Read Chothe Naga JACOB 4 Bible Online

JACOB 4 - Chothe Naga bible

JACOB 4

¹Nangei sunga shulhlak halhlak akha chu trongjet hlak lim hi hoitieng nga phao ah meh? Mani ha chu nangei na ariem ahoi dit lei ah shukkae. Atreem am no lutta nangei sunga shul hlakka am chou ae.

²Pot hata nangei na leima di sho chau, chutiweta nang na chu pha nea nie jo weh chuna pa chu nangna trongjet hlakka shul hlak so ae. Hana leima madit jarra nang na that sho. Nang na nadit pot ha nang na pha no che ae, rouram chu nang na Chungthieng kolla nie no che ae.

³Hana naniek juija kom nang na pha no che, rouram chu nangei lunghal ha hrano ae, nang na naniek chu nathei chak ka ahoi rang nie che ae.

⁴Ngoiring thei no malmashi ngei oh! Siemlei ram ma tonpi sha ngei hi Chungthieng ta anda mee ae dang no wa che? Chuna atujong akha na siemlei hita tonpi sha lea chu amo matak mak na Chungthieng ta anda mee ae.

⁵Jieksha rou trong hi adiek no ae ta hal no oh. “Chungthieng na ani sunga shi muihla hana anarra am meh.”

⁶Chuna Chungthieng jaihra na lella rattekkae jieksha rou na rilla shi ae, “Chungthieng na chouthuk mee ta harra shi ae, chuti weta noluk mee ta chu lungshi pi ae.”

⁷Chuna Chungthieng kolla ripta pe oh, hana hrano ta jullo. Hana chu amo na nakol hai thou wa tan na thing ang nge.

⁸Chungthieng am na nei ah wa oh amo na kom nakolla nei ah wa ange. Pak chel ngei oh nakut ha hrabakta shilla hou oh! Ahra sa ngei oh nangei lung ha thieng pi oh!

⁹Aol jaishi shukka am mo, au wa trappo! nangei anui hana atrap wulpi oh nangei ariem hana ningshi ninghrul changpi oh!

¹⁰Arengpu maikunga natak na nolokka amo hana amona nangta dom ma kallange.

¹¹Kalungshit ulea nao ngei oh nangei akha lea akha meeral ril hlakno oh, atujongpa na Khristen ulea nao sunga meeral ril akha chu amo ta routreem lea chu rouphun ta meeral rillea akha chu rou ha treem meh. Nang na rouphun routreem lea chu nang ha rouphun jui mee ha anijo che ae Chutiweta routreem pa so che ae.

¹²Chungthieng chakkae routreem ae rang akha chu rouphun pe pa ha. Amo chak na san kom san pi nea ae hana tui kom tuipi nea ae. Chuna natonpi akha ta routreem nang ha chu atu inge ta halla am ma che?

¹³Karou hi ngei oh, nang na hita rilla am che ae, “Awoni ano lea atukka hupi alok akha ah thing nga amunt hana akum akha te sunga sumlo thumlo thing weta sum leima choi ang nge.”

¹⁴Atukka naringchang ejongpa shukkang dang no che ae! naring chang chu meihut na apha atan te ri pi phur weta mang jongpa ae.

¹⁵Nang na narillang chu hi ae: “Ejong nga ka rengpu na lungshi pi lea chu kani na ringlei ah na hi ae, oh ano lea ha pa ae ange.”

¹⁶Chutiweta atun nang na chu lok chokka namur lokka am che ae hajong lim ha dieklou ae.

¹⁷Chuna, atu jong akha na ahra tullu dang weta tullu changa ae no lea amo ha danga danga pakkae.