Read Chothe Naga JACOB 5 Bible Online

JACOB 5 - Chothe Naga bible

JACOB 5

¹Hana atun nangei achongpu ngei oh karil ngei jou oh trappa akha chu thi tah wo nangei chunga aol phao ang ha.

²Nanei adon ha thu hap so ae, nangei pun dier ngei bom leithana bak hap so ae.

³Nata sona rupa ngei kom thirek na hlum so ae, chuna hi thirek hina meelung ngir changa nangei pum lim mei na bakhap pange chuna atum mang tienga nangna hijong anei adon homma shi sho che ae.

⁴Nang na nalou wa tullu lu ngei ta lom mant pe no che ae, mani roukat kom thei pi no che ae nalou wa muchi hom ngei trap ha ene nea Chungthieng kurra thei sho ae.

⁵Alei ram ma naring chang hi adi apam na shi hek ti so ae. Athat ranga nangna natakta nolpi sho che ae.

⁶Nangna meeta neinunt pe ah aral am no ngei ta that che ae mani na nangta ham nea no ae.

⁷Uleanao ngei oh adongthei oh Rengpa jung ma lim. Anno lou ae pana amant tam muchi bal na lukranga amo na hakka am meh, kum ru shur ma lim ma.

⁸Nangkom hahekta dong ratto, wanga nalung denna am moti chu Rengpa jung rang ha nei sho ae.

⁹Nangei akha na akha chunga rouwuk hlak no oh, chuti lea chu Chungthieng na nangei ta routreem mang no ae. Routreem pa hi shuk ranga nei ah am so ae.

¹⁰Uleanao ngei oh angei thei oh, Rengpa minga rouril phur rouphu ngei ha. Mani aol ana dongphur ha nangei kom chu oh.

¹¹Kani na manit jaihra mee ae ta kokkunge rouram chu mani ha adong ratte. Job hana adong rat ha thei sho chou ae, hana atreem na ah areng na amota alo pe moti ha nangei na dang chou ae. Rouram chu rengpa na lungshi thei ringrei thei na shi hakti ae.

¹²Hina lim chunga, uleanao ngei oh nangei na rouren na saro ei no oh awon akha chu aleiram adang adang rilla rourean no oh. Nangna oh weh ti lea oh ti oh, ngeinong ti lea ngei no oh. Chuti lea chu nang Chungthieng routreem thuija wa ang no ae.

¹³Nangei karra atu jong akha na olla am ma meh amona nie shu oh, atujong na ariem ma meh, amo na adom na lah sha shu oh.

¹⁴Atujong akha na ana asha pha am ma meh, amo na chuneh ulien ngeita kokka, mani na mataranga nie shu oh akha chu reng minga siriek noi pi shu oh.

¹⁵Hitta ngoiringa niek hana ana mee ha adam pha ange, Rengpa na mapum ha woiha lea hra pi ange akha chu pak ma ae ha kom shilpi ange.

¹⁶Chuna sharukka nangei akha lea akha pak ril shuk hlakko akha chu akha lea akha taranga nie pi hlakko. Ahra mee hana niek chu ehekta jaitha pha ange.

¹⁷Elija kom ani hekti akha ae. Amo na shilung thienga ru shur no rang niekka aleiram ma kum thum lea hlaruk ru shur no ae.

¹⁸Woiha lea ah amona niek juija wan hai thou wa ru shurra aleiram na muchi balna eja ra pi ae.

¹⁹Uleanao ngei oh nangei karra akha na adiek hai thou wa numatukka amjuija adang akha na amo ta woiha lea ah rui phao lea chu,

²⁰Na hi nangei na makno oh; atu jong na pak chel akha ta dieklou hai thou ruija phao lea chu pak chel muihla ha athi hai thou wa sanpi ae akha chu pak lim silpi ranga marama sha ae.