Read Chothe Naga 1 JOHON 1 Bible Online

1 JOHON 1 - Chothe Naga bible

1 JOHON 1

¹Aring rang tronglam hi kanina nangei kolla jiek lha unge, nahichu simlei athou hei thouwa amphursa-ae. Kanina theiphursa, akha chu kani mitmakna riphur unge, oh-weh, kanina nalimak ri-unge, akha chu kani kut makna tong phur unge,

²Hi ringchanghi arirang apha phayuiya, kanina riphur-unge, hina sarukka kanina trong-ung, akha chu kani kolla dangpi phur mapa Chungtheing kolla am samla ringchang maramma nangeita rillunge,

³Kani risa akha chu kani theisa ha nangei kolla kom dang piunge, chuti lea chu kani itta nangei kom mapa akha chu masanaopa Jisu Khrista itta tulha ange.

⁴Kani na hi jiek maram chu kani ariem hi mapung pha ranga ae.

⁵Atun kanina asanaopa heithouwa theipha tronglam chu hi ae; hachu Chungthieng chu awar-ae; akha chu makolla athimti etik kom am no weh.

⁶Anina amo itta munha ae ta rilweta athim thuiya amta lechu, adiek tronglam akha chu ani tullu na kom hungthui changsowe.

⁷Chutiweta Khristana awarra amhekta anikom awarra am talea chu, ani akha lae akha tonha tul hlak so weh akha chu masanaopa Jisu Khrista amant tam mathee hana ani pak limpa ha thieng pi so weh.

⁸Anina pak am no ae ril lechu ani taknangna anina hungthei ae ah ae, akha chu adiek ha ani kolla am no weh.

⁹Chutiweta anina ani pak lim Chungthieng kolla ril shuk lea chu, Chungthieng na ani tarang ngir pi ah akha chu adiek ha ae pi-ange amona ani pak lim kokpiya akha chu ani diekno lu tullu lim thieng pi ange.

¹⁰Anina pak ae noaeta ril shuk talechu, ani Chungthieng kolla hungthei mee akha ae, akha chu Chungthieng adiek tronglam ha ani kolla am no weh.