Read Chothe Naga 3 JOHON 1 Bible Online

3 JOHON 1 - Chothe Naga bible

3 JOHON 1

¹Ulien changei thou wa adiekka kalungshit Gaiusta.

²Ehekta kalungsit tongpi oh, keina nata muihla ratrang, natullu ratta lu nea rang akha chu pum hra ah amranga keina Chungthieng kolla nipiya aminge nanghi muihla ah ratte ti hi dang inge.

³Chuna Chungthieng ta ngoiringa anu jui ah am ule nao ngeina phao weta ril pi ae hachu, nangna adiek taranga nalung chetta nangir, adiek taranga ringa na am ring changha, kathei jui apha ah kei arillang am no mahei ariem minge.

⁴Kasanao ngeina adiek lam tinga thinge ti rou kathei jui ah hita lella karim am no songe.

⁵Ehekta kalungsit tongpi oh, nangna hulang mee takom na-u-nanao hekta Khrista ta ngoiringa ngei tullu ha ae che ae.

⁶Manina meelim maikunga nalungsit hina maram ma rilhlak trong hlakke, nangna Chungthieng adiek lamtinga manina thing nerang sanpiyo. Chuti lea Chungthieng na riem ange.

⁷Chuna Khrista matullu lu ranga manina Khrista ngoiring no mee ngei yar ekom la no lutta thinge,

⁸chuna sarukka Khrista ta ngoiringa am anina hi yongpa mee ngeita san pi phum shuk ke, chuna adiek tullu taranga anina mani itta akha chakka ae phum shukke.

⁹Keina abom ngei taranga tronglam abongte jiek kinge: hatiweta mee limta lamkai chang numma am Diotrephes nachu karil tronglam eya lim la num no weh.

¹⁰Chuna sarukka kei phao talechu, ma lu na tullu anu jui ah keina ningsing piange. Amona ani chunga hrano trong eya rilla, hatiweta tronglam hana chakna hop no lutta, amo matak makna Khrista ta ngoiring ule nao ngei ta abom sunga tolpinowe, Khrista ta lasil num ule nao ngei takom amona ham ma si ae, akha chu manita abom hei thouwa amona yulla houwe.

¹¹Kalungsit tongpi oh, hrano lam tinga jui ah thingno oh, chuti weta ahra lamting chak jui ah thing ngou oh. Atu yongna ahra tullu lu mee ha Chungthieng kol hei thouwa shuk kae; atu yongna hrano tullu lu mee hachu Chungthieng ta ri no dang no mee ae.

¹²Meelim pana akha chu adiek makna Demetrius ta ahra aeta meelung ngir pe ae, akha chu ani nako ahra aeta rilla am munge, hatiweta anina rilla am adiekke ti hi anina dange.

¹³Keina nakolla karillang ehekta am hom meh, chuti weta keina kolom akha chu muk hina nakolla jiek-num nonge.

¹⁴Chuna sarukka keina nang hitta sot no lutta tukhlak ranga halla aminge.

¹⁵Nakolla adai tiha am shu oh. Tongpi thanrul ngeina nangeita ariem ma lanna am meh. Ani tonpi limta ariem trong lan pi oh.