Read Chothe Naga PHILIMON 1 Bible Online

PHILIMON 1 - Chothe Naga bible

PHILIMON 1

¹Jisu khrista taranga rean inn na shi Pol akha chu lungshit tonpi Timothi rel na Philimon akha chu hlou ron ha am tonpi ngei,

²hana inn na ani tukhlak ani sarnu Apphia hana ani tonpi ralmee Akhippus;

³Pa Chungthieng akha chu arengpu Jisu Khrista na adai hana lungshit pek chang shu oh.

⁴Kalungshit Philimon, ka niek chang honna nangta mak nea nonge hana Chungthieng ta ariemma dom minge.

⁵Chungthieng sanao ngei eja ta nalungshit akha chu reng Jisu kolla na ngoiringa na am ka thei pha jui.

⁶Ka niek chu ngoiring ngei kha changa mun ha ah ani bomtul ha hina anita hella halthei tek tul shukpi ange jaihra lim ha chu khrista kolla ani ringchang na am ha jarra.

⁷Ehekta kalungshit, nalungshi thei hana keita leima ariem pi ae hana ehekta keita thanum thathou pi ae! Chungthieng meelim ta ariem pi che ae.

⁸Hina taranga keina ekom atri nonge roulam chu Khrista minga nalungshit unao kha changa nangna na tullu lu phung shuklim ae oh.

⁹Nangta kalungshit jarra Khrista taranga thi ang ti lou akha chu atun kom mataranga raen-inna shi akha ah halling kom nakolla na hi rilla aminge.

¹⁰Chuna karil num rou lam chu Khrista kolla kasanao hekta kahal Onesimus taranga ae, raen inn sunga am halling kom muihla lam ma chu kei hi mapa singe.

¹¹Apha akha ah nataranga mee reem akha halko, atun chu natarang kataranga ehekta santhei chang ang so ae.

¹²Keina amota nakolla woiha lea a hla singe atun hi kalung tolla hla inge.

¹³Ahra tronglam taranga rean inn na olla ka am lei sunga keina chu amo hi kakolla am ha num minge, chu lea chu amo na na hutta keita san nange.

¹⁴Chutihal kom keina nakolla san no ngei na ae ta karillang hutta nahal nalungrang hana ae pi num minge. Chuna nangna ngainum nole keina ephao ae ang nonge.

¹⁵Onesimus na apha atan te am phur no hal kom atun ma lea sier jui hana chu apha chang honna nang hitta am ha ange.

¹⁶Chuna atun chu amo hi kor a-niyove, hana korta hella! Amo hi Khrista kolla lungshit ulea nao so ae. Kata ranga amona eja ah san nea ang sa! hana; nataranga ko hella amona san nea ange. Rengpa lungshit kor kha changa.

¹⁷Chuna keita natonpi ae ta hal ta lea chu, amo ta ariem ma riemtuk pi oh, keita ariem ma nariemtuk hekta.

¹⁸Ejonga amona nakolla diekno tullu eja lu phur hal kom ding phung eja am halkom kei nalim ha chunga tello.

¹⁹Pol keina kakut makka na hi jiekka aminge keina nalim ha lea pi ang singe. (Chuna makolla mamaral lim ha kei na lea ah nangta angei thei pi ranga ae.)

²⁰Chuna unao oh, lungshi ngai ah rengpa minga nangna san pi oh. Khrista minga uleanao kha chang hella keita ariem tul shukpi oh!

²¹Routakka na kajiek lim hi nangna ae ange ta hallinge ti chu hitta lella kom nang na ae pi che ae.

²²Hitta mun ha ah katungrang na inn sunga kot hur akha waisang pi hakko, rouram chu Chungthieng na nangei lim niek ha sang so ae ta hallinge, chuna kei na lea ah nakolla phao ange.

²³Khrista Jisu taranga kei hitta raen inna am ha Epaphras na kom nangta riemtuk pe ae.

²⁴Hana kei hitta hlou ron ha Mak, Aristarkhas, Demos akha chu Luk na kom nangei limta riemtuk pea ae.

²⁵Rengpa Jisu Khrista lungshit na apha chang honna am shu oh.