Read Chothe Naga TAITAS 1 Bible Online

TAITAS 1 - Chothe Naga bible

TAITAS 1

¹Jisu Khrista ahalsha rui akha chu Chungthieng hina suuk Pol kol hai thou wa, ani dramo na chupi adiek na Chungthieng ahalsha mee ngeita lamkai rang akha chu mani ngoiring san ranga kei hi hal thukweta hla ae.

²Chungthieng chu murthui trongno weh apha hi am matienga ani ringchang taranga saro ei shu so weh shamla ringchang pha pi ranga lungrang ha.

³Chuna acha apha makka marou ngei ha amo na ripi so weh. Na hi kakolla shilna pi ah akha chu keina rou thangpi inge anita sanpi pa Chungthieng trongshan nu juija.

⁴Ani lim na ngoiring na lam ma adiek kasanao Taitas kolla keina na hi jiekka hla inge Pa Chungthieng akha anita sanpi pa Jisu Khrista na ngeita lungshi lea adai pi shu oh.

⁵Crete ah keina kahouphur chu hulok chang honna abom ulien changei ta tullu lu rang hap pi ah mani na hrabakta darkar am makhai ae ranga kachupi ha nangna mak no oh.

⁶Abom ulienchang akha changa amo ha mee rouril no mee changa tah ae amo ha namei akha hina apishal chang anga ae. Hana asanao ngei na ngoiring chet mee changa ta ae akha chu mani ha mee lim na anjui ja ramsha ngei hekti na akha chu aril jui no ngei chang no tah ae.

⁷Rouramchu abom lamkai ngei hi Chungthieng tullu ahut shil ngei ae. Amo ha mee rouril mee chang no tah ae amo na chouthuk mee chang no tah ae lungsha rat no jurui burui awet apa sumdi thumdi mee chang no tah ae.

⁸Amo chu ahra ta lungshi akha chu mee tah bakpi innpi thei akha chu matak na matak ta hrabak ta nea mee thienga ringa tah ae.

⁹Amo chu ngoiring lam ma chetta ngirra am hana ngoiring na lamma rouril hitta am ha mee changa tah ae. Nahina amo na mee adang ngei ta thanum thathou pi nea ange diekno akha chu jethlak shuhlak ngei kolla adiek chupi takpi ah ripi nea ange.

¹⁰Hajongpa ha leima tam am hom meh, hella Juda hai thou wa lunghlong ngei mani lunghal thei no lei ah mee kolla anda ah hungsha thei ngei ha.

¹¹Nahi routakka ae no ngei no akha ae hajong rou ril chan ranga rouram chu mani na enn sheng lim ta pelpino weh, manina chupi ang lou chupi sharukka, hana ajakpi sumlo thum lo tullu ma mani lu tullu ha.

¹²Mani shunga mani rouril mee akha na ril Crete mee ngei chu apha chang honna murthui ngei ae hrano ramsha ngei ae, akha chu katal ngei ae.

¹³Nahi routakkae chuna sharukka nang na mani ta warakko chulea chu mani na ngoiring chetta am mange.

¹⁴Hana chu mani na Jihudi ngei doi ei ta an num mang no ae anolea adiek rouril ngeinum no ngei rouril kom jui ang no ae.

¹⁵Athieng mee ngei taranga chu eheilim pa athieng chakkae, chuti weta amut mee taranga chu athieng ekom am no ae. Hana ngoiring nea no ae routakka chu mani lunghal akha chu lukang shung hi amut chakka ae.

¹⁶Mani na Chungthieng ta dang unge ta rillea chuti weta mani tullu chu ngai no ae. Mani ha chu aril jui no ngai akha chu atier pi mee ae chuna mani ha ahra taranga ekom rakit no weh.