Read Chothe Naga JACOB 3 Bible Online

JACOB 3 - Chothe Naga bible

JACOB 3

¹Uleanao ngei oh, nangei atam pa na ocha chang ngei no ae, nangei na dang ang chau ae, ocha chang ani ta hella loktekka routreem ae ange mee adang hek ti ang no ae.

²Ani lim pa hi woiha, woiha lal chak ti ae, chuti weta ejonga mee akha na maril matrong juija aral am no lea chu amo hi rakit pha mee ae hana mapum lim pa ta hrabakta sum na mee ae.

³Ani na sakor murra rui ren na chu ani ril jui rang nga ae, hana ani na thingpi num na amunt na thingpi nea ae.

⁴Ano lea halla anno kung ha, haja lok halkom arat ajap ahai karra alota thou wa thingsha, athou pa na thingpi num na tieng nga thing hi asien te nou hana jarra ae.

⁵Chuna leipar hi asiente halkom tien amo na ehekta alok rou ril shuk nea ae. Halla anno eja ah lok thingbil hal kom asiente maikhei maru na maipi shukpi ae.

⁶Chuna leipar hi sarmei jongpa ae, na siemlei hina pumhitta amo na hrano eheilimpa hina shukna nei weta ringchang hita sarmei kum sunga kang nga shi pi nea ae.

⁷Ramma asha awa akha chu awon na lonna thing asha hana tuisunga am eheilim pa hi malmashi na tepi nea ae.

⁸Chutiweta atu akha na chu leipar tah dai pi nea no ae nahi hrano ae hana mant na kom shi nea no ae, athi hu tur na shi hakti ae.

⁹Ani na arengpu Pathieng ta dom na kom nei ae hana Chungthieng na mamel malla shak ani tonpi ngei ta kom sarkou na nei ae.

¹⁰Ariem na rou lea sarkou na hi mur akha chakka shukkae uleanao ngei oh na shukpi ang no ah ae!

¹¹Tuikung akha chakka ahlum tui lea akha tui shuk kha no ae.

¹²Uleanao ngei oh, theichang kung nga churuphor ra no ae; hana angur kung nga theichang ra no ae, hana chi tuikung ah ahlum tui shukka ngei no ae.

¹³Nangei karra atu jong akha na lungsing lunghal thei mee am meh? Amo na ahra maring chang nga dang pi shu oh. Matullu lu juija lungnem akha chu malungsing tolla ae shu oh.

¹⁴Chutiweta ejong nalungsunga anar donna lungkha kha ah nathei chak tarang nga hal ta lea chu nathei nasing hana chou thukka pak ae no oh.

¹⁵Hajong lungsing ha wanram tieng thou jung ah no ae; naha chu aleiram muihla tol no dijabol ngei ta sha ae.

¹⁶Chuna hoija amunt na anar lea matarang nga chak hal mee am na ah eheilim pa ahra shuk kang no ae hrano na shi ange.

¹⁷Chutiweta wantieng nga lungsing chu masha ah athieng ang nge eheilim ma; hana dai kom dai ange tonpi kom tonpi chak kang nge; hana lungshi theina shihakti ange hana ahra tullu luk kange; hana ahra sha lea meelung olpi am mang no ae.

¹⁸Adai pe ngeina phun na houphur adai muchi haithou wa ahra ha lukkange.