Read Chothe Naga 2 TIMOTHI 4 Bible Online

2 TIMOTHI 4 - Chothe Naga bible

2 TIMOTHI 4

¹Khrista Jisu akha chu Chungthieng maikung anga atu na athi lea aring ta routreem ae nea ang meh, rouram chu amo na phao weta reng changa pal lange, nangta nie inge.

²Chuna tronglam suithingo mapha hal mapha no hal lungthou pi oh, ratto, akha chu thanum thathou pi oh nang na adong hit mun ha ah.

³Mee ngei na ahra chupi lam hina ngai num no rang apha ha phao ang nge. Hana mani matak na dit ocha atam rui thing weta bomtul pi ah mani chupi takpi hi meelim na kur neng trongshan ha rillange.

⁴Mani hana chu adiek rou ha thei num no wa nutieng heileh ah thing so ae. Hana mani na nulea pa innky tamin tajou hata oh lella lung lut te.

⁵Chutiweta nang chu shukka am eheilim chunga natak harm thei ang nga ae, ahra tronglam rouril akha ae ta aol ana dong thei ang nga ae, akha chu natullu lu lim ma Chungthieng rui akha ae ta ri pi oh.

⁶Katarang halea chu kapum hi katrang apha ha tung sho ae; ringchang hi hou wa thing rang apha hi ka-am na ah am sho ae.

⁷Kei chu hra tekti ahra tullu dom shu sange. Hana kalam tan ha kom tan tung shu singe, chuna chakno wa kangoiring kom lingno wa shi sange.

⁸Chuna atun chu Chungthieng routreem na adiek tullu lu ngei taranga aol mant mashi hana keita hakka am meh, na ni rungnie ah, na ha chu katarang nga chak no weh chuti weta atu jong lungshi ah namel ri rang hata hakka am mee hana taranga kom tol ae.

⁹Kakolla harra tungrang ratta tullu lu oh.

¹⁰Demas na chu simlei hita dit jarra keita hou wa thing so ae. Thesolonikiya ah kom thing sho ae Kresen Galatiya ah Taitus na Dalmatia thing so weh.

¹¹Kei lea Luk chak sho ae, chuna mak ha rui weta nang hitta phao ha oh, rou ram chu amo ha ka tullu ma kei ta leima san nea ang nge.

¹²Ephesiya ah keina Taichikas ta hla sing nge.

¹³Naphao jui ja Troas ah Karpus kolla kahouphur ka coat kom ronna phao pi oh; ka leiriek ha kom, makno tek ti rang chu shawut chunga jiek abai ha ae.

¹⁴Thier lung tullu lu pa Alexander na keita leima hrano tullu lu; chuna arengpu na ma ae na tullu nu juija machunga ae ange.

¹⁵Chuna nang na natakta hrabakta chek shillo, rouram chu amo na ani rouril hi thinga hrano shukpi ae.

¹⁶Masha ah chu atu akha na kataranga ngirra nea no wa keita hla ah thing hap so ae, Chungthieng na kom mani ta ephao masing mani chunga tel pi no ae!

¹⁷Chutiweta arengpu na ka am na am tolla keita jaitha pe pi ae chuna jarra keina ahra tronglam hi jat adang ngei kolla mupung pha ah rouril nea inge; akha chu kei hi athi pha ang hai thou wa sanpi phur ae.

¹⁸Akha chu arengpu na keita hrano eheilim hai thou wa sanpi ah mawan ram rengram ma keita rui pi ae makolla mahung majai na apha changhonna atreem alam nei no shu oh! Amen.

¹⁹Onesiphorus inn sung mee ngei, Aquila akha chu Prissilla kolla riemtuk pe ah am minge.

²⁰Korenthiya ah Erastus chu am sho ae hana Trophimus chu Miletus ah houphur singe maram chu, apum nea no sha rukka.

²¹Phalbi tung ma tienga phao rang nga hot na oh. Eubulus, Pudens, Linus, akha chu Klaudia na kom nangta riemtuk pe hla ae, hana adang Khrista minga lungshit uleanao lim ta kom pe ae.

²²Na muihla chunga arengpu na am ha shu oh. Hana apha changhonna Chungthieng ringrei theina nang hitta am ha shu oh.