Read Chothe Naga 1 JOHON 2 Bible Online

1 JOHON 2 - Chothe Naga bible

1 JOHON 2

¹Kalungsit kasanao ngei oh, keina nangei taranga jiekka aminge hachu, nangeina pak tullu hi lu noranga: chuti weta atu yongpana pak ae talea chu, kapa kolla anita rou rilpiranga dharmachel Jisu Khrista am meh;

²Hatiweta Khrista matak mak ani pak taranga akha chu thieng piranga sa-ae, anitarang chak anowe, chutiweta simlei ram limpa taranga kom ah ae.

³Akha chu anina Chungthieng na jiekka si tronglam anu jui ah thingam talechu, anina Chungthieng ta dange tihi dang pha ae.

⁴Atu yongpana amota danginge ta ril weta, maril tronglam ngeihi yuino talea chu amoha amurthei ae akha chu adiek ha makolla am no weh.

⁵Chuti weta atu jonpana maril matrong jui ah am amo ha Chungthieng ta adiek ka lungshi akha ae. Hita ae hina Chungthieng kolla amona am meh tihi dang pha ae.

⁶Atu yongpana Chungthieng kolla tatnowa aminge ta ril lea chu Jisu Khrista na ring hekta amoko ringsu oh.

⁷Ehekta kalungsit trongpi ngei oh, hi tronglam nangei kolla ka it am hi athar anowe; chuti weta athou heithouwa nangeina dang sha ari tronglam ha ae, ari tronglam hachu nangeina theishu sa ha ae.

⁸Woiha lesirra, keina nangeita ka it tronglam hi athar ae maramchu adiek ha Khrista kolla ko akha chu nangei kolla ko ripha ae. Maram chu athim ha lalla thing so weh, hana adiek awar ha atun warra am meh.

⁹Atu yongpana adiek awar ha makolla amsangeta rilweta, amona ma-u manaota anda talechu, amoha athiem thuiya atun apha phaowa amsonge.

¹⁰Atu yongpana ma ulenao ngeita lungshi mee hachu Chungthieng mawar hana tatnowa warra am meh akha chu makolla aol ana pharang am no weh.

¹¹Chuna atu yongpana ma ule nao ngeita anda talechu amoha athiem thuiya am mee ae; amoha athiem ma thing mee ae akha chu mathing nga hoiya thingno matak makna dang no weh, maramchu athiem na amota mitcho pi ae.

¹²Kalungsit kasanao ngei oh, keina nangei kolla ka jiekka am hina maramchu nangei pak limpa Khrista yarra kokpi so weh.

¹³Kalungsit mapa ngei oh, nangei taranga keina iya aminge hachu athouna heithouwa am Chungthiengta nangeina dang chou weh. Naopong ngei oh, keina nangei kolla jiekka aminge maram chu nangeina hrano hata nea sa chou weh.

¹⁴Unga ngei oh, Keina nangei kolla jiekka aminge, maram chu nangeina mapa ha dangchou ae. Keina jiekka am sirringe mapa ngei oh, maram chu athouna heithowa am Chungthiengta dang chouwe. Naopong ngei oh, nangei kolla keina jiekka aminge maram chu nangei ratchou ae; Chungthieng hina tronglam nangei kolla am meh akha chu nangeina hrano akha hata nea chou ae.

¹⁵Simlei ah nolea simlei chunga am eheilim dino au oh, nangeina simlei hita di talea chu, nangei Chungthiengta adiek ka lungshi akha ah no weh.

¹⁶Simlei ah am pot limpahi anipumna aditte, naha pak ae, Chungthieng hei thouwa ah no weh, chutiwata simlei hina tarang chakke.

¹⁷Chuna simlei chunga am lim akha chu ani dit lim mang ang chakke; chuti weta Chungthieng ahal athuiya thing mee hachu atreem naino Chungthieng na makolla am ha ange.

¹⁸Kalungsit kasanao ngei, atreem ni rungni ha naisowe chuna Khrista ta anda mee phao ange tihi amatienga thou rilla housowe; atun na Khrista anda ngeiha mahalla shuk phur so weh, chuna atreem ni ha naisowe tihi anina dang pha ae.

¹⁹Maniha routakka ani karra am tol mee no weh chuna sarukka mani ha anita houphurra thing so weh anikarra tolmee changta lea chu, ani hitta apha chang honna amha ang ngan nga ae; chuna sarukka mani limpa ha ani karra tolmi ah no weh tihi dangrang sarukka akha chu ripharanga ani ta hla hou thing so weh.

²⁰Chuna nangei hi Khrista na athieng muihla siriek tui not sha ae chuna sarukka nangei limpana adiekha dang sa so ae.

²¹Nangeina adiek hi dang noweta keina jiekka nonge, chuti weta nangeina naha dang sarukka akha chu ah no trong tichu murthei hi etikom adiek heithouwa shuk no weh.

²²Atujong mee akhana Jisu hi Khrista ae ta sanpipa ae ngai num no mee hayongpa mee ha Khrista ta anda mee ae amo na mapa Chungthieng akha chu asanaopa ta ngeilou mee ae.

²³Chuna atuyong pana asanao ta ngainum nota lea chu mapa Chungthieng takom ngainum no ae; atu yongna sanaopa ta ngainum talechu mapa Chungthieng ta kom ngainum meh.

²⁴Nangeina athouna hei thouwa nangei kolla theisa ha nangei lunga apha chang honna amshu oh. Athouna hei thouwa nangeina theiha nangei kolla apha chang honna amlea chu nangeina kom asanaopa hata akha chu mapa hitta apha chang honna am chou ae.

²⁵Chuna atreem naino samla ringchang hi anita pe pi ange tihi Khrista matak makna rou ngirpi houphur sa ae.

²⁶Atu yongpa nangei kolla hungpher ngei taranga keina na hi jiekka aminge.

²⁷Chuna nangei taranga chu Khristana nangei chunga mamuihla ha shi pisowe. Mamuihla na nangei kolla amlei limchu, nangeina atu adang ngei chupi takpi ang amang no weh. Maram chu Khrista muihla hana nangeita eheilim chupi takpi ange, akha chu machupi matakpi limhi adiek chakke, dieklou ekom tol no weh. Muihla na chupi takpi hayui oh akha chu Khrista itta apha changhonna lutta am mo.

²⁸Kalungsit unga ngei oh, Khrista kolla apha chang honna amha oh, anina thanum thathou ah, Khristana jung jui ah Khrista maikunga ajak tuk noranga nangeina makolla tatnolutta ammo.

²⁹Nangeina dang ang chouwe Khrista chu dramo chellea, atu jongna adiek ae ta lea chu amoha Chungthieng hina asanao ae ta dang au oh.