Read Chothe Naga 1 PITAR 5 Bible Online

1 PITAR 5 - Chothe Naga bible

1 PITAR 5

¹Abom shunga ulien akha changa nangei karra am ulien ngeita dangpi inge Khrista na aol ana dongha malungrang, akha chu mahung maja phu shuk juija keikom pha tollange.

²Keina nangeita rilla aminge, Chungthieng na nangta pekphur kelmo avul ha lung lutta selpi rungpi oh, ae num no wa ae anolutta Chungthieng dit anujuija ae oh amant pha rang chak anolutta diekka ae num ma ae oh.

³Nangeita hrabakta anrang pek mee ngei hekta mani chunga ane angam changa palno oh, chuti weta avul maija achu rang chango.

⁴Chungtekti kelmo shelpana, jung jui apha ah nangeina tui ang lou awar lubur ha nangeina pha ange.

⁵Hahekta nangei naopongei na ulien chang ngei thui dongo. Nangei limpa shilung riemma akhana akhata san hlakko: maramchu Chungthieng na lokchok ti ngeita ngai no weh, chuti weta shilung nemma amngeita chu lungshi pi ae.

⁶Nangei na Chungthieng arat changban thuija lung nemma ammo. Amona acha apha pha juija nangta lokpi ange.

⁷Nangei ol lim ha ma kolla jungna pe oh, amona na nangeita runga am meh.

⁸Nangeina thei singa, adong akhang ratta am mo, nangeita anda mee, hrano Saitanha nangei kolla sora ramma huishar ae ah, atu yongkhata bak ranga yonga am meh.

⁹Nangei ngoiring ha chetta ngirra, hrano hata nepi no oh, maram chu ha jongpa chap mana aol ana dongha, simlei chunga am nata ulenao ngei kolla kom eyong aol ana shuk sha so weh tihi nangei na dango.

¹⁰Chutiweta Rengpa hina atreem naino mahung majai hina tarang, Khrista kolla nangeita kok hana, lungshi thei Chungthieng amo makna, nangeina apha atante aol dong weta, nangeita rakit phapiange, chetta ngir piange akha chu sanpi ange.

¹¹Chungthieng arat athei, ma ae nea hana atreem nainowa pal su oh. Amen.

¹²Keina nangei taranga hi abai bong matta, thacha ah ngai Sillas yarra jiek singe. Keina nangeita thasi thadok am no rang akha chu adiek Chungthieng hina lungshit yaihra meelung ngir peya aminge. Nangeina adiek ka lingno lutta chetta ngirro.

¹³Babylonna am Chungthieng na ahal sanuna akha chu Kasanao pa Mak na nangeita ningsinga mokka am meh.

¹⁴Lungshi hlak itta munha ah akhana akhata ajak atiya mok hlak ku wo. Khrista kolla am nangei limpata adai na shi su oh.