Read Chothe Naga 1 PITAR 4 Bible Online

1 PITAR 4 - Chothe Naga bible

1 PITAR 4

¹Chuna Khristana pumma aol dong piphurra, nangei kom akhale akha arat shukka, lungtulla am mo, maramchu aol dong sa mee hana pak lamtinga, hrano hana neang no weh.

²Chuna atun heithou wachu nangeina simlei hina adit apam anu jui ah ring no lutta, limma am ringchang hi Chungthieng ahal thuiya ring ngan nga ae.

³Maramchu simlei chunga ani adit, ariem ahoi, yurui, hrano shimshak adi apam, een bakka am ngei akha chu thingkung, lungkung ta mokka, na tullu lim pahi nangeina jui ah thinghou so weh.

⁴Atun chu adang Jatti ngeina ehekta angak shuk kange, maram chu nangeina mani hrano lamtinga yuinowa, hla ah thing jui ah akha chu manina nangei kolla tongshi kom thiya rillange.

⁵Manina ringa am ngei takom thisusa ngei takom routreem ae ranga thourang ae ah am Chungthieng mai kunga mani maram lim rilshuk kang ae.

⁶Hina sarukka muihla ah athi sha ngeita muihla ring ranga pumma routreem ma Chungthieng ahra tronglam sham phurre.

⁷Chuna sarukka pot limpa atreem mang ha naisowe. Nangei lung mant na thei singa, ammo akha chu nie theija am mo.

⁸Eheilim chunga, akha lea akha lunglutta lungshi hlakko, lungshi hlak na pak eyalim ta wurre.

⁹Nangei akha lea akha ta ngaishi ngeida am no wa bakpi ennpi thei oh.

¹⁰Mee chang honna khuthul pha anu jui ah, nangei sunga Chungthieng hina ahra matullu lu mee ngei hekta akha lea akha san hlak ku oh.

¹¹Atu yongna rilnum trongnum halkom Chungthieng hina tronglam hekta ril trong su oh, Chungthieng na pek arat athei hana, tullu ahra bakta lu su oh, chuna eheilim ma Jisu Khrista mayarra ariem ma dom ranga ae. Khrista kolla atreem naino ariem ahoi akha chu ehekta arat athei eya lim makolla am meh. Amen.

¹²Kalungsit tonpi ngei oh, nangei kolla adiek, ngoiring amranga nangei kolla aol pha jui ah, eyongpa angak tul shuk no oh.

¹³Lella tieng ariem mu oh Khristana aol dong ha nangei kom pha tol chou ae. Chuna Khristana mahung majal phu ah ripijui ah na ngai ariem na shi ang nge.

¹⁴Nangeita mee na Khrista nu jui mee ae ta ajak pe lea chu nangei ha yaihra ae; maram chu athieng Chungthieng Muihla na nangei chunga solha ah am meh.

¹⁵Ejonga nangei na aol dong ha meethat mee, aruthei mee, anolea chu adang vokno hrano chuna chunga athei asing sha sarukka changpi no oh.

¹⁶Chuna sarukka nangei na Khristen akha chang maram ma aol dong lea chu, ekom ajak no oh, chuti weta Chungthiengta dommo maram chu Khrista minga nangei na ron nea.

¹⁷Maram chu Chungthieng routreem hi ma inn shung hai thou thou rang apha waso weh, chuna naha ani kolla masha ah thouta lechu, Chungthieng hina ahra tronglam ta juino mee ngei tarang atreem niya e shuk kanga meh?

¹⁸Athieng tronglam na hita rilla si hekta, “Ahra mee ngei phaowa sanpiranga ae lea chu Chungthieng ta ngoiring no jaishi ngeita chu hoija am mang meh?

¹⁹Chuna Chungthieng ahal la aol dong ngei ha sempi mitpu ahra tullu lu ranga mani matak makha channo wa pea shu oh.