Read Chothe Naga 1 TIMOTHI 6 Bible Online

1 TIMOTHI 6 - Chothe Naga bible

1 TIMOTHI 6

¹Atujong mitpu akha thuija kor changa am amona ma mamitpu ta eheilim ma ajak atri pe anga ae chulea chu atu akha na ani chupi takpi akha chu Chungthieng minga hrano rou ril nea ang no ae.

²Akha chu Khristen mitpu ta ngoiring am amo na manita hantha ah an pi no shu oh rouram chu mani ha uleanao chak sha ae. Chuna sarukka mani ha hella tieng sanhlak kanga sha ae Rouram chu mani pha na mee ngei ha ngoiring thei akha chu lungshit ngei chak sha ae chuna dom hlakka chu pi hlakka eheilim ma nangna chupi ah rouril pi oh.

³Chuna atu jongpa na adanga chupi ah akha chu ani dramo ah arengpu Jisu Khrista hina rou chupi takpi hina ngei num no wa chupi lea chu.

⁴Amo ha chu ekom dangno chouthuk mee ae hana alung sunga hrano aol kolla hana hrano chak chingna ah am meh.

⁵Hana atreem am no wa malmashi ngei hitta chak trong wuk hlakka awakhal la kom adiek ephao hal no weh. Mani na hal chu dramo jong hi achong areng rang lam ae.

⁶Routak kea, dramo na mee hata ehekta achong areng tul shukpi ae ejonga amo na madon hana ahop thei lea chu.

⁷Ani na simlei chunga ejong pa chu ronna phao ah meh? Ekom ron no ae! Ani na simlei ah echoi ah thing ang meh? Ekom am no ae.

⁸Chuna sharukka, ejonga ani na abak rang akha chu punchai dirchui am lea chu nahana ani taranga ahop ah so ae.

⁹Chuna atu jong ehekta achong di mee amo chu ahlem kut chunga tul lea akha chu amang atah shukka lungmo change.

¹⁰Chuna sharukka sum di hina eheilim ah hrano atro ae. Hana atujong ahre chu manidit hana sharukka mani ngoiring phur phao manga thinge, akha chu mani lung kui ah aol eja pha ae.

¹¹Chuna Chungthieng sanao, nang chu nalim ha tol no oh, Chungthieng mee kha changa adiek ahra, julla lungshi, ngoiring adongthei akha chu anem ha jullo.

¹²Ngoiring lamtan na narat makhai tan oh akha chu shamla ringchang ha pha ah maram chu hina taranga, nangna meelung ngir eja maikunga chetta nangoiring sharukka Chungthieng na kok phur sho ae.

¹³Ringchang eheilimpa ta pe pa Chungthieng amo na, Akha chu Pontius Pilate na Khrista Jisu ta atu meh ta dang shu takka mapak lim hra ah ril shuk ha kei na nangta rilla am minge.

¹⁴Na trongshan hi hrabakta jui ja am mo Jisu Khrista amel ri pi ang ma rungnie ha pha malim ma.

¹⁵Mamel ri pi rang rungnie ha chu Chungthieng makut chunga apha acha am meh. Amo ha chu jaihra ae hana Rengpa chunga Rengpa ae akha chu arengpu chunga arengpu ae.

¹⁶Amo chakkae thi no; Amo chu awarra am mee atu akhana ko lutwa nea no ae. Atu akha na amo ta ri pha no songe. Amota ajak ati shu oh akha chu majaitha chu atreem nei no ae. Amen.

¹⁷Na simlei chunga achong areng ngei kolla tronglam hi ril pi oh, mani ha chouthuk no shu oh, hana mani sum lea pai hina lungrang ae ah am no shu oh, chuna mani lungrang ha Chungthieng kolla shi shu oh. Amo chu ani taranga eheilim ariem ranga awat am no lutta pe nea sha ae.

¹⁸Mani ha ahra tullu lu shu oh, ahra tullu hana achong areng tul shuk weta ape adol am no wa mee adang ta kom san pi shu.

¹⁹Anutienga ringchang adiek ringchang nga chetta am rang sha rukka mani na mani taranga hajong homma shi shu oh.

²⁰Timothi, nakut chunga shil nat sha ha hrabakta am pi oh, Lungmo ngei hekta ajet rat no oh hajong ha dieklou trongwuk sha ae, “Lungshing ah no ae.”

²¹Chuna hajong ha pha ranga ahre na chu julla pha ae, hana sharukka mani na mani ngoiring na lam mang sho ae. Chungthieng lungshit nangei lim chunga am shu oh.