHI 5 Bible Online

1 TIMOTHI 5 - Chothe Naga bible

1 TIMOTHI 5

¹Apa ulien tek ngei ta trongshi ah rilno oh hana hutta chuna napa hekta hallo, hana rungthar ngei ta kom nau nanao hekta halpi oh.

²Namei ulien tek ngei ta kom nanu hekta hallo, chuna namei sanao ngei ta kom nashar nu ae ta halla thienga shi pi oh.

³Arong nu ta kom ajak atri pe oh amo chu eheilim ma athei chakkae.

⁴Chutiweta ejonga arongnu asanao atu ate am lea chu manina mani inn sunga dramo lam tienga chu thou shu oh hajong hana manu mapa akha chu mapok ngei ae na mant dang nga ae, maram chu Chungthieng na apel ha, na ha sha ae.

⁵Eheilim ma athei chaka am arongnu mataranga atu akha am no amo na Chungthieng kolla lung donna shi jouweta asoun ajan nei no lutta amota san rang nie ah am shu oh.

⁶Chutiweta atujong arongnu amo na mathei chakka ariem ahoi dija rollea chu ringa am hal amo ha chu athi sha ae.

⁷Nahi manita chupi takpi oh chu lea chu atu akha na manita aral tuk ang no ae.

⁸Chutiweta ejonga atu akha na mani uleanao ngei taranga thousa pi no lea hella ma inn sung mee mak ngei ta an pi no ae lea amona ngoiring ha ngeino ae akha chu amo ha ngoiringno mee ta hella sha thi mee ae.

⁹Arongnu namei akha na akum somruk hella thingma lim chu arong namei ngei karra arong ae ta tel then no oh. Rouram chu namei nu ha woiha chak lim meh mataichang.

¹⁰Ahra matullu hana taranga ehekta mee na amel dang namei nu hana unga ngei ta jokko mahangna, mee ta bakpi een pi thei mati na, hulang phao mee amona akae shilpi na akha chu aol ana eja ta santhinga matak mak na ahra eheilim tullu taranga alung lut te.

¹¹Chuna naopong arong ngeita arong ngei karra mashing tel no oh; rouram chu ejonga mani na lea ah tai changnum juija mani ha Khrista kol hai thou wa alah ah thingange.

¹²Chuna mani na masha ah saro ei hana sarukka mani ha amaral am mee change.

¹³Hana chakno wa mani na adolla inn lam chang honna thing, thingweta ariemshal meetrong tronga rolla ngamshal hloushal hekta rol lea, chuna mani na hajong ae no shu oh.

¹⁴Chuna keina kadit chu naopong arong ngei hi taichang pi num minge hana asanao pha ah akha chu inn sung hra bak ta semshu oh akha chu ani ta anda hrano ngei na hra no tullu taranga talcha lah nea ang no ae.

¹⁵Routakka chu arong namei ahre chu lung lea ah saitan nu jui mee am so ae.

¹⁶Chuna ha ajong atujong ngoiring arong namei akha inn sunga am lea chu amona mani ta san shu oh, hana abom mee ngei ta pot rit ron pi no shu oh, chulea chu abom na atujong arongnu madarkar am juija san nea ange thienga.

¹⁷Atu mo lamkai ahra tullu lu amo ha ta chu nolla nolla ajak atri pe anga ae, hella chupi takpi ah rouril rol amo hata.

¹⁸Jieksha rouna rillea, “loupokka tullu lu ah am shiellapa mur huppa shi no oh,” “Tullu lu ah am mee na mapha phung shukha pha shu oh.”

¹⁹Lamkai ah am mee ta aral pe no oh meering anie hella rou takkae ta ril mee am no lea chu.

²⁰Pak tullu lu mee ta meelim maikunga ran no, chu lea chu adang ngei na rimma ati ange.

²¹Chungthieng maikung hana Khrista Jisu akha chu athieng wanrui minga keina nakolla hrabakta chupi takpi hi jui ranga akha chu eichang eiwui am no lutta natullu changhonna hrat ranga kokkinge.

²²Arengpu tullu taranga ti hal kom atu jong akha chunga nakut hang weta nie rang har hai shul no oh. Mee pak hana nangkom tol no rang ae oh; natakta thienga shi oh.

²³Tuidai chak een no oh na sung tah rang tuishiek ahre te een no, malunna nanat sharukka.

²⁴Malmashi ahre ngei pak chu ri pha ah mani pak hana taranga routreem maikunga tung mee sha ae; chuti weta ahre ngei pak chu anutienga ri pha ae.

²⁵Chu hekta ahra tullu ha kom ripha nea ae, rino ahre kom thuppa shi nea no ae.