Read Chothe Naga EBRIYA 10 Bible Online

EBRIYA 10 - Chothe Naga bible

EBRIYA 10

¹Jihudi ngei rouphun hi atun takka adiek ngoiring ngai no ae. Nahi chu ahra taranga harra shi pal sha ae akum chang honna hana taranga chak katta pe ah am meh, alota rouphun hana nujuija katta am pot hana Chungthieng kolla phao mee na mapung pha ang meh?

²Ejonga mee ngei na Chungthieng ta mok lea chu mani pak lim ha thiengpi ah mani na mani pak shilpi sho weta woiha lea ah pot kattang no weh.

³Ano shou chu malmashi ngei na akum chang honna mani pak tullu lu lim angei thei ae.

⁴Shillapa akha chu kel thee hana mee ngei pak chu shil pi nea no weh.

⁵Chuna tarang sharukka Khrista na aleiram ma majung ang tieng amo na Chungthieng kolla rillea: “Nangna akat pot hi di no weh chuti weta nang na kataranga pum akha thourang ae pi so che.

⁶Nang na ajoksha sarmai ah maicham chunga kat di no che ae naha na pak shilpi rang ha.

⁷Hana kei na rillinge, ‘hina kei am minge’ oh Chungthieng nahal ha ae ranga rouphun abai shunga kataranga jiekka shi chu hekta.”

⁸Masha ah amo na ril, “Nangna asha anga maicham chunga katta pek hi di no weh akha pel no weh hana pak shilpi nea no weh.”

⁹Hana amo na ril, “Hina kei am minge oh Chungthieng nahal nadit tullu lu ranga.” Chuna sharukka Chungthieng na ari sha ka pot kat lim pa hou weta mani hutta Khrista na Chungthieng adit tullu lim ha lu sho weh ani lim hi shilpi so weh mapom ha mak woiha chakka mapek hana jarra.

¹⁰Rouram chu Khrista na Chungthieng adit tullu lim ha ae sho weh ani lim ta pak hi shilpi sho weh mapom ha mak woiha chakka mapek hana jarra.

¹¹Jihudi thiempu ngeina rungni chang honna na hlou ha ahlong am no lutta leima tum ae sho weh, chuti weta hajong katta am hana pak ta chu shilla hou nea no weh.

¹²Khrista pak shil ranga matak mak katta pek hina atreem nei no wa san pi na chang sho weh. Hana chu amo na Chungthieng ban changtienga onga am meh.

¹³Hana amo na hakka am meh, Chungthieng na amota anda mee ngei ta akae ah tro ah shi malim ma.

¹⁴Woiha chak mapum katta pek hana pak shil pi hina mapung pha na ah so weh.

¹⁵Masha ah amo na ril, muihla athieng hana kom roungir tol sha ae.

¹⁶“Nahi ae mani hitta kei na tharra kasaro ei ha, Rengna ril, anutienga phao ang rungni eja ah chu keina mani lung shunga rou hi shi ange hana mani kolla nahi jiekka shi ange.”

¹⁷Hana woiha amo na ril, “Kei na woiha lea ah mani pak tullu angei thei ang ni ange akha chu mani hrano tullu lu lim pa kom shonga shi ang nonge.”

¹⁸Chuna sharukka woiha lea ah pak shil ranga pot kattang am no weh ani pak hi shil shu takka.

¹⁹Uleanao ngei oh, chuna sharukka ani hi Jisu thit na jarra athieng amunt na lut ngai ranga angai pe pi sho weh

²⁰Amo na athar lampi hongpi sho weh aring lam pi ha matak mak hana jarra.

²¹Ani hi ehekta alok thiempu hut shil pi sho weh Chungthieng ma inn hana.

²²Chuna tarang sharukka shilung thienga akha chu ngoiring hitta munt ha ah ani na Chungthieng kolla nei ah wa sai oh, ephao chingna am no lutta akha chu athieng tui ah tak bulla.

²³Ani na lungrang am weta ril shuk sha rou ha chetta kolla shi ei oh, rouram chu Chungthieng chu masharo ei sha ha hata shi ae ti hi ngoiring ei oh.

²⁴Ani na akha lea akha taranga hal hlak weta ahra tullu tarang lungshi hlakka san hlak ei oh.

²⁵Ani na tukhlak weta rachun na ani am hi ae han am no ei oh, mee ahra na ae hekta akha lea akha thanum thathou hlakka, rouram chu reng rungni hi ehekta neitekka wa so weh.

²⁶Nang na danga danga, woiha lea ah pak tullu lu ta lea chu, na ha na taranga woiha lea ah kattang pot am no weh.

²⁷Chuna Chungthieng ta anda ngei taranga chu mani ta routreem sarmei akal akha am meh.

²⁸Atujong akha na Moses rouphun ta jui no mee amo ta chu athi pha ange lungshi thei no hekta, mee ani no lea hella mee na machanga routreem ae jui ja roungir tollea.

²⁹Chuna Chungthieng sanao ta ushit no mee ta chu? Hana pak ta shilpi pa Chungthieng athee ta amant atom te ah la mee ta chu? Atu mo muihla athieng lungshit ta ajak pe mee ae? Halla an no amo ha chu eja ah aol ana pha phong shuk mo ti ha.

³⁰Atu na rilla meh, ani na dange kei na lamant ding ange kei na lea pi ange, akha chu hi kom atuna rilla meh, “Reng na mamee ngeita routreem ae ange.”

³¹Aring Chungthieng kut chunga tul hi eja ah atri pi ah meh?

³²Amatienga athingsha rungnie eja ha angei thei oh, alo ta nangei hitta am ha sha, Chungthieng mawar na war pi sho takka nangei aol ana eja dong nea ha.

³³Apha akha ah chu nangei na meelim maikunga ajak tukpi akha chu leima hrano tullu lu ah hajong ngei hitta nangei na rachun rang kom thourang ae phur ae.

³⁴Nangei na aral inn na am ngei hitta aol dong ha sho weh nangei pol lim mant ah shi hal kom nangei na riem ma am meh rouram chu hata lella hratekti atreem neino wa am mang akha am meh ti nangei na dange.

³⁵Ephao nulea no oh rouram chu nangei taranga alok lommant choi ah phao ange.

³⁶Adong ratto Chungthieng na saro eisha ha pha ranga.

³⁷Jieksha rou na rillea, “Apha atante shot no wa akha chu amo hi jung ang sho weh amo hi tai ang ni jo weh.

³⁸Dramochel kamee ngei oh, ngoiring mee na aring pha ange chuti weta atu jong pa na nulea, lea chu keina amo ta pellang nonge.”

³⁹Kani hi nulea mee akha chu amang mee no weh, hana hutta kani hi chu ngoiring mee hana sanpi pha mee sha ae.