Read Chothe Naga EBRIYA 2 Bible Online

EBRIYA 2 - Chothe Naga bible

EBRIYA 2

¹Chuna sarukka adiek rou, ani theisusa limha chetta choiya anita ehoiya thingne no ranga ae.

²Wanrui ngeina ani pipu ngei kolla pekka houphur roukit ha adiek takke akha chu atu yongna rilla houphur roukitta yuino akha chu thingno meeha, ma ae na nuyuiya ae mant ha phaange.

³Hiya ah aleen aring kaeto hi, anina lung lutno saruk ka lit thuk pi sei meh? Rengpa matak makna aring kaeto hi na ehal halla hlou pao ae piya akha chu atu yongna maril tronglam thei mee ngeina, Rayon ani kolla peya, naha adiek takke.

⁴Ha itta munha ah, Chungthieng na mani kolla malung ngir, angakpi eya ae pi ya akha chu maning athuiya, athieng muihla na pek ka am kuthul makheina mani itta munha ah mee lungir pe ae.

⁵Chuna ani rilhlak, phao wanga am athar simlei hina wanrui ngeita roukam ae ranga amunt Chungthieng na pe no weh.

⁶Hina ahutta athieng abai hina jiekka si ae: “Oh Chungthieng, nangna ningsinga am mee ha atu meh? ano lea chu rengpa, na an mee sanaopa ha atu meh?

⁷Nangna amota wanrui ngei thuiya apha atomte si pi ah, nangna amota ajak ati akha chu mahung lahao hap piya,

⁸akha chu amota pot limpa roukam ranga makut chunga pulla sipisowe.” Hita rilla amme Chungthieng na, apata semhi “pot limpata an sillanga ae”; nahi pot limpa tol so weh tihi dangpha so weh, chuti weta atun amina pot limpa mathuiya am meh tihi chu ripha nosonge.

⁹Chuna sarukka Chungthieng na ringlei ngaipi yarra, Jisu meelim taranga athi hita dangpi ranga wanrui ngei thuiya sipiya, Jisu athi hina aol dongpiya, malung majaina akha chu meelimna ajak atiya chungtek ka sipiha anina ripha ae.

¹⁰Chuna Chungthieng amona asanaopa eya ngeita mahung hina rul ah lutte, manita, aring kaeto hina mitpu hata aol alongpi yarra, mapung phapirang rangpa matarang mak chu chap cha ae, maramchu Jisu Khrista malung shit sarukka mayarra pot limpa ripha pi ae.

¹¹Amona malmashi pak lim thieng pi ah akha chu amole, mathieng pi sa ngei lim mapa akha chakke maram hana sarukka ule nao ngei oh ta kok ka Jisu na ekom ajak no weh.

¹²Amona Chungthieng kolla rilla am meh, “Keina kata ule nao ngei kolla na ae houphur tullu lim shuk kang inge; keina mani abumna amunna nangta wanga dommang inge.”

¹³Amona hita kom ril sille, “Chungthieng ta kashilung sung chetta shiang inge, akha chu amona hita kom ril sille hachu, Chungthieng na keita pek unga ngei itta kei hina aminge.”

¹⁴Chuna makok unga ngei, atak akha chu athi pal souchu. Jisu matak mak kom mani hekta malmashi hina ma ong aeya houphurre. Amona simlei kaeto thinga, Jisu mathit yarra athita arat peya am hachu hrano muihlata mang pi so weh.

¹⁵Hi itta munha ah, athi ta ati ya suuk changa, ringa am ngeita, Jisu Khrista na thit yarra manita athi ta nea pi so weh.

¹⁶Chuna adiek takka rengpana wanrui ngeita sanpi ranga yung anowe, chuti weta Rengpana Abraham hina dhara ngeita san pi ranga yunge.

¹⁷Hina rilla am artha chu Rengpana solwaingei pak kokpi rang sarukka Chungthieng hina tullu na lungshi thei akha chu lungduh thimpu chang rang sarukka amota ma ule nao ngei itta limpa mana pi ta so weh.

¹⁸Atungchu rengpa matak makna ahlem akha chu aol ana eya dong nea ah, hana sarukka ahlemna hlemma am ngei ta, Jisuna san nea ae.