Read Chothe Naga EBRIYA 9 Bible Online

EBRIYA 9 - Chothe Naga bible

EBRIYA 9

¹Masa ah angaihlak hichu Chungthieng ta mokkang niyom ngei ae akha chu mokrang ha mee na sem sha ae.

²Chuna dambor akha dunga, ha asunga thanmei doina sari akha chu Chungthieng ta kat rang doukang lea butol shi ae, na hita athieng amunt aeta boh weh.

³Ani sunapa raap anungtinga dambor inn hata ehekta thieng tekte amunt aeta bohwe.

⁴Hana sunga sonata ariem hoi mei hol saiphung, akha chu sona limpa hloom angaihlak na upu; upu sunga Manna tol bubel, anaa tol Aaronta molbuk, akha chu rakit rou eya jieksa alung pek ani am meh.

⁵Upu achunga ahla nei giba shi pi hina maram chu Chungthieng na tatnowa loina am meh tina ae, ahla ngei hana phalla, pap eya ta kohpina amunt hata lipiya am meh. Chuna pot limpa hina maram ma anina atun apha na am no yarra hratakta jiekka shi nea no weh.

⁶Hi rouphun lim hi thourang ae susa so weh. Thimpu ngeina nitiya awao ting dong damwul sunga lutweta mani ae phum shuk tullu ha lu ranga lutte.

⁷Chutiweta chungtekti thimpu na akum akhashunga, woiha chak, asung ting dong damwul thiengtekti amunt sunga lutte. Malut jui apha ah, meelim pap korang akha chu matak mak pap kokrang, meelim ahutta amona athee choiya lutweta Chungthieng ta kat teh.

⁸Athieng muihlana chupi takpiya amme, hachu, masapa damwul, thiengtekti amunt ha, thinga shi amlei apha ah, athieng meelim na athieng amunna lutranga lam ha atun hongpi no songe.

⁹Na damwul hi atun apha taranga panteem akha changa ah songe. Hina artha chu pek ka am eya akha chu asata Chungthieng kolla katta am hina, Chungthieng ta mokka am ngei shilung sunga mapung pha no weh.

¹⁰Maramchu hangeiha bakka, inna, adang adang thieng pirang nijom eya ha, nalimpa ha awao thonga thieng pirang nijom chakke. Na nijom hi, Chungthieng na athar nijom sem ma heita, jui hak kang chakke.

¹¹Chuna Khrista na chungtek thimpu akha changa, ahra eya taranga yung pi su so weh. Damwul sunga matullu ma ae, hita lella leentek akha chu lella mapung pha tekke; nahichu mee na sem ah no weh, simlei ram semma saruk tol kom ah no weh.

¹²Khrista na damwul sunga, thiengtek ti amunt sunga malut hi, mee lim taranga woiha chak lut pi phur so weh. Thiengtek ti amunt hana malut jui ah, amona Chungthieng kolla katrang kel thee akha chu shil thee choiya lut no weh, hata lella mee limna atreem naino aring kaeto pharanga Jisu na mathee mak choiya lutta kat pi so weh.

¹³Chuna kel thee akha chu shil lapa hina athee akha chu shil hatamte hina meikangsa awood ngeihi thieng no am mee ngeita thieng piranga mee ngei tak chung chai pi ae. Hana nahina manita thiengpi ae akha chu am housa mani hrano eyalim kokpi ae ta hallae.

¹⁴Amatinga mani ae ya houphur eya kom chum meh, chuti weta Jisu Khrista athee hana eya tam lella ae nea ae tihi ripha; Athieng muihla hina yarra amona matak makta mapung pha Chungthieng ta kattang pot akha changa kat thukpi so weh. Chuna anina aring Chungthieng, maseba ae pharanga, mathee hana anita achum aral eheilim thiengpi ange.

¹⁵Hina maram sarukka Khrista; matak makna athar angaihlak sempiyah, chuna, Chungthieng na rouraen pisa, atu yong Chungthieng na kok pi sa ngeina atreem naino yaihra ha pha pi angeti. Nahi jui ah hongpher hina maram chu amating masa angaihlak, mee ngeina aral tullu lu jui ah, aol ana pe no lutta hla ae, hana sarukka athiti pe ae.

¹⁶Maram chu, thit pi rang am hata, ha sempi mee amona thipi shuk ta so weh.

¹⁷Chuna, thit tanga shukka, thitranga thinge, maram chu athit rang semam mee hana aringleiya naha etikka kom arat makolla shuk no weh.

¹⁸Chuna sarukka aharpa angaihlak hachu, athee tol nowa lingkok pino weh.

¹⁹Chuna, masa ah Moses na rouphun sung jiekka shi rakit rou eyalim, mee ngei maikunga pa ah shuk kae. Hana amona shil lapa athee akha kelhina athee tui itta pulweta, rouphun abai chunga akha asha mul ashan, hissop sijin naam meelim chunga athee ha chai pi ae.

²⁰Nahi Chungthieng na nangei ningtinga rakit rou pek pi sa, adiek roungir hlak rang athee ha ae.

²¹Hi itta chap mana ah, damwul chunga akha chu mokranga shijin nat am pot eya chunga, Moses nakom athee chai pi ae.

²²Chuna rouphun am jui ah, pot limpahi athee na thiengpi aeta rilla ngai ae, chuti weta athee mak tul pi nole, pak kokpirang adang am no weh.

²³Chuna sarukka waramma am pot hina panteem changa am ngeita hingeihina thiengpi tasowe, chuti weta wanram ma am pot hamakchu hingei ta lella ahra kattang pot drakar ui ae.

²⁴Chuna, mee na sem athieng amunt na Khrista na lutta no weh chuti weta waram makta ani taranga Chungthieng maikunga ripi ah, Rengpana ani hut silla lutpi ae.

²⁵Jewish chungtekti thimpu na akum chang honna asa hina athee choiweta thiengtekti amunt hana lutte. Chutiweta Khrista nachu matak makta katranga tatno lut no weh.

²⁶Hati lechu, Rengpana simlei ram sem mating, heithouwa tuiya aol donghak kanga ae. Chuna sarukka pek yarra pap lakka hourang woiha chak mee limta ripi so weh.

²⁷Meelimpa woiha chu thi ange, hana nutinga Chungthieng na routreem ae ange.

²⁸Hihekta Khrista nakom meejam pap kok pirang sarukka matak makta katthukka peya, aring kaeto tarang Rengpana hakka am ngeita pap ae no lutta, anisuna majung jui apha ya ripha ange.