Read Chothe Naga 1 JOHON 4 Bible Online

1 JOHON 4 - Chothe Naga bible

1 JOHON 4

¹Kalungsit katongpi ngei oh, muihla pha singe ti limta ngoiring nowo, chuti weta muihla ngei ha Chungthieng heithou phao mo anno; maram chu dieklou rouphu eja ngeiha simlei chunga shukka rolla amsowe.

²Hi chu Chungthieng muihla ae tihi dang nea rang chu: Khrista Jisu hi meetak changa junge ngai num lim ha Chungthieng hai thou mee ngei ae.

³Chutiweta atu yongpana Khrista ta ngainum no tale chu makolla Chungthieng hina muihla amnowe. Makolla am muihla hachu hrano Khristata anda muihla ha ae. Hitta phao ange ti hi ngeina theiphur so weh, akha chu atun alei ram hina masha ah am so ae.

⁴Nangeichu Chungthieng ta ae, kalungsit kasanao ngei oh, nangeina dieklou muihla ta nea so weh; maramchu nangei kolla am muihla amo ha simlei chunga am muihla ta lella loktek kae.

⁵Diekno trongsanta chupi maniha simlei chunga ta ae, chuna manina simleiya ahoi tarang chak ril shuk kae, hana simleiya am ngeina mani ril trong theiya thinge.

⁶Chutiweta ani chu Chungthieng ta ae. Chungthieng ta dang amo hana kani rou trong ngei ae; atu yong, Chungthieng heithouwa ah nole, kani tronglam ngei num no ae. Hina heithouwa anina adiek muihla akha chu hrano tichu diekno muihla hi thienga dangpha ae.

⁷Kalungsit tongpi ngei oh, anina akhale akha lungshi hlak kei oh, maramchu lungshi tihi Chungthieng heithou wa shuk kae. Atu yongna lungshi ti makolla am lea chu amo ha Chungthieng hina sanao ae akha chu Chungthiengta dange.

⁸Atu yong pana lungshi ti am no lea chu, Chungthieng ta dang no weh, maram chu Chungthieng chu lungshi ae.

⁹Chuna Chungthieng na malungsit ha ani kolla ripi so weh hachu asanaopa akha chak ka simlei chunga hla pisowe, chuna anina makol hei thouwa aring muihla pha ange.

¹⁰Lungshi ti chu hi ae: anina Chungthieng ta lungshi so weh ti ah no weh, chuti weta Chungthieng na anita lungshit pi sarukka asanao hata ani taranga pak amlim thieng piranga hla pisowe.

¹¹Kalungsit tongpi ngei oh, Chungthieng anita hiya ah lungshi pilechu, ani nako akha lea akha lungshi hlak anga ae.

¹²Chungthieng ta atu nakom etik kom ri no weh; anina akha lea akha lungshi hlak lea chu, Chungthieng na ani hitta munt ha am meh; akha chu malungshit hana ani shunga rakit pi ae.

¹³Anina dang pha ae, anina Chungthieng itta chatnowa am meh tihi akha chu amona ani karra apha chang honna amme, maram chu Chungthieng na mata athieng muihla ha ani kolla pepisowe.

¹⁴Akhana risowe anina, hana mee adang ngei kolla mapa Chungthieng na asanaopa ha simlei chunga am ngeita sanpirang hlapi so weh.

¹⁵Atu yong pana Jisu hi Chungthieng hina sanao ae tihi ril shuk nea lea amoha Chungthieng itta amha akha ae akha chu Chungthiengna chatno lutta makolla ammeh.

¹⁶Chungthieng na anita lungsit hi ani takna dange akha chu ngoiringe. Chungthieng chu lungshi ha ae, atu yongna lungshi theiha amlechu, amo ha Chungthieng na makolla chatno lutta lungshipi ange, akha chu Chungthieng na Chungthieng hitta amha ae makolla chat nolutta ammeh.

¹⁷Hina lungshi hana anita akha chakka am pisowe, chuna anina routreem ni rungni ya thasi thadol amno ranga ae, maram chu Khristana am hekta, anina kom simlei ram hina amanga ae.

¹⁸Lungshi kolla ati ti am no weh; adiek lungshit hana atiya am lim hou nea ae. Chuna, atu yongna shilung sunga atiha am lechu, lungshi tihi rakit pha nea ang no weh, maram chu ati tihi chu aol pharanga ae.

¹⁹Anina lungshi ae, maram chu Chungthieng na anita masha tekka lungshi phur so weh.

²⁰Atu yongpana Chungthieng ta lungshi inge tiweta, mata ule nao ngeita lungshi nole chu, amoha hungthei akha ae. Maramchu amit ta ri mata ule nao ngei phao lungshi no lea chu, amit ta ri no Chungthieng ta chu etik kom lungshi nea ang no weh.

²¹Khristana rilla am tronglam chu hi ae: Atu yongpana Chungthieng ta lungshi tale chu, ma-u-ma nao ngei takom lungshi anga sha ae.