Read Chothe Naga EBRIYA 4 Bible Online

EBRIYA 4 - Chothe Naga bible

EBRIYA 4

¹Atun chu ameena amota shilung shunga siranga Chungthieng na sothlak rang rourean ha, dorh peh pi so weh, chuna atu akha phaona awat am nowa sohlak rang rourean ha shilung shunga am pirang chek sil eiyo.

²Maram chu, mani hekta anikom ahra tronglam eya thei pha ae. Manina ahra tronglam eya thei halkom ahra tullu ti ekom ae no weh, maram chu manina tronglam ha theiyuiya adiek ngoiringa shilunga lashil no weh.

³Chuna ani atuyongna Chungthieng na solhlak rang rourean piha adiek takka ngoiring lea chu maniha Chungthieng hina solhla pha sa ngei ae. Chungthieng amona rilla houphur hekta hachu, “Keina lung hanga rourean na saro ei houphur hekta: ‘manina etik kom solhlak na amunna tung nea ang no weh.’ ” Matullu lim athouna heithouwa shu hap halkom, nahi rilla houphur sa ae.

⁴Chuna athieng tronglam shunga rungni nasari hina maramma hita rille: “Chungthieng hi matullu ae heithouwa rungni nasari suniya solha ae.”

⁵Hi itta munha ah woiha lea ah rilla am chu, Chungthieng na solhlak rang pek kasi ahoi ram munha, manina etik kom phane ang no weh.

⁶Ahra tronglam ehal halla thei misha ngeina shilung sunga lasil no weh maramchu manina ngoiring no yar sarukka akha chu adang ahre na shilunga lasille.

⁷Mohi routakka ripi ah, Chungthieng na rungni adang akha pe pi silla hachu “Awoni” ta boh peya, akum eya amatinga David heithouwa athieng tronglam shunga rilla si ae: “Chungthieng sanrol nangeina awoni thei tale chu nangei shilung kal no oh.”

⁸Chuna Joshua na manita solhlak rang pe phur lea chu, Chungthieng na anutinga adang rungni hina maram rilphurang no weh.

⁹Chuna sarukka Chungthieng na mani taranga solhlak rang atun phao sunga amunha drakar amsonge.

¹⁰Atu yongna Chungthieng rourean pisa solha phami ngeiha Chungthieng na matullu limpa ae shu jui ah solha pha hekta, manita mani tullu heithouwa solha pi ange.

¹¹Chuna, ani limna solha pharang hratek ti tullu ha ae sheiyo, maramchu amatinga ngeina mani ngoiring wat hekta, ani chu mani hekta ae no eiyo.

¹²Chungthieng tronglam chu atun tun ringa am akha chu ratta tullu lu am, cham sei aha ani pal talella put tekke, muihla akha chu thawai joom hlakna akha chu sharu sunga am anem phaowa tan nea ae. Malmashi shilung akha chu ahal adit eya kom chumpi ae.

¹³Chungthieng maikunga thuprang ekom am no weh; maramchu pot limpahi ma mit hana ripta riya am meh. Chuna anina Chungthieng maikunga ani lu tullu eheilim.

¹⁴Chuna ani ngoiringhi rilla shukka, chetta choiya am eiyo, maram chu Chungthieng hina asanaopa Jisu Khrista anita chungtek thimpu am meh.

¹⁵Hana sarukka ani asul, ana dongha ranga, san neno chungtek thimpu ani taranga am ah no weh, chuti weta ani hekta eheilimma ahlemna hlemma am, hatihal kom pap tollou, chungtek thimpu ani kolla am meh.

¹⁶Chuna sarukka lungshi thei, thouchal amna Chungthieng phomlu ah akha chu thouna hra ah anina Chungthieng kolla naiya wa eiyo. Hana ani drakar am lim anita sanpirang thouchal akha chu lungshi thei ha pha ange.