Read Chothe Naga JUD 1 Bible Online

JUD 1 - Chothe Naga bible

JUD 1

¹Khrista Jisu hina suuk Jud akhachu uleanao Jacob kol hai thou wa Chungthieng na koksha akha chu Pa Chungthieng lungshit jarra ringa am Khrista Jisu na runga am ngeita.

²Ngaithei, adai lungshi na shihakta nangei kolla am shu oh.

³Kalungshit tonpi ngei oh! Ani na akha chakka pha ha am aring keato hana sarukka keina ahrat ranga jiekka aminge. Nahi nangei kolla jieka hla ang darkar am so ti chu nangei ta thanum pi num minge Chungthieng na malmashi lim chang honna pe ah shi ngoiring hana taranga atri am no wa sulranga.

⁴Rouram chu Chungthieng tolno atu jong ahre na arawa ani kar haithou shukka thinge mani taranga routreem na amatieng hai jiekka shi so ae. Mani ha chu Chungthieng na lungshit hi alou litta la ah, ani akha chak arengpu mitpu Jisu Khrista ta ngei num no ngei ae.

⁵Nahi nangeina dang hap shu hal kom. Nangeita keina angei thei pi nun minge alota arengpu na Isreal sanao ngeita Egypt ram ma sanpi meh hana ngoiring no ngeita alota anutienga chu mangpi ah sha.

⁶Hana wanrui ngei na mani am phung shuk am na ah am no ah, mani ha Chungthieng na routreem ni alok rungnie phao taranga atreem neino thilrui ah huppa thutekty athiem thuija shi ae.

⁷Chuna chu hek ta Sodom lea Gomarrah akha chu hana ahulla am hulok limna wanrui ngei na ae hekta hrano lungrang sunga wukno namei apa jalha hrun ha ah, mani ha atreem nei no sarmei kum ma thing ta ae.

⁸Chuna chu hekta na malmashi ngei na mani tak makta pak kumma tul ranga mani tak, tak na ri nea ae; Mani na Chungthieng ane akha chu mahung majaita ajakpe ae.

⁹Hijong hi chu chungtekti wanrui Maikal na hitta kom ae no ae. Amo na Moses hina pum hi atu na chang phung shukmeh ta dajabol hita trong jet hlak juija makolla trongshi trongbau ril num no ae, Chuti weta amo na ril, “Arengpu na nangta Raen shu oh!”

¹⁰Chuti weta na mee ngei na chu bahap ta no jarra ajak tuk pi ae; akha chu mani na ram sha ngei hekta ephao dang no wa amang atah shuk pi ae.

¹¹Mani taranga eja ah atri pi meh! mani ha chu Cain thingna lam jui so weh. Sumlea pai sha rukka Balaam na matakta aral tullu lu. Mani na Korah na anda hekta anda ae, hana amo hekta mani ko mangpi ang nge.

¹²Mani ha chu nangei bu bakha ang na bomtul na amunt na mee jongpa ae ajak am lou mani ha chu mani taranga chak hal mee ae. Mani ha ru tollou thirang phaibu jongpa ae. Mani ha chu ara pha ah kom ara ralou theikunge mani ha chu phalbi ja atro phoi ah hou weta ripta tanna hou jongpa ae.

¹³Mani ha chu tuipilien na awet tuijul jongpa ae chuna mani ajak pingamha tuiphul hekta tokka shuk hange. Chuna mani hi amunt nei no arshi hekti ae. Rouram chu atreem nei no athuk athiem thuija am ma ta so ae.

¹⁴Adam hina tu mate aruk suna Enoch na. Anatienga mani maram ma ril phurre, “Anno! Arengpu na athieng wanrui lasing eja hita jung ange.

¹⁵Mani lim chunga routreem rang hana manina Chungthieng tolno wa mani pak ae na tullu makhai, akha chu mani na Chungthieng ta atri pi rou trong sharukka jarra!”

¹⁶Na Malmashi ngei na apha chang honna adangei ta hrano tullu lu ah akha chu meeshi chak pe ah am meh; mani na hrano tullu hana chak nu juije; mani na mani thei chakka lokka trongshukka mee adang ta na alou trong weta mani hoi rang chak jonge.

¹⁷Chuna katonpi ngei oh, angei thei oh! ani arengpu Khrista Jisu hina ahalsha rui ngei na ejongpa rilphur motiha.

¹⁸Mani na nangeita ril chu, “Atreem nie rung nie ha phao juija chu hlawang nuting jui manina shukveta nangei ta nuisho siemso ae ange.”

¹⁹Hu ngei ahran akui shukpi ngei ha, manina aleiram ma madit nu juija thinge mani ha athieng muihla tol no ngei ae.

²⁰Chuna katonpi ngei oh, aru wa nangei ngoiring ha naha, naha nangei thei chakka lokka shai ah hango, muihla athieng arat hana nie oh.

²¹Arengpu Jisu Khrista maringrei ngei jarra samla ringchang pha rang nangei na ka sunga Chungthieng lung shit thuija am mo.

²²Atujong ngaidol mani ta nangei ringrei ngei pi oh:

²³Sarmei hai thou wa rui shukka sanpi oh akha chu atri am ngei ta kom ringrei ngei pi ah, chuti weta mani adi apam na chuk pun dier ha chu atierro.

²⁴Mahung majai maikunga kae mathui pha ah tu ang sha nangei ta ariem na shihakta rui ah phao.

²⁵Ani ta sanpipa Chungthieng amo chakkae hana arengpu Jisu Khrista jarra athingsha apha kum eja akha chu atun na kom mahung majai na mane jaitha na atreem atreem nei no shu oh! Amen.