Read Chothe Naga 1 PITAR 3 Bible Online

1 PITAR 3 - Chothe Naga bible

1 PITAR 3

¹Chuna chu hekta nangei namei ngeina apishal ngei thuiya, ammo, mani sunga atujong akha na Chungthieng trong juinohal akha chu Chungthieng tronglam rilnohal nangei ahra shimshak hana mani ta ahra lam tienga ruine ange.

²Maram chu mani na nangei shimshak hi eja ah thienga meh akha chu ajak atri pi ah meh dangpha ae.

³Nangeina ehekta amel ahrat ranga simlei hina ahra pot, sona, rupa akha chu ahra pun ni shenga, awao wa chak ahrat ranga chang pi no oh.

⁴Chunahutta nangeina simlei adiek ka shilung sunga adai akha chu lungnem ma, muihla taranga pun dir shenga changpi oh, nahi Chungthieng kolla ehekta aman tam meh.

⁵Chuna amatinga Chungthieng ta chetta ngoiringa am ehekta thieng namei ngei nakom mani pishal ta ajak atri ah pun dir sheng hekta apishal thuija am meh.

⁶Sarah nakom apishal, aril atrong jui ah amota rengo ta kokkae, nangei na ahra ae leilim mashanao nu ngei ae. Chuna eko atrie rang am no ae.

⁷Chuhekta, nangei apishal chang ngei oh, nangei namei ngei itta ahrabakta lungrang tul hlakka amanga ae, maramchu mani na tolteke mani ta ati ajak pe oh, maramchu mani kom nangei hitta munt ha ah Chungthieng pek ring chang pha ha ange. Chuna nahi ae oh ha ti lea chu nangeina aniek limma ahan amang no ae.

⁸Atreem na ah; nangei limpa shilung akha chakka, lungrang tulla amha manga ae, ule nao ngei hekta akhale akha lungshi hlak ko, akha chu ringrei ngei akha chu shilung nem ma am mu oh.

⁹Hrano ae mant hi hrano ah lepi no oh, sarkou halkom nang chu sarkou alea no oh, chuna hutta yaihra pi oh. Maram chu Chungthieng na nangeita kok phur hi, yaihra pek ranga kokka ae.

¹⁰Athieng tronglam na hita ril hekta, “Atu yongpana ahoi ringchang pha num akha chu ahra rungni ri num lea chu, hrano trongril chan shu akha chu murthei trong trongno su oh.

¹¹Amoha hrano ha hla hou weta, ahra ae shu oh; amoha shilunga adai pharang yong su oh.

¹²Chungthieng na adiek ae mee ngeita runga am meh akha chu mani niek lim Chungthieng na theipi ae; chuti weta hrano ae mee ngeitachu Chungthieng na anda ae.

¹³Chuna nangeina ahra tullu hi shilung lutta ae num ta lea chu, atu na hrano ae nea ang meh?

¹⁴Chuna nangeina adiek ae lei ah aol dong lea eja oh ariem pi meh: nangei na atu yong takom atri no ah akha chu lung ol no oh.

¹⁵Chuna nangei lung sunga Jisu Krista ta atri ajakka shi oh. Apha chang honna, thei singa am mu oh maram chu atu yongna adiek ngoiring hana maram ma saiyuiya, nangei na hrabakta sang nea ranga apha changhonna tamasha aeya am mu oh.

¹⁶Chuna shilung daiya akha chu Chungthieng ta atri ajakka matullu ae oh. Khrista kolla nangeina ahra shim shak ae hana nuisho shimso ae ngei manina nangei chunga hrano tronglo rilyui hana nangeita ajak tukpiranga, nangei ahra bakta ahra hrano dang ranga shilung sunga am su oh.

¹⁷Chuna Chungthieng hina ahal a lea chu, nangei na hrano tullu taranga aol dong rang saruk chu ahra tullu lu weta aol dong pana hratekke.

¹⁸Chuna Chungthieng kolla nangeita ruiya wak piranga, Khrista nakom mee lim tarang woiha chakha thipisowe; Khristana pum ma amona thipi so weh, hatiweta muihla tinga amona ring so weh.

¹⁹Muihla changa Khristana thingweta raen inn sunga am mee ngei muihla changa, amona ril pi ae.

²⁰Amatinga Noah na ringlei apha ah, kung alok, semma thourang ae am lei ah, Chungthieng na apha sotta hak ka am aril muihla ngei hi ae; kung sunga am mee ngei ahre, hachu mee arit chak na tuipi alok heithouwa kalpi ae.

²¹Tui hana takpiya am chu baptias ae nahi ae, chu ha na atun nangeita kalpi, so ae ani takka hrano achar hi shilpi ranga anowe, chuti weta Jisu Khrista na ringa thou yarra, Chungthieng lam tinga ahrabakta ahra hrano dang ranga lung ngirra sa ae.

²²Khrista chu awan ram ma kalla thinga Chungthieng chang tinga am meh; wanrui ngei, akha chu wantienga ane arat ngeilim, mathuiya am meh.