Read Chothe Naga 2 PITAR 1 Bible Online

2 PITAR 1 - Chothe Naga bible

2 PITAR 1

¹Jisu Khrista hina suuk akha chu arui Simon Pitarna anipa Chungthieng sanpipa Jisu Khrista diektek Jarra amantam ngoiring pha-ah amngei kolla:

²Chungthieng akha chu Jisu Khrista ta nangei dangthei jar hana malungsit akha chu adaiha nangei kolla sihakta am su oh.

³Maram chu Chungthieng hina arat ae nea, akha chu mahung majai akha chu ahra hana anita kokpiya rengpata adiek ka dangnga, aringrang akha chu Chungthieng ta ngoiring ranga eheilimpa ha anita pe pi so weh.

⁴Atripi Chungthieng hina matik mawar akha chu mata arat hana yarra arillang am no mahei alok vuthul eya lim pe pi so weh; chuna hina yarra nangeina simlei ram hina boron bontai lim, hlan na thingweta yairha chang neranga ae.

⁵Chuna hina sarukka nangeina ngoiring hi chunga arha lohranga narat mahei angam ae-oh, nangei ahra hana chunga thinwar lol oh.

⁶Nangei thinwar chunga natakta netiha lol oh nangei natakta nea hana chunga adong rat lol oh; adong rat chunga atheing lol oh:

⁷Nangei atheing ti hana chunga ulenao lungshi hlak, ha lol oh, nangei ulenao lungshi hlak chunga lungsi ti lol oh.

⁸Chuna na limpa hi nangei sunga sihakta am lea chu mani na nangta ani Rengpa Jisu Khrista maram ma dang hi lal ah anat shukpi ang nge.

⁹Chuna atu jongna nalimpa hi am no lea chu, amoha anaiteya am amatinga ari pot chak ri mee ngei chu athingsa pak silpi so weh tiko makke.

¹⁰Chuna sarukka ulenao ngei oh, nangeita kok akha chu ma ahal ha chetta lingno lutta amrang hut na oh: maramchu nangeina na tronglam limhi jui ah amtalechu, na ngei na etiekka komi pap ah tul ang no ae.

¹¹Hiti lea chu nangeita ani Reng Jisu Khrista samla Rengram ah lut rang lam lok ka pe pi ange.

¹²Chuna sarukka nangeina hi lim hi masha ah dang phun ah akha chu adiek ka chet ta pha phun halko, keina hi limpa maram ah apha changhonna nangei ta ngailen na am minge.

¹³Keina karing leilim ma hi maram ma na ngei na mak no lutta am rang rilpi hi adiek ke ta halling nge.

¹⁴Kei kapum hi lha hou rang nei ah wa so ae ta ani Rengpa Jisu Khrista na thienga keita ril phur ha kei dang inge.

¹⁵Hati halko ka thitsu takka na ngei na hi lim maram ma mak no lutta am rang nangei tarang hut na am minge.

¹⁶Ani rengpa Jisu Khrista na lokteck seiteck ka majung rang maramhi, mee ngeina sem tamin hekta na ngei ta dang pi nong ae, chuti weta kani mitmakna Rengpa malok mashei ri phur unge.

¹⁷Amota Mapa Chungthieng na ajak ati akha chu mahung majai peak juihana, chungtekti sanrol hana makolla hitta ril ae, “Nahi ehekta kalungsit kasanaopa ae, makolla keina ehekta lungtin inge!”

¹⁸Kani tak mak na hi sanrol hi wanram heithou wa jung thei unge, kanina amo itta athieng mullon ah anlei ah.

¹⁹Chuna kanina Rouphu ngeina rilla houphun roukit ha lella ngailung tui unge. Nangei na rouhata lunga shiranga ae oh, maramchu nahi meiwar na athim amunt na akha chu huwar malim war hekta, akha chu inthou sorpana nalung shunga war shu oh.

²⁰Chutihalko eheilim chung nga nangei na dangrang chu atu akha na ko ma thei ah athieng trongshan shunga am rouma akha phao phurakta ril nea ang no ae.

²¹Maram chu rouphu ngeina ril roukit ha mee ngei ahal hei thou ah shuk no ae, chuti weta mee ngei ha muihla atheing na lut weta Chungthieng heithou wa jung trong shan ha mani na ril ae.