Read Chothe Naga 2 TIMOTHI 2 Bible Online

2 TIMOTHI 2 - Chothe Naga bible

2 TIMOTHI 2

¹Chuna, kasanao oh, Khrista Jisu kolla lungshit hana jarra ratto.

²Kakol hai thou wa nathei pha ka chupi ha hrabakta choi oh, mee atam am na ah rou hi rillo, akha chu, atu jong adang kolla chupi takpi nea ang mani kolla nahi shil na pi oh.

³Ahra Khrista Jisu ral mee hekta kani hitta aol ana dong thei oh.

⁴Ralmee atu akha na kom ralmee no hekta rol lea chu lamkai amitpu na lungpel nea ang meh.

⁵Chuna chu hekta atu jong akha na lam tan, tan tol amo hana anea na lubur pha no ae, maram chu amo hana jiekka shi rou anu jui no wa.

⁶Ratta tullu lu pa amona masha ah shang nem pha ta ae.

⁷Karou ril lim hi minna hallo, rouram chu arengpu na halim ha nangei ta halla shuk nea rang sanpi ange.

⁸David sakai sunga thou Khrista Jisu hi athi hai thou wa ring thou hi angai thei oh, na hi ae ka chupi hra tronglam.

⁹Ahra tronglam hina turang sha rukka keina thirrui sunga aol donga am minge mee hra no mee hekta, chuti weta Chungthieng rou chu thir rui na jem ma shi nea no ae.

¹⁰Chuna sharukka Chungthieng ahalsha mee ngei taranga eheilimpa hi donga am minge, chulea chu Khrista Jisu majarra mani makhai na aringkaeto pha ah samla ringchang ahoi jaihra chui ja phao ange.

¹¹Na hi adiek rou rillea: “Ejonga ani na amo hitta thi ha lea chu, ani na amo hitta ring ha sier ange.

¹²Ejonga ani na adong ratta dong thei lea chu ani kom amo hitta tullu ron ha ange. ejong ani na amo ta ngei num no lea chu amo no kom ani ta ngei num mang no ae.

¹³Ejonga ani na ngoiringa ngei mee no hal kom amo chu ha ta ngoiringa ngei mee kha changa am mange Rouram chu amo matak mak na aral am no ae.”

¹⁴Mani na apha changhonna makno shu oh rouril hana taranga mani ha ashul ahal am no shu oh ta ril pi oh, na ha na ephao ahra shuk nea ang no ae, angei ah am mee na hella amang ata shuk na sha ae.

¹⁵Chungthieng dit rang narat makhai ae oh, rouram chu Chungthieng hlouron na tullu lu mee amo na matullu hana taranga ajak rang am no ae, Chungthieng hina adiek tronglam ha diekka chupi oh.

¹⁶Ah ang lou rou trong ta tronga am ha chan jo oh, hajong trong hana Chungthieng kol haithou wa mee ngeita aram lah ah thing pi ae.

¹⁷Hojong trong hana hrano rai na pum ahui, ahui bakka wak hek ti ange hojong trong ngei karra Hymenaeus lea Philetus na chupi takpi ae.

¹⁸Adiek rou trong lam hai thou tan na thing manina hita rillea athi hai thou wa ringthou shu so ae. Chuna hina maram sharukka mani na mee ahre ngoiring ta mang pi ae.

¹⁹Chuna Chungthieng ling alung chu ephao lieng nea no ae hana chunga hitta jiekka shi ae. “Arengpu na mamee makhai ta dange.” Akha chu atujong ngei na amo hi arengpu ta ae ril shukne ha chu hrano lam hai thou wa shuk shu oh.

²⁰Hana alok inn sunga akha ah bell buhu shu ah am meh ahre na sona rupa takka sha ae ahre adang na, think takka akha chu alei takka shak kom tol ae, na lim ha ahre chu alok reen na nei ranga hana ahre na chu, mangaiya anei ranga ae.

²¹Chuna atu jong pa akha na hijong hrano tullu hai thou matak na matak ta thieng pi lea amo ha chu ajak ati mee changa mamitpu na ahra tullu lim taranga anei rha mee chang ange.

²²Naopong akha changa hrano adit apam hai thou wa tlanna thingo, hana dramochel, ngoiring, lungshi akha chu adai pha rang Rengpa ta san rang kokka am alung thieng ngei hitta tulla pha ranga hot na oh,

²³Eko dangno Lungmo ngei hitta trong wuk hlak no oh nangna dang che ae mani na atreem juija chu shulla chan ae.

²⁴Arengpu rui ngei chu shul hlak kang no sha ae, hana hutta amo chu meelim pata lungshi thei changa ahra akha chu adongthei ocha chang ang nga sha ae.

²⁵Ngai num na meengei ta kom hrabakta chupi takpi oh, ejonga Chungthieng ahal am lea chu mani kom alung hlonga adiek lam ma pha nea ang nge.

²⁶Hana chu mani kom lung rang shukha hrano chang hai thou wa lut no ah, manita mant na shi hana haithou wa mahal ha jui ah am mee ngei ha.