Read Chothe Naga 1 PITAR 2 Bible Online

1 PITAR 2 - Chothe Naga bible

1 PITAR 2

¹Chuna hrano lim, ahra sangei, anar shilung don ngei akha chu nuisho shimso trong eya lim hla ah houweta litta thingo.

²Naosan hekta apha chang honna athieng muihla salom ta ralla ammo. Chuna na ha een jou weta alin ashai shukka sanpi pha ange.

³Athieng tongsan hina ril chu, “Nangna arengpu hi eja ah lungshi thei meh ti ha nangna dang so che ae”.

⁴Mee ngei nachu routak ka denga housa, chuti weta Chungthieng kolla chu ahal sha aman ehekta tam aring alung, rengpa Jisu kolla nangeina wa ah am chouwe;

⁵Jisu Khrista hina yarra Chungthieng na ngaipiya, muihla taranga kat ranga, athieng thiempu akha chang ranga, nangei natakha a ring lung chunga, muihla tarang inn shakrang chango.

⁶Athieng tronglam na hita ril ae, “Zion heithouwa innky alung, ehekta aman tam keina halla shi inge; akha chu atu yongpana amota ngoiring lea chu etikkom ningshi ninghrul pha ang no weh.”

⁷Chuna aman tam alung hi amota ngoiring ngei taranga ae; chuti weta amota ngoiring no ngei tarang chu hiyongpa ae: “Inn sha ngeina kanna niyo weta ahousa alung hamakna aki ah, inpi changa ngir pi ae.”

⁸Athieng tronglam akha nakom rillea, “Hi alung hina ae mee ngei ta kae mathui shuk pi ang, ha sum lung hana manita tupi ange.” Manina kae mathui ae maram chu mani na tronglam hatta ngoiring no ae; Mani tarang Chungthieng na hal chu ha sha ae.

⁹Chuna sarukka nangeita athim heithouwa Chungthieng hina angakpi mawar hana kokpi ah, Chungthieng hina ma ae nea angakpi eya lim nangeina rilla shuk ranga, ahal mee, ngeita lamkai thiempu ngei, athieng jaty, nangei ha Chungthieng hina mamee ae.

¹⁰Amatinga chu nangei, Chungthieng hina mee chang houphur no weh, chuti weta atun chu Chungthieng mamee akha ah so che ae; Amatinga Chungthieng lungsit ha nangeina dang houphur no chou weh, chutiweta atun chu Chungthieng lungsit ha nangei pha so chou ae.

¹¹Kalungsit katongpi kathanrul ngei oh, nangei hi shimlei ramma hullang phao mee ngei hekta rilla am minge, pum na dit nu jui no oh ti chu apha chang honna muihla ral ae ah am meh.

¹²Nangeita hrano ae mee ngei ae ta nangei chunga adang jati ngeina ril hlak hana, manina nangei ahra lu tullu anweta, Chungthieng jung rungni ah domrang, nangeina mani maikunga ahra lamma thingo.

¹³Rengpa maram sharukka ane angam thuija akha chu, loktek ti lamkai thuija dongo.

¹⁴Hrano tullu lu mee ngeita routreem akha chu maral lak ranga akha chu ahra tullu lu mee ngeita wanga domrang Chungthieng na aram aram changhonna simlei chunga luching ngeiha hal pi ae, hana mani ril trong jui ah thing nganga ae.

¹⁵Chuna ahra bakta nangeina tullu lu nea ranga, dang no thei no mee ngeita hrabakta anpi tihi Chungthieng na aditte.

¹⁶Ariem ahoi ah, am mo, chuti weta ahoi jui apha ah hrano ta wurra shi no oh, Chungthieng hina kor ngei hekta ringa am mu oh.

¹⁷Malmashi limpata ajak ati oh, Ngoiring ulenao ngeita lungshi oh, Chungthieng ta ajak ati oh, akha chu nangeita lamkai ta ajak ati oh.

¹⁸Mee suuk ngei oh, nangei mitpu thuija ajak atri ja amo hana nangeita ringrei ngei chak anolutta ringrei thei lou ngei thui ja kom dongo.

¹⁹Maramchu Chungthieng ahal thuija am ma nangna pha phung shukno aol dong lea chu, hina taranga Chungthieng na jaihra pe shu oh.

²⁰Chuna nangei na dieklou tullu lu ah aphit arit tukka donga lea chu e-ahra shukka meh? Chutiweta nangna adiek tullu taranga aol donglea chu Chungthieng na nangta jaihra pe ange.

²¹Maramchu hiphao sunga nangeita kokpisowe, nangeina Khrista ta kae mun shakka yuinea ranga, Khrista na aol donga nangei kolla ripi dang pisowe.

²²Khrista chu etikka kom pak ae no weh, akha chu mamur heithouwa hrano tronglam, adiek no rou ril kom atu na kom theipha no weh.

²³Khrista ta lungsha ah anina rilhalkom, amo nachu lesirra lungsha trong lo shang no weh; Khristana aol dong jui apha ah, mani ta lea ah lungsha atrie pi ae phur no weh. Chutiweta adiekka routreem ae rengpana, makolla heithou wa adiek ha pe piya am meh.

²⁴Pak lam tinga thi ang sa anina adiek tienga ring ranga, Khrista matak makna khross chunga ani pak limpa choiya thing pisowe: amona alem akui pha sharukka nangta dompiphur so ae.

²⁵Chuna nangei chu kemo nao ngei hek, ta numa tukka am meh chuti weta atun chu kelmo shelpa akha chu maihla rungpa kolla lea so chou ae.