Read Chothe Naga EBRIYA 5 Bible Online

EBRIYA 5 - Chothe Naga bible

EBRIYA 5

¹Pap taranga pekkang pot akha chu ahut silla kattang ngeita, Chungthieng hina tullu ah mee ngeita ahut silrang, mee ngei sung heithouwa halweta chungtek thimpu hap pi ae.

²Chuna amo matak mak hi asulna sihakti sarukka, thei no singno ngei itta akha chu aral ae mee ngei itta shilung nem ma amha dang pha ae.

³Chuna asul akha a sou chu mee ngeina pap kokranga kat pek hekta, amona kom matak mak taranga, pak hina sarukka katta pe ta so weh.

⁴Mee atu akha phaona ajak ati phom chungtek thimpu ha matak makna halla la no weh, chuti weta Aaronta kokpi hekta, Chungthieng nachak mita kokka chungtek thimpu chang pi nea ae.

⁵Hi itta mun ha ah, Khrista nakom hiyongpa ajak ati phomhi. Mathei chakka halla la no weh. Hina ahutta Chungthieng na hita rille, “Nangha kasanaopa ae; awoni heithouwa kei napa ha changsinge.”

⁶Chungthieng na amunt adang akha ah hita kom rille, “Nangha Melchizedek hutta atreem naino thimpuha chang ang che ae.”

⁷Jisuna simlei chunga amlei apha ah, Chungthieng kolla kalla trappa, niya akha chu mokka, amota athisa heithouwa kalpiya, Chungthieng na amota theipi hina maram chu amochu shilung nem mee akha chu riltrong jui ae.

⁸Chungthieng hina sanaopa akha ahalkom, aol pha jui ah aril trong yuirang amona chu ae.

⁹Jisuna matik chamee akha chang jui ah, maril matrong jui ah thing meelim tarang, Jisuna atreem naino aring kaeto hina akungha changsowe.

¹⁰Chuna Melchizedek hina anu jui ah, Chungthieng na chungtek thimpu changrang amota ril shuk so weh.

¹¹Hina maramma nangei kolla leima arillang am hom meh chuti weta nangei kolla akol ahae chu aerang lu ah shuk kae, maramchu nangei ha lungkim ma leima soom chouwe.

¹²Chuna apha anu jui ah nangeichu, chupi, takpi meeha changa ngai akha ah sou chu, atu yongpana nangeita Chungthieng hina trongta athouna heithouwa maru oiha woiha lesilla tak piranga nangei kolla lella hratek kange, hatiweta nangei chu akal pot bakkang nekchu anem pot salom een na, atun phao sunga hratek songe.

¹³Chuna salom chak een na am mee hachu, achum akha chu aral lungrang dang nosonge, maram chu amoha unga songe.

¹⁴Akal pot bak ka am ngeichu mapung pha sa ngei ae, manina mani takta hrabakta siyin na ah, ahra hrano eya lim dang pha nea ae.