Read Chothe Naga 2 TIMOTHI 1 Bible Online

2 TIMOTHI 1 - Chothe Naga bible

2 TIMOTHI 1

¹Khrista Jisu hina ahalsha rui Pol Chungthieng ahal anu juija Khrista Jisu kolla saro eisha ringchang, pek chang shu oh. Khrista Jisu minga rachun na marou ril hla ha.

²Kalungshit sanao Timothi ani arengpu Khrista Jisu Pa Chungthieng kol hai thou lungshithei, ringreithei akha chu adai pe shu oh.

³Ka pi ngei kapu ngei ahekta hlou ron na am keina Chungthieng ta dom minge, kalung thienga niesoun jantieng nei no wa kaniek chang honna angai thei inge nangei ta.

⁴Namit tui tulha angaithei inge nangta ri num minge chuti leachu kalung hi ariem na shihak ti ange.

⁵Nalung thienga nangoiring ha keita angai thei pi ae, naha chu napoknu luis lea na nu Eunie kolla masha ah am ngoiring ha, chuna nakolla kom na ha am mange ta ngoiring inge.

⁶Hina sharukka keina nangta angai thei pi num minge na chunga kakut shi Chungthieng pek jaihra mang pi no oh.

⁷Chungthieng na atri rat muihla pe no ae, mapek muihla na anita arat lungshi akha chu atukta thienga shi ha shi hakta am pi ae.

⁸Chuna sha rukka ani arengpu taranga ajak no oh, ano lea Khrista sha rukka aral inn sunga am kamaram kom, Chungthieng jaitha jarra ahra tronglam hina taranga kei hitta aol dong ha ui oh.

⁹Amo na ani ta sanpi so ae, akha chu ani ta kok hi athieng ringchang am rang sha ae ani na ejongpa tullu lu na ah no ae chuti weta mathei chakka mahal akha chu malungshit jar ah sha ae. Na ma lungshit hi apha athou matieng hai thou wa Khrista Jisu jarra ani ta pe so ae.

¹⁰Atun chu anita sanpi pa Khrista Jisu jarra anita riso ae, amo na athi ta nea weta athi am lou ringchang ha ahra tronglam jarra pe so ae.

¹¹Ahra tronglam rouril ranga akha chu, chu pi ranga rui akha changa Chungthieng na kei ta hlou ron pi so ae.

¹²Hina sarukka ae keina eja ah aol ana pha inge, chu phou hal kom keina ephao ajak nonge rouram chu kei na dang inge ngoiring nga ka-am amo ha, hana rungnie ha pha malim ma keita shil nat sha ha hakpi am mange ta ngoiring inge.

¹³Nangta adiek rou kachupi lim ha chetta choi oh, Khrista Jisu kolla ngoiring lea lungshit ha apha chang honna am mo.

¹⁴Ani sunga ringa am muihla athieng arat ma nakolla kani shil nat ahra ha chetta choi pi oh.

¹⁵Asia ram sunga am mee ngei na akha chu Phygelus lea Hermogenes ngei na keita hla ah thing nge ti hi nangna dang pha che ae.

¹⁶Onesipharus ngei inn sunga arengpu lungshit am shu oh, rouram chu apha chang honna keita ariem pi ae akha chu amo na kei hi aral inn na am meh ti hi ephao ajak no ae.

¹⁷Chuna chakno wa Rom ram ma matung inn len keita matuk hlak malim ma keita jonge.

¹⁸Arengpu na malungshit ha makolla rungni hana pha shu oh! rouram chu amo na eja ah kata ranga tullu lu moti ha nang na Ephesiya ah dang ang che ae.