Read Chothe Naga EBRIYA 8 Bible Online

EBRIYA 8 - Chothe Naga bible

EBRIYA 8

¹Wanram ma matik magul na sihakti araeng ongna, changting nakalla onga am, anita chungtek thimpu akha am meta eheilinma anita takpi it munha ah rilla am meh.

²Amona chungtek thimpu akha changa, ehekta athieng tekti amunt sunga tullu lu ah, naha chu rengpana sem routak pa am range, mee na sem ah no weh.

³Chuna Chungtek thimpu chang honna, Chungthieng kolla iratpot, asata katrang akha chu adang pot eyata katpirang tullu lu pi ranga pham hi hal pisowe. Chuna ani Chungtek thimpu kom, eyongpa kattang pot makolla amme.

⁴Amona simlei hina am mang tale chu, thimpu akha changa am phur ang no weh, Chuna Jewish rouphun anu jui ah akha chu mee ngeina hatta pek eya ta seba ae ranga thimpu eya amme.

⁵Routakka manina thimpu ngei hekta tullu lu hi, awai akha chu waram hina ahla ae. Naha Moses ta ripi it ta chap mana ae. Amona ramrukka mani solhlak rang inn asinte sak rang apha ah, Chungthieng na amota hita rille, “Keina nangta ching chunga ripi hana am jui ah eheilim hi sem mo.”

⁶Chuna atun chu manita lella chungtek, Jisu ta thimpu hina tullu pe pi ah, Chungthieng akha chu ma mee ngei karra lella angaihlak hratek akha choiya lutta sem thourang lim hi, lella hratek rouraen hina yarra ae.

⁷Ahalpa angaihlak hina ekom asui akha chu aral amno talechu, ani supa angaihlak choiya luttang drakar am no weh.

⁸Chuna Chungthieng na mani ngei sunga aral ha am sarukka amona hita rille, “Rungni ngeiha naiya yung so weh Chungthieng na rilla am meh, keina athar angaihlak Israel sanao ngei akha chu Judah hina mee ngeita choiya kahal jui apha ah.

⁹Amatinga nangei pipu ngeita, angaihlak hekti ang no weh, hana apha ah manita kakutta choiya rolla akha chu Egypt haithouwa manita ruiya shuk kinge. Keina angaihlak kasen ping hata manina angaihlak kata lungduh no weh, hana surukka manita keina lunglut nonge.

¹⁰Atunchu, phaowanga am rungni eya ah, Israel sanao ngeita angaihlak kasem anghi hi ae ta Rengpana rille hachu; keina mani wakhalla kata rouphun eya hap pi ange akha chu mani shilung sunga jiekka si ang inge. Keina mani Chungthieng ha chang ang inge hana manina kamee ngei ha chang pi ange.

¹¹Atu akha phaona matongpi anole leipak hana mee kolla ‘Rengpata dango’ ta chupi, takpi no su oh maramchu asinte heithouwa aleen tekti phao mani limna keita dang ange.

¹²Keina mani pap lim kokpi ange akha chu mani hrano ae lim woiha lea ya ningsing pi ang niange.”

¹³Chuna athar angaihlak hina maram ma rilla am hi, Chungthieng na masa ah ari angaihlak sem pi ah, akha chu eyongpa ari changsa akha chu atit sa lim, sot no lutta mangpi siyowe.