Read Chothe Naga EBRIYA 11 Bible Online

EBRIYA 11 - Chothe Naga bible

EBRIYA 11

¹Ani na ngoiring ti hi ani na ri no ta ani na den na shi hatta sui ang no weh ti ah ae.

²Amatienga mee ngei na ngoiring na sharukka Chungthieng na angei mee change.

³Ani na lungkim ah akha chu ngoiring jarra shimlei ram hi Chungthieng na marou chak na sem pi ae. Chuna atun na ani ri ah am hi ani na ri no hai thou wa shak sha ae.

⁴Abel na mangoiring nu juija Kain ta hella Chungthieng kolla ahra pot kat ri ae. Mangngoiring hana Chungthieng na amota dramochel mee change rouram chu Chungthieng matak mak na mapek pot hi angai chang pi ae. Abel mangoiring hana jarra thi halkom atun phao rourilla am meh.

⁵Enok chu mangoiring jarra athi hutta Chungthieng na amota rui ah kallea, chuna atu akha na amo ta tuk hlak no rouram chu Chungthieng na amota rui ah kal sha rukka. Jieksha rou na hitta rillea. Enok ta rai ah kal matienga Chungthieng na amo ta ehekta pellea.

⁶Ngoiring am no atu akha ta Chungthieng na pel no weh chuna atujongpa akha na Chungthieng kolla wa lea chu ngoiring shu oh. Hana Chungthieng na ol mant pe ange amo ta jong mee lim ta.

⁷Noah na mangoiring jarra sharukka Chungthieng na anutienga shukkang rouril hla ah thei pha ae mari lou hatta. Amo na Chungthieng rouril jui weta kung sha weta amo akha ma inn shung lim sanpi pha ae. Shimlei ram hi aol ana pha ah Noah chu Chungthieng lungshit mee change na hi ngoiring hai thou phao sha ae.

⁸Abraham na mangoiring jarra Chungthieng na amo ta kok weta maram hou phurro hana Chungthieng na saro eisha ram ha pe ange ta madang no na ram ma emo na thinge.

⁹Mangoiring jarra amo na ram hana meedang akha changa am meh. Chungthieng saro ei nu juija. Amo na dambur inn shunga ringa am meh, Isaac lea Jacob kom hahekta Chungthieng saro eiha pha nea ae.

¹⁰Abraham na Chungthieng na sem hupi akha chu madit ta sem ram atreem neino akung hatta hakka am meh.

¹¹Ngoiring hana jarra ae Abraham na mapa akha changhi amo na eja ah ulien chang hal kom Sarah na unga am no hal kom. Amo na Chungthieng na saro ei hata ngoiringa am meh.

¹²Abraham na asanao am pha hella thinghal kom makol hai thou wa matu mate eja wan na arshi ja akha chu tuipi hou wa waipin thi jou no ja tam meh.

¹³Na manilim pa hi ngoiringa thi ngei rukkae hana mani limpa na Chungthieng saro ei pha hap no weh Chuti weta mani na aram alah hai thou wa nui shonga mani ta hakka am ha ripha nea ae. Hana chakno wa na aleiram hi ram hai ah phao unge ta dange.

¹⁴Hijong rouril mani na thieng weta danga mani mak hina ram am meh ta anna am meh.

¹⁵Mani houphur ram hata ephao mani na lea ah halla am no ae. Ejonga mani na halla ta lea chu mani lea rang apha am the kom ngai ae.

¹⁶Hana hutta mani na hra tekti wanram ram hatta ngai tekka am meh chuna tarang sharukka mani. Chungthieng ae ta mani kok kang hi Chungthieng na kom mani taranga ajak am no weh rouram chu areng mani tarang hupi akha sem pi so weh.

¹⁷Abraham mangoiring na jarra ae Chungthieng na amota chang anna akha chak asanao pe oh rilla pek nea ha,

¹⁸Chungthieng makolla rillea, “Isaac kol hai thou ah natu nate pe ange ta kei na saro ei inge.”

¹⁹Abraham na dangpha nea ae, Chungthieng chu athi sha Isaac ta kom ringpi nea ae, chuna hitta rillea ngei ae, Abraham na Isaac hi athi sha hai thou ah pha ae.

²⁰Ngoiring na jarra anutienga shukkang eja ta. Isaac na Jacob lea Esau ta saro ei ha jaihra pe pi ae.

²¹Ngoiring na jarra Jacob na Josep sanao lim ta athit matieng jaihra pe pi ae. Amo na mamolbuk ta beija Chungthieng kolla mokkae.

²²Ngoiring na jarra Josep na mathit ang tieng phao sunga, Israil sanao ngei na Egypt houphur ang tieng mapum ha alo ta ae ang sha ti rou chupi phur ae.

²³Ngoiring na jarra ae Moses manu mapa na adon shu waitak hla thum thumpa shi nea hi. Mani na ehekta ahra unga mel rijuija Reng tronglam ta atri am no wa aril jui no hi ae.

²⁴Ngoiring na jarra Moses na alien ashai shukka hang jui ja Rengsanao na han asa naopa oh ta kok jui num no hi.

²⁵Amo na apha atante ariem ahoi ang sharuk chu Chungthieng mee ngei hitta aol ana dong num meh.

²⁶Amo na Messiya taranga trongshi bakpa na lella di tekkae Egypt ram ma lal thum ta pai ang sha ruk chu, rouram chu mamitta anu tienga mapha rang mana ha mari juija.

²⁷Moses na Reng lungshat am hal kam ephao atri am no lutta Egypt ram hou phur ra tan na thing nea ae, rouram chu mitta ri lou Chungthieng ta mitta ri hek ta hallea chuna sharukka amo na nulea no weh.

²⁸Chuna ngoiring na jarra lan na bu reen ae pi weh ta shongkar chang honna athee tai oh ta tronglam pe ae chulea chu masha don Israel sanao lim pa ta meethat wanrai na that ang no ae.

²⁹Ngoiring na jarra ae Israel sanao ngei na ashan tuipi lien ta kangphal hekta lan na thingha. Chuna chu hekta Egypt sanao ngei na lan na wakjui chu tuipi lien na mani lim ta rolhap so ae.

³⁰Ngoiring na jarra ae Jerikho bang ha Israel sanao ngei na rungni sary ahul tunga kella junghi.

³¹Ngoiring na jarra ae vokno nu Rahab ta Chungthieng aril juino ngei hitta that tang hai thou wa aring pha ae, rouram chu amo na Israel aru rouron ngeita tonpi hekta sanpi sharukka.

³²Kei hi rillang song mo ae? Apha na am nijo weh Gideon, Barak, Samson, Jephtah, David, Samuel akha chu adang rouphu pa ngei maram ma ril shukkang.

³³Mani na ngoiring na jarra ram, ram ngeita ral ae weta nea ae. Mani na adiek akha chu Chungthieng saro ei ha chak la ae. Mani na nungsha mur thinga shi ae.

³⁴Sarmei kom kanpi no ae, chamshai takka thattang phao sanpi ae. Mani ha leima shullea, chuti weta aratpi ae, tuiram ral mee ta nea ranga ratpi ah ral nea ae.

³⁵Ngoiring na jarra namei ngei na mani uleanao athi sha ngei ha aring pha ae. Adang adang ngei na lella hratek aring pha ranga.

³⁶Adang ahre ta chu nuisho shimsho ah chakno wa phit pi ah akha chu adang ahre ta na thirrui ah huppa aral inn na shi pi ae.

³⁷Mani ta alunga denge, hana mani ta chamsai takka that ae, mani ta kelmo akha chu kel vut takka apun ani shakpi ae chuti mahai mani ta hrano ah ae.

³⁸Shimlei ram hi mani taranga chu hrat na ephao am ni jo weh! Mani na inn lou am no ngei hekta ramrukka akha chu mulbunga rolla alung hur shunga ano lea alei hur shunga ringe.

³⁹Eja ah makla mo ae mani na ngoiring nga am nea hi, chu phao shunga mani na Chungthieng rourean na pha no songe.

⁴⁰Rouram chu Chungthieng na lella hratek tullu ani trang ae rang lungir sho weh mahal madit chu ani hitta am ha lea chu mani ha lella mapung pha mee chang ange.