Read Chothe Naga EBRIYA 7 Bible Online

EBRIYA 7 - Chothe Naga bible

EBRIYA 7

¹Melchizedek hi Salem ram hina areng akha chu Chungthieng hina chungtek thimpu akha ae. Abraham na areng inlee ta ral nea ah lea jui ah, Melchizedek na Abraham itta tuk hlak ka, akha chu amona yaihra bor pe ae.

²Hana Abraham na Melchizedek kolla asom sunga akha pe ae. (Ahalpa ah Melchizedek hina rilna chu, “Dramo chel hina areng maram chu amo Salem ram hina arenge, adang artha akhapana,” adai hina araeng).

³Melchizedek hina manu, mapa akha chu pi pu akha chu mapokna amunt, mathitna amunt eya ekom jiekka shi no no weh. Amohi Chungthieng hina asanaopa hekti ae amohi atreem naino thimpu changa amshi yowe.

⁴Chuna nangeina ann oh, amohi eya ah rat meh? Abraham, ehekta amingthing ani pu, ralnea ah machoile pot eya lim, asom sunga akha tihi makolla katta pe ae.

⁵Abraham chak anowa, Levi hina dhara, thimpu ngei, rouphun hina anu jui ah Israel sanao ngei. Abraham hina dhara akha chu mani ram sunga am mee ngei takom asom sunga akha ti hi thimpu ngeina hraiweta pe ae.

⁶Melchizedek hi Levi hethouwa yung dhara kom anowe, chuti weta amona Chungthieng na rouraen pha Abraham heithouwa asom sunga akha hrai ah la ah amota yaihra bor pe ae.

⁷Hana ngaidolh rang am no weh maram chu yaihra bor peya am akhana yaihra bor phasa akhate lella aleen tekke.

⁸Thimpu ngeina asom ma akha hraiya lakchu athisa mee ngei kolla la ae; chuti weta Melchizedek na chu aringa am malmashi ngeita asom ma akha hraiya ammeta, athieng tronglam na rilla am meh.

⁹Chuna Abrahamna asomma akha tihi pe ae, Levi ngei nakom asomma akha pe ae.

¹⁰Maramchu Levi ngeihi hana lei apha ah amnosong halkom, mani ha amsowe, ta rilla amme, ani pipu Abraham na Melchizedek itta tukhlak heithouwa.

¹¹Levitical thimpu ngei anu jui ah, rouphun hi Israel sanao ngei taranga pe so weh. Atun chu Levitical thimpu ngeina mapung pha ah, mani tullu hi ae talechu, Melchizedek hina mahut silrang, Aaron anolutta adang thimpu hi ri pi sillanga.

¹²Maramchu thimpu changa am ngei, hlong jui apha ah, hana rouphun kom hlong phum shuk kae.

¹³Nahi, adang adang jatti ngeita akha chu majatti mee ano, thimpu akha changa seba ae louna, Chungthieng ta mokna athieng amunna seba ae no weh.

¹⁴Anina hrabakta dangsa, theisa ae hachu amohi Judah jatti mee akha changa pokke, akha chu Moses na thimpu ngeita tronglam pe jui ah, na jatti hi jiek ah houphur no weh.

¹⁵Echam chamma na roupham hi shuk so weh, Melchizedek hekta adang thimpu akha ripha so weh.

¹⁶Chuna amota thimpu akha changa hal pi ah, simlei chung malmashi ngei roukam anu jui, anolutta amona aring ringchan hina manea jaitha hina atreem amno lutta pal lange.

¹⁷Chuna sarukka athieng tronglam na rilla am chu Melchizedek mathanga, “Nangna atreem naino thimpu ha chang pi ange.”

¹⁸Amating ari roukam hi, akinga si hina maramchu ari roukam hi sulleh akha chu kana niyowe.

¹⁹Chuna Moses hina rouphun eya na ani kolla mapung phane no weh, akha chu atun chu anina Chungthieng kolla naiya wa ah, lella hratek lungrang ani kolla pe pisowe.

²⁰Hina chunga Chungthieng na rouraen pi ae. Marou raen pi hachu, adang thimpu ngei rouraen hek tinowe.

²¹Chuna Jisuna rouraen itta munha ah thimpu akha changa, Chungthieng na makolla hita rille, “Rengpa ha saru eiya rouraen so weh hana mawakhal ahlong ammang niyowe.”

²²Chuna hi manat no hlak hi lella hra, chetta angai hlak am ranga Jisuna sem pi ae.

²³Adang thimpu ngei itta khatna hlak hina maramchu simleiya am thimpu ngei chu, thiweta akha chu thisuyuiya woiha lesilla mani tullu le-ah ae thou sil nea no weh.

²⁴Chutiweta Jisu chu atreem am no lutta ringa am mang akha chu thimpu akha changa, matullu ae hi mee atu adang ko lalla thing ang no weh.

²⁵Chuna amochu atun kom akha chu apha chang honna, amochu eheilim ma ae nea ae hachu atu yongna Chungthieng heithou wamee ta kalpi ange, maram chu amo chu atreem amno, ani taranga Mapa Chungthieng kolla ril pirang ringa am meh.

²⁶Ani drakar eheilim pek pi ranga am chungtek thimpu ha Jisu ae. Amo chu athieng ha ae; Masunga hrano pap akha chu aral ekom am no weh. Amo chu hrano pap hei thouwa hran na akha chu athi hei thouwa ringa wanram ma kal so weh.

²⁷Amochu adang chungtek thimpu ngei hek tinowe. Mahousha ah thimpu ngeina ahalpa ah mani pap taranga, hana amtinga mee ngei pap taranga niti chara pot katta am hekta Jisu chu halim makolla drakar am no weh maram chu Jisu matak mak kat thukka, meelim tarang woiha chakka kat thuk ka thi pi so weh.

²⁸Moses hina rouphun, chungtek thimpu taranga mee ngeita halla shuk hi mapung pha no weh chuti weta rouphun anutinga Chungthieng na rouraen itta munha ah asanao pata hal, amochu atreem am nowa mapung pha pi so weh.