Read Chothe Naga TAITAS 3 Bible Online

TAITAS 3 - Chothe Naga bible

TAITAS 3

¹Namee ngei ta angei thei pi oh, ane angam ngei thuija am rang akha chu mani ril trong jui shu oh. Hana eheilim ma ahra tullu lu rang hakka am shu oh.

²Manita rillo atu akha chunga hrano rou ril no rang. Hana lungshi hlakka dai ah am shu oh meelim maikunga ahra maishun muh hlakko.

³Rouram chu apha akha ah ani hi lungmo changa aril atrong jui no mee aral am phur ae ani hi ahra lea hrano ariem ahoi di hina suuk kor chang phurre ani ringchang hi anar hlakka mee lung mat rang tullu lu ah mee ta kom anda ah mee nakom ani ta anda ae.

⁴Chutiweta Chungthieng malungshit akha chu maringrei ngei jarra ani ta sanpi na muh ah.

⁵Amo na anita sanpi so weh. Nahi ani na ahra tullu lu na sharukka no weh, chuti weta maringrei ngei jarra amo na anita sanpi ah ae muihla athieng na anita ani ta silpi weta athar ringchang pokpi sierre.

⁶Chungthieng na ani ta sanpi Jisu Khrista mujarra muihla athieng ha ani chunga atreem am no wa bun pi ah.

⁷Chu lea chu ani hi malungshit jarra anita adiek changpi ah Chungthieng hitta am ha ah atreem nei no ringchang hina lungrang pha ah am mange.

⁸Nahi adiek rouril sha ae. Keina nahina maram ma hella rou pe num minge chulea chu Chungthieng ta ngoiring lim na akha na akha taranga ahra tullu lu ah meelim ta ranga ehekta ahra chang ange.

⁹Chuna kanano trong wukhlak no oh, ashei nuhang pahang na rourilla rouphun hina maram ma trong jet hlak no oh, maram chu nahi kanano ekom am lou tullu sha ae.

¹⁰Woiha woini rou dollo ahran akai shukpi amo ta hana hella rouril no oh ephao amo hitta ae rang am no ae.

¹¹Nang na dang ang che ae hajong mee chu amut mee ae akha chu mapak na amo hi aral am mee ae ta dang ang che ae.

¹²Keina Artemas lea Tykikas kahla juija nang na ka am na ah wak rang na nea makhai hot na oh, rouram chu phalbi hla hi Nikopolis ram ma am tik ta lungir shange

¹³Zenas ukil akha chu Apollos hina mani thing hong rang athourang darkar uite eheilim ha nangei anea makhai sanpi oh.

¹⁴Ani mee ngei na chuno ngei no ae apha chang honna ahra tullu lu weta am ti hi hana adiek darkar am mee ta sanpi rang mani ha kanano wa ringa am mee chang no shu oh.

¹⁵Kei hitta am ha lim pa na riemtuk pe ah hla ae, hana kani riemtuk te kom ani ngoiring ha tonpi thanrol ngeita pe pi oh. Chungthieng lungshit nangei lim chunga am shu oh.