Read Chothe Naga 2 PITAR 2 Bible Online

2 PITAR 2 - Chothe Naga bible

2 PITAR 2

¹Diek no, Rouphu ngeiha amating thou mee kara amphur ae, chu hekta diekno chupi ngei nangei karshunga shuk kang ae. Mani na amang ata rang, diek lou lam choi phao ange, akha chu nanita lea pi phur mitpu hata ngei ang no ae, chu na mani na mani chunga dang hou no ah amang ata pha ang ae.

²Chuti phao shunga atam pana mani aril achak sum lam tinga jui ange; mani na hata ae sarukka adiek lam hita, mee adang ngeina hrano lam aeta tronghlak kange.

³Manina hopla pella sharukka ashem tamin ha nangei ta rilweta mani lok rang ae ange. Manita routreem mang paha apha shotta atun phao shunga hakka am meh, akha chu manita mangpi tapiyang paha jalla yalla amnowe.

⁴Chuna pap ae wanrui ngei hata tulluha lu Chungthieng na kalpi no ae, chuna hurra danga houwe, atreem ni rungniya routreem aeranga manita ehekta athim thuiya huppa si ae.

⁵Chungthieng na amatinga rilsham muhsam si nulei hata ko kalpi no ae, diek lou mee ngei mang pi rang simlei ah tuipi lin shuk pi ae; naha na kalpi pha ha chu diek tek te tong sham Noah akha chu adang mee sari hita chak ae.

⁶Chuna Sodom akha chu Gomora hupi anita meina kangpiya awut ulla mangpiha, Chungthieng ta ngoiring no ngei chunga shukrang ri pi chu piye,

⁷Akhachu Chungthieng ta roukung yuilou ngei kara ahra apa Lot ta kalpi ae.

⁸Ahra apa hana, mani karra ringtolla, naha nahani changhon na mani hrano lu tullu riya akha chu theiya lung aol donga am meh.

⁹Rengpa na amota ngoiring am mee ngeita sanpirang akha chu kalpirang amona dange, akha chu hrano mee ngeita routreem routin rungniya amrang, aol pekrang amunt hakom amona limta shem ma shi ae.

¹⁰Chungtek ta mani pum na dit na jui ah am ngei akha chu Chungthieng ae nea matik ngai lou ngei. Dieklou chupi ngei hi vok no lam ah atri alam am no ae, chungtinga mahung majai am ngeita ajak atri muh no ae. Chuna hutta manita nuiso sim so ae.

¹¹Dieklou chupi ngei ta lella rattek akha chu loktek wanrui ngei na phao Rengpa maikunga manita neinun pea ah nuiso sim so no ae.

¹²Chutiweta hi mee ngai hina adon hei thou wa tol ramsa ngei hekta amantrang akha chu thatrang don hekta manina dangpha no eheilim ta ajak tuk pirang anea jul ae. Maniha ramsa hekta mang pi ange.

¹³Akha chu dieklou ae na amanha manina aol dong ange; nishun apha ah slae-zouza hana ahoi ae ta hal mee ngaina nangei ita bakha, eenha leiya manina dieklou tinga hungpher ae ah an num meh.

¹⁴Manina atu adang takom an num no weh chuti weta okno lamchat hrano namei ngei chak an nea. Manina pap tullu lu hi ahop apel am no weh. Manina, shilung ngir chet no ngeita hlem nea ae, mani lung sunga hopla pella na sihak ti ae. Mani chu sarkou phasa hina sanou ngei ae.

¹⁵Manina adiek lam hla ah houphurra, Beor hina asanaopa Balaam hina lam nu jui ah, Mani numatukka amsowe; Balaam na sum dit sarukka diek lou ae na amant pha ange,

¹⁶akha chu pap ma ae na trongshi bak ae; mata kormoh na malmashi trong shukka awet matullu lu hata ham ae.

¹⁷Hi mee ngei hi tui am no tuikum yong pa ae akha chu ru thi rangna jap pathingsa shumphai yong pa ae; Mani tarang Chungthieng na athim chunga thimtek ti amunt ha halla shisowe.

¹⁸Manina ah anglouwa alok sha ah trong ae dieklou ae ah ringa am ngei shung hei thou ah shuk ka thing thou lim ngeita am ma adi apam lam tinga mani na hlem ae.

¹⁹Manina manita mahal ma ae num lim ae pi ange ta saroh aei ae chuti weta mani malak ngei chu manga ngai shim shak kor chang ae-atu yong akha hi eyong ehal, ehal akhana amota nea ah mathui ah shi am pi lea chu amoha na hana kor ae.

²⁰Eyonga mee ngeina Jisu Khrista ta dang yarra simlei chunga hrano amut tullu heithouwa shukka ring anutinga, amut tullu hana woiha lesille chu amating hata lella anuting pa hina hrano tek ae.

²¹Maram chu dramo chel ngei lamchu manita peksa athieng roukung ha jui no ah ring ang sharuk chu mani na rouha dang phur no pana mani taranga lella hra tek kang nga ae.

²²Mani kolla shuk lim hana tronglam na rilhi adiek sha ae ta muh pi ae: “Uina aluk sha ta bak shir ae” akha chu “Tuibul pi sha vok na leah adu bul ae.”