Read Chothe Naga 2 TIMOTHI 3 Bible Online

2 TIMOTHI 3 - Chothe Naga bible

2 TIMOTHI 3

¹Angei thei oh, atreem nie Rungnie ah alu apha am mange.

²Malmashi ngei na mataranga chak ngei ange, hopla pella lokchokna shi akha chu murthei hungthei ange, manina manu mapa ril trong jui ang no ae amant dangno akha chu dramo am mang no ae.

³Mani ha chu lungshi thei lou sanpi thei lou mee hrat no rang tullu lu ah matak na matakta harm nea no wa meethat mee mant na ahra tullu atier range.

⁴Lokchokti, hrano mee chang lut aphing aphai Chungthieng ta lungshit ang hutta simlei ariem ahoi ta hella di ang nge.

⁵Chungthieng mee hekta awau wa ahra sha ae hana majaitha ta chu ngeinum no ae hajong mee hai thou wa adanga am mo.

⁶Mani ha pakna dolla am eheilimpa di ah am ashul namei ngei inn sunga lutte.

⁷Atu motieng namei ahre na chu apha changhon na dangnum theinum meh, chuti weta mani hana adiek ha dangnum hal kom ephao wa dang pha nea no ae.

⁸Jannes lea Jambres na Moses ta anda chu hekta mani na kom adiek hata ngeinum no wa mani ta thin mo lungmo pi ah mani ha ngoiring tul shukpi no ae.

⁹Chuna mani ha chu etikkom alien ashai shukkang no ae, rouram chu mani lungmo na hi, meelim na hrabakta dangpha sha rukka hajong ha Jannes lea Jambres kolla kom shuk sha ae.

¹⁰Chuna nang chu kachupi takpi lim ha hrabakta jui ae, kashim shakkom, ka ring changa kaden, nangna dangche ae, ka ngoiring na, kadongthei, kalungshit na hi,

¹¹keita phit arei akha chu aol ana kadong, nang na dangpha ange ka pha aol ana Antioch, ka, Ikonium, ma, akha chu Lystra ah, ati pi aol ana kadong! chuti weta arengpu an nalim hai thou wa sanpi ae.

¹²Chuna atu jong meelimna Khrista Jisu hitta mun ha ah, Chungthieng minga aring ringchang ring num amo ha aol ana pha ange;

¹³Hana hrano mee, akha chu hungthei mee na hrano tienga jultekkange, mani takna takta mee nam hekta mee adang ta kom mee nam ange.

¹⁴Chutiweta nataranga chu, nangei ta chupi hekta diekka ngirra am mo ngoiring hitta mun ha ah, nang ta chupi ngeiha dang che ae.

¹⁵Hana nangna dang che ae, na naopong lei thou wa athieng rou nadanga na hang, nahana nangta lungsing shukpi akha chu lamkai ah Khrista ta ngoiring jarra samla ringchang na pha ha.

¹⁶Jieksha rou lim hi muihla thieng na hlum ma shi rou ae, chuna adiek chupi takpi rang nga kana ae, aral pata dang rang akha chu diekno hata adiekka chupi rang hana adiek ringchanga ringthei rang chupi na ae.

¹⁷Chuna sharukka Chungthieng matullu lu amo ha chu ehekta athei asing mee changa ahra eheilimpa ta ae nea chang ang nga ae.