Read Chothe Naga EBRIYA 6 Bible Online

EBRIYA 6 - Chothe Naga bible

EBRIYA 6

¹Chuna Khrista hina ahalpa roukit eya ngei nungtinga hla ah houwa, mapung pha chupi takpi tinga anina ma sonna thing eiyo. Anina halla hei thouwa kana anglou tullu lu akha chu Chungthieng ta ngoiringa;

²tui luppanga chupi takpi, kut luchunga siranga, athisa heithouwa ringpi akha chu atreem naino routreem ae rang hana akung woiha lesilla thul no sa seiyo.

³Chuna ani maitinga sonna thing seiyo, Chungthieng na ngaipilechu, nahi ani ae ranga ae.

⁴Chuna hoi alota mani ngoiring hla ah thing sa ngeita woiha lea ah lunghlong ranga lea pisillanga meh? Apha akha ah Chungthieng mawar pha ah amsa, thangwan na pek khuttul hina atui dangsa, akha chu athieng muihla hina saruk phasa;

⁵Manina Chungthieng tronglam hi ahra aeta mani tullu hana dangsa akha chu phao anga am kum hina manae yaitha ha manina dange.

⁶Hatiweta mani ngoiring hi hla ah hou ah; woiha lesilla mameeta lunghlong pirang leima luwa shuk kae, maram chu manina woiha leya Chungthieng asanaopata Kross chunga pang tinga akha chu mee jam maikunga phonga ajak tuk pi ae.

⁷Ruhna sulla, na ruh tuita chup ranga Chungthieng na alei hita yaihra pe ae akha chu atu yongna lou ae talechu ehekta kana ah, andik na diek kom tou pi ae.

⁸Chutiweta aling kung akha chu talu ngei tou talechu ekom aman tolnowe, na ha khudong thi Chungthieng na serap peya akha chu mei ah khanga mang pi ange.

⁹Kalungshit trongpi, nangeina hihekta trong talechu, kanina nangta thachat ounge, nakolla am aring kaeto meelimta lella yaihra pha ae tihi kanina dangpha onge.

¹⁰Chungthieng chu huwngthei no weh, na lu tullu lim, nalungsit lim, akha chu natongpi nathawul ngeita nasan pek, napek lim Chungthieng na etikkom makkang no weh.

¹¹Anina aleen diya halla am, mee limna atreem haowa maseba ae numha shilung sunga sipi oh, chuna nahal lungrang eya lim adiek chang ange.

¹²Kanina nangta katal akha changpi num nonge, chuna akhang kal ngoiring akha hekta akha chu Chungthieng na anita eheilimma pe pi angeta roungir sa ha lapiyo.

¹³Chungthieng na Abraham kolla rourean jui apha ah. amona suino lutta yaihra pe pi angeta rouraen nea. Amo hekta aleen tek atu kom am no weh, matak makna maming ril shuk weta amona rouraen so weh.

¹⁴Amona rille, keina rourean na am chu, “Keina nangta yaihra pe ange akha chu nasanao, natu nate eya kom pe ange.”

¹⁵Abraham na akhangkal it munha ah Chungthieng na rouraen pi sa ha, amona pha ae.

¹⁶Mee akhana rouraen jui apha ah, atu yongpa amota lella aleen tek mingha rilweta, akha chu rouraen eyalim sune ae.

¹⁷Atu yongna Chungthieng rouraen pharanga, Chungthieng na thienga dang rang, mahal maning ha, ahlong am no ranga di ae.

¹⁸Chuna ahlong am no ranga akha chu Chungthieng hina huwngthei no weh dang rang, pot ani am ha chu, anina makolla ahoiya solhlak rang akha chu ani hal asa eya chetta ngirrang, thouna hap piya ani maikunga shi pi so weh.

¹⁹Chuna ani eyong aleen lung rang am sarukka simlei hina ringa am nea ae, nahi adiek akha chu aol pha ang eya takom ngak thuk nea, akha chu wanramma athieng Chungthieng ta mokna inna raap phaowa leng nga thing nea ae.

²⁰Anihut silla Jisuna ani maikunga athieng amunt na lutpi ah akha chu Melchizedek mathanga amona ani taranga atreem nai no ah chungtek thimpu ha chang pi ae.