Read Chothe Naga 1 JOHON 5 Bible Online

1 JOHON 5 - Chothe Naga bible

1 JOHON 5

¹Atu yongna Jisu hi Messiya ae ta ngoiring mee ha Chungthieng hina sanao akha ae; akha chu atuyongna mapata lungshi lechu asanao takom lungshi ange.

²Hi hana, anina Chungthieng ta lungshiya Khrista amo hina rilla shi limpa jui ah thing jui ah, Chungthieng hina asanao ngeita lungshi ae tihi anina dangpha ae.

³Chuna anina Chungthieng ta lungsit hichu maril tronglam limhi jui anga ae. Akha chu maril tronglam limhi anikolla chuya arit alu ah no weh.

⁴Maramchu Chungthieng hina sanao limna simlei hita maishi pe nea ae. Akhana ani ngoiring hana, simlei ram hita ral nea chang ae.

⁵Atu yongpana simlei hitte pe nea meh? Simlei ram ta nea ang mee chu, Jisu hi Chungthieng hina sanao weta chetta ngoiring mee ha chak sha ae.

⁶Tui lea athee itta munha ah yung phur ha Khrista ae, Tui hachak kom ano lutta, Tui athee jung phurre ae. Akha chu muihla matak mak na kom, nahi adikke ta ngirre, maram chu muihla hachu adiek sha ae.

⁷Roungir inthum ammeh:

⁸ahalpa ah muihla, ani na ah tui, inthum na ah athee ae, na inthum lim hi rou akha chak pe ae.

⁹Anina mee roungir ta ngoiring ae, chuti weta Chungthieng roungir chu ta lella loktekke, maram chu amona pek ka am roulam hi asanaopa maram ma pe pisowe.

¹⁰Atu yong pana Chungthieng hina, asanao pata ngoiring mee hana mani shilung sunga Chungthieng roungir amange, chuti weta atuyongna ngoiring nole chu, amo hata hungthei mee changpi ange, maram chu mapa Chungthieng na asanaopa maramma, rilphur ha amona ngoiring no weh.

¹¹Rilla shi roungir hachu hi ae, Chungthieng na shamla ringchang ha pe pi so weh, akha chu hi ringchang hi asanaopa kolla haithou shukae.

¹²Atu yongpana asanaopa hata pha lechu hi ringchang ha pha ae; atu yong pana asanao pata pha nole chu, ring chang tuk kang no weh.

¹³Chungthieng hina asanaopa minga, amota ngoiring, nangeita shamla ring chang aringha am meh tihi nangeina dangranga, keina naitrongsan hi nangeikolla jiek singe.

¹⁴Ani na Chungthieng maikunga lung lokka am meh maram chu ani na makolla nieklim hi mahal anujui lea chu ani niek hi amona theipi ae.

¹⁵Amo na ani nieklim theipi ae ejongpa anieklim hi theipi ae ani na dang pha lea chu anina makolla niek lim ha pha so ae ti ani na dange.

¹⁶Atu yong pana ma ule nao na athi ti shukpi anolutta pak aeya ri lechu, amo na nie pianga ae, akha chu Chungthieng na makolla athi pha pi no pak ae ngei taranga aring ha pe piange. Athi ti shuk pi ang pak ammeh; hi maram hina amona niang nga aeta keina rilla ah nonge.

¹⁷Hrano tullu limpa pakkae, chuti weta athiti pha no ranga pakko am meh.

¹⁸Anina dange Chungthieng kol hei thouwa shuk mee hachu pak tullu lu ang no weh, maram chu Chungthieng sanao pa na amota runga am meh akha chu hrano na amo ta hlem nea ang no weh.

¹⁹Anina dange shimlei ram limna hrano thuija am hal kom, ani chu Chungthieng kolla am meh.

²⁰Ani na dange ti chu Chungthieng sanao pa ha junge akha chu ani lungwar shukpi ae. Chuna anina adiek Chungthieng ta dange. Ani ringhi adiek Chungthieng akha chu asanaopa Jisu Khrista hitta ae. Na hi adiek Chungthieng ae akha chu na hi samla ringchang ae.

²¹Kasanao ngei oh nangei natak na hrano muilah hai thou wa aram lah ah am mo.